ޣައްޒާ ހުސްކޮށް، އެ ސިޓީގެ ރައްޔިތުން މިސްރާއި އުރުދުނަށް ބަދަލުކުރަން ބޭނުންވާކަމަށް ޓްރަމްޕް ބުނެފި
ފަލަސްތީނުގެ ޣައްޒާ ހުސްކޮށް، އެ ސަރަހައްދުގެ ރައްޔިތުން މިސްރާއި އުރުދުންނަށް ބަދަލުކުރަން ބޭނުންވާކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
މިކަމާއި ގުޅޭގޮތުން ޓްރަމްޕް ބުނީ، ޣައްޒާގައި ދިރިއުޅޭ 1 މިލިއަނަށް ވުރެ ގިނަ ރައްޔިތުންނަށް ގެދޮރު ބިނާކުރުމަށްފަހު ކައިރީގައިވާ އަރަބި ގައުމުތަކަށް ބަދަލުކުރުމާއި މެދު މިދިޔަ ހޮނިހިރު ދުވަހު އުރުދުުންގެ ރަސްގެފާނާއި ވާހަކަފުޅު ދައްކަވާފައިވާކަމަށެވެ.
އދ އިން ހާމަކޮށްފައިވާ ގޮތުގައި މިހާރުވެސް އުރުދުންގައި ފަލަސްތީނަށް ނިސްބަތްވާ 2.39 މިލިއަން ރައްޔިތުން އުޅޭއިރު، ޓްރަމްޕް ވަނީ އަދިވެސް ފަލަސްތީނުގެ ރައްޔިތުން އެގައުމަށް ގެންދިޔުމަށް އުރުދުންގެ ރަސްގެފާނުގެ ކިބައިން އެދިފައެވެ.
މިކަމާއި ގުޅޭ ގޮތުން މިސްރުގެ ރައީސް އަބްދުލް ފައްތާހް އަލް ސިސި އާއި ވެސް ވާހަކަދައްކާނެކަމަށާއި، ޣައްޒާ އެއްކޮށް ސުންނާފަތި ވެފައިވާއިރު، އަރަބި ގައުމުތަކުން އެ ސަރަހައްދުގެ ރައްޔިތުންނަށް އެހެން ހިސާބެއްގައި ގެދޮރު ބިނާކުރުމުގައި ބައިވެރިވާނެކަމަށް ވެސް ޓްރަމްޕް ވަނީ ބުނެފައެވެ.
ޓްރަމްޕް ގެ މި ވާހަކަތަކާއި ގުޅިގެން މިސްރުގެ ޚާރިޖީ ވުޒާރާއިން ނެރުނު ބަޔާނެއްގައި ބުނީ، ފަލަސްތީނުގެ ރައްޔިތުން އެމީހުންގެ ބިމުން އެހެންތާކަށް ބަދަލުކުރުމަށް އެގައުމުން ދެކޮޅު ހަދާކަމަށެވެ. މިއާއިއެކު، އުރުދުން އިން ވެސް ވަނީ ފަލަސްތީނުގެ ރައްޔިތުން، އެމީހުންގެ ބިމުގައި ގާއިމުވެ ތިބުމަށް ބާރުއަޅާކަމަށް ބުނެފައެވެ.
ޓްރަމްޕް މިފަދައިން ބުނެފައިވާއިރު، އޭނާ ވަނީ ޔަހޫދީން ޣައްޒާގައި ހިންގަމުންދިޔަ އަނިޔާވެރި އަމަލުތަކުގެ ސަބަބުން އެގައުމުގެ ކުރީގެ ރައީސް ޖޯ ބައިޑެން މަނާކުރި 2،000 ޕައުންޑްގެ ބޮން އިސްރާއީލަށް އަލުން ފޯރުކޮށްދޭން ނިންމާފައެވެ.
Advertisement
This content is created and paid for by advertisers and does not involve Voice Journalists