އައްޑޫ ސިޓީގެ ރަށްތަކުން ކަރަންޓު ކެނޑޭތީ، އިދިކޮޅު އެމްޑީޕީން މަޖިލީހަށް ހުށަހެޅި ކުއްލި މައްސަލަ މިއަދު ބޭރުކޮށްލައިފިއެވެ.

މި ކުއްލި މައްސަލަ ހުށަހެޅުއްވީ، ހިތަދޫ ދެކުނު ދާއިރާގެ އެމްޑީޕީގެ މެންބަރު އިބްރާހީމް ނާޒިލެވެ.

އެ މައްސަލަ ބަލައިގަތުމާ މެދު ގޮތެއް ނިންމުމަށް މަޖިލިސް ތަޅުމުގައި ނެގި ވޯޓުގައި 47 މެންބަރުން ވޯޓު ދެއްވީ ބަލައިނުގަތުމަށެވެ. މައްސަލަ ބަލައިގަތުމަށް ވޯޓުދެއްވީ އެންމެ 13 މެންބަރުންނެވެ. އެހެންކަމުން، އެ މައްސަލަ ވަނީ ބޭރުކޮށްލައިފައެވެ.

ނާޒިލް ހުށަހެޅުއްވި ކުއްލި މައްސަލައިގައި ވިދާޅުވީ، އައްޑޫ ސިޓީގެ ގުޅިފައިވާ ރަށްތައް ކަމަށްވާ ހިތަދޫ، މަރަދޫ، މަރަދޫ-ފޭދޫ އަދި ފޭދޫއަކީ މާލެ ފިޔަވައި އެންމެ ބޮޑު އާބާދީއެއް ދިރިއުޅެމުންދާ ސިޓީ ކަމަށާއި އެ ސިޓީއަށް ކަރަންޓުގެ ހިދުމަތް ފޯރުކޮށް ދިނުމުގައި ސަރުކާރުން ތަކުރާރުކޮށް އިހުމާލުވަމުންދާ ކަމަށެވެ.

އަދި މި ރަމަޟާން މަސް ފެށެންވާއިރަށް ކަރަންޓުގެ މައްސަލަ ހައްލުކޮށްދެއްވާނެ ކަމަށް ރައީސުލްޖުމްޙޫރިއްޔާ ވިދާޅުވި ނަމަވެސް، އެކަން ހައްލުނުވާތީ ވަނީ ކަންބޮޑުވުން ފާޅުކުރައްވާފައެވެ. އެކަމުގެ ސަބަބުން އެ ސިޓީގައި ދިރިއުޅޭ ރައްޔިތުންގެ އަސާސީ ދިރިއުޅުމުގެ ހާލަތަށް ބޮޑެތި ދަތިތަކެއް ކުރިމަތިވެފައިވާ ކަމަށް ނާޒިލް ވިދާޅުވި އެވެ.

އެގޮތުން ރަށުގެ ގެތަކުންނާއި، އޮފީސްތަކުންނާއި، ފިހާރަތަކުން ދޭންޖެހޭ ޚިދުމަތް އާންމު ރައްޔިތުންނަށް ނުދެވި، އެތަންތަނުގައި ގެންގުޅޭ ޓީވީ، އޭސީ، ފުރިޖު ފަދަ އަގުބޮޑު ކަރަންޓު ސާމާނު ހަލާކުވަމުންދާކަން ވަނީ ފާހަގަކޮށްފައެވެ.

ނާޒިލް އިތުރަށް ވިދާޅުވީ، އައްޑޫ ކަރަންޓް މައްސަލަ ހައްލުކުރުމަށް ތިން މެގަވޯޓުގެ ދެ ޖެނެރޭޓަރު ސެޓު ބޭނުންވާކަމަށް އައްޑޫ ސެންޓްރަލް ޕަވާ ސެޓޭޝަނުން ތަކުރާރުކޮށް ބުނަމުން ދަނިކޮށް އެ ސްޓޭޝަނަށް ގެންދިޔައީ 1.8 މެގަވޯޓުގެ އެންމެ ޖެނެރޭޓަރު ސެޓެއް ކަމަށެވެ.

އެހެންކަމުން އައްޑޫ ސިޓީގެ ކަރަންޓުގެ ހާލަތު ރަނގަޅުކުރުމަށް އަޅަންޖެހޭ ފިޔަވަޅުތައް އެޅުމަށް ސަރުކާރަށް ވަނީ ގޮވައިލާފައެވެ.