ކ. ކާށިދޫ ބާ ހުކުރު މިސްކިތުގެ ތެރެއިން ފެނުނު އެވޭލާ މިސްކިތެއްގެ ތަރާގަނޑާއި ބެހޭ ދިރާސާތައް ފަށާފައިވާކަމަށް މިނިސްޓްރީ އޮފް ދިވެހި ލޭންގުއޭޖް ކަލްޗާ އެންޑް ހެރިޓޭޖުން މިއަދު ބުނެފިއެވެ. 

ހެރިޓޭޖް މިނިސްޓްރީން ބުނީ، އެ ސަރަހައްދު ދިރާސާ ކުރުމުގެ ފުރަތަމަ މަސައްކަތް ކުރިއަށްދަނީ މިދިޔަ ހަފުތާގެ އާދިއްތަ ދުވަހުން ފެށިގެން އަންނަ ހުކުރު ދުވަހުގެ ނިޔަލަށް ކަމަށާއި، މި މަސައްކަތުގެ ތެރޭގައި ބިމުގެ އަޑީގައި ހުންނަ އާސާރީ ތަކެއްޗާމެދު ފަންނީގޮތުން އަމަލުކުރަންވީ ގޮތާއި، އެކަމުގެ އަސާސީ މިންގަނޑުތައް ބައިވެރީންނާ ހިއްސާކުރާނެކަމަށެވެ.

ސަގާފީ ތަރިކަ ރައްކާތެރިކުރުމާ ބެހޭ ޤައުމީ މަރުކަޒާއި ޔުނިވާސިޓީ އޮފް އީސްޓް އެންގްލިއާއި ދިވެހިބަހުގެ އެކެޑަމީ އަދި މެރިޓައިމް އޭޝިޔާ ހެރިޓޭޖް ސާވޭ ގުޅިގެން ކުރިއަށް ގެންދާ މި މަސައްކަތުގައި ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ މުވައްޒަފުންގެ އިތުރުން، ދިވެހިބަހުގެ އެކަޑަމީގެ މުވައްޒަފުންނާއި މެރިޓައިމް އޭޝިއާ ހެރިޓޭޖް ސާވޭގެ ޓީމާއި ޔުނިވާސިޓީ އޮފް އީސްޓް އެންގްލިއާ އިން މާސްޓާސް އިން ދަ އާޓްސް އޮފް އެފްރިކާ އަދި އޯޝަނިއާ އެންޑް ދަ އެމެރިކާސް ވިތު ސެއިންސްބަރީ ރިސާޗް ޔުނިޓް ކިޔަވަމުންގެންދާ ދިވެހި ދެ ދަރިވަރުން ބައިވެރިވެއެވެ.

Advertisement

މި ތާރީޚި ތަން ފެނިފައިވަނީ ހުކުރު މިސްކިތުގެ މަސައްކަތެއް ކުރަނިކޮށް 2020 ވަނަ އަހަރެވެ.