އިސްރާޢީލް ޕާސްޕޯޓް އޮންނަ މީހުންނަށް ރާއްޖެ ނާދެވޭ ގޮތަށް މަނާ ކުރުމަކީ މިވަގުތަށް ކުރެވުނު ބޮޑު ކަމެއް ކަމުގައި، ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝައިޚް އާދަމް ނިޝާން ވިދާޅުވެއްޖެއެވެ.

އިސްރާއީލްގެ ޕާސްޕޯޓްގައި ރާއްޖެ އެތެރެވުން މަނާކުރަން ދިވެހިރާއްޖޭގެ އިމިގްރޭޝަންގެ ގާނޫނަށް އިސްލާހު ގެނެސް އެ ބިލް ރައްޔިތުންގެ މަޖިލީހުން މިއަދު ވަނީ ފާސްކޮށްފައެވެ.

އެކަމާއި ގުޅިގެން ޝެއިޚް ނިޝާން މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، މިވަގުތަށް އެއީވެސް ބޮޑުވަރެއް ކަމަށެވެ. 

އެހެން ނަމަވެސް މުސްލިމުންގެ ޙައިސިއްޔަތުން، އެއްވެސް އިރެއްގައި އިޒްރޭލަކީ ދައުލަތެއްގެ ގޮތުގައި އިޢުތިރާފުވެގެން ނުވާނެ ކަމަށާ، އަދި އެޕާސްޕޯޓުގައި ދުވަހަކުވެސް މުސްލިމުންގެ ބިންތަކަށް އެރިޔަ ދީގެން ނުވާނެ ކަމަށް ޝެއިޚް ވިދާޅުވިއެވެ.

އެހެނީ އެމީހުންނަކީ ފަލަސްޠީނުގެ ބިން ފޭރިގަނެ އަޅުވެތިކޮށްގެން ތިބި އިސްތިޢުމާރީން ކަމަށް ވިދާޅުވިއެވެ. 

އެހެންކަމުން އިޒްރޭލަކީ ޣައިރު ޤާނޫނީ ޓެރަރިސްޓް އިސްތިޢުމާރީ ދައުލަތެއްކަން ކަނޑައަޅައި، އެމީހުންގެ ޕާސްޕޯޓް އެކީއެކައްޗަކަށް ބޭން ކުރަންދެން ހުއްޓާނުލާ މަސައްކަތް ކުރައްވަމުން ގެންދަވާނެ ކަމަށް ޝެއިޚް ނިޝާން ވިދާޅުވިއެވެ.

އިސްރާއީލުން ފަލަސްޠީނުގެ ދަރިފަސްކޮޅު ނައްތައިލުމަށް ހިންގަމުންދާ ލާއިންސާނީ އަމަލުތަކާއި ގަތުލުއާންމާ ދެކޮޅަށް ދިވެހިރާއްޖެއިން ފިޔަވަޅުއެޅުމުގެ ގޮތުން، ދިވެހިރާއްޖެއަށް އިސްރާއީލުގެ ޕާސްޕޯޓުގައި އިސްރާއީލުގެ ރައްޔިތުން އެތެރެވުން މަނާކުރާ ބިލް މިއަދު މަޖިލީހުން ފާސްކުރުމާއެކު، ރައީސް ޑރ މުޙައްމަދު މުޢިއްޒު ވަނީ އެ ބިލް ތަސްދީޤް ކުރައްވާފައެވެ.