ރާއްޖޭގެ އިގްތިސާދު އޮތީ ވަރުގަދަކޮށް ކަމަށާ މާލީ އިސްލާހުތައް ގެންނަމުގެ މަސައްކަތް ސަަރުކާރުން ހަލުވިކޮށް ކުރައްވަމުން ގެންދަވާ ކަމަށާ ކުރީގެ ރައީސް އަދި ސްޕެޝަލް އެންވޯއި އޮފް ދަ ޕްރެޒިޑެންޓް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އެމެރިކާގެ ނިއުޔޯކްގައި ކުރިއަށް ދިޔަ މޯލްޑިވްސް ޓުއަރިޒަމް އެންޑް އިންވެސްޓްމަންޓް ފޯރަމްގައި ވާހަކަފުޅު ދައްކަވަމުންނެވެ. ދިވެހިރާއްޖޭގެ ވިލުންތެރިކަމާއި، ގެންނަމުންދާ އިޞްލާޙީ ބަދަލުތަކާއި ދުރުރާސްތާގެ ލަނޑުދަނޑިތަކާއި ގުޅޭގޮތުން ވާހަކަފުޅު ދައްކަވަމުން ރައީސް ވަހީދު ވިދާޅުވީ ދިވެހިރާއްޖޭގެ އިގްތިސާދު އޮތީ ވަރުގަދަކޮށް ކަމަށެވެ.
އަދި އިންވެސްޓަރުންނާއި ރާއްޖޭގައި މިހާރުވެސް ވިޔަފާރި ކުރާ ފަރާތްތަކަށް އެެކަމުގެ ޔަގީންކަން ދެއްވާ ކަމަށް ވިދާޅުވި އެވެ.
މީގެ އިތުރުން އެމަނިކުފާނު ވިދާޅުވީ މާލީ އިސްލާހުތައް ގެނައުމުގެ މަސައްކަތް ކުރައްވަމުން ގެންދަވާ ކަމަށެވެ. އެއީ ރާއްޖޭގައި ހަމަޖެހުން ކަށަވަރުކޮށްދީ އިތުބާރާއި ހާމަކަން ބޮޑު ގޮތެއްގައި ކަނޑައެޅިފައިވާ، އިންވެސްޓްމަންޓާ ރައްޓެހި މާހައުލެއް ބިނާކުރުމަށް ކުރަމުންދާ މަސައްކަތެއް ކަމުގައި ވިދާޅުވި އެވެ.
އަދި ވިދާޅުވީ ދިވެހި ސަރުކާރުގެ އަމާޒަކީ އިސްތިގުލާލު ރައްކާތެރިކޮށް އަންނަން އޮތް ޖީލުތައް ބާރުވެރިކުރުވާނެ އިގްތިސާދެއް ބިނާކުރުން ކަމަށެވެ. ރައީސް ވަހީދު ވަނީ ދިވެހިރާއްޖެއަކީ އިސްތިރާޖީ ގޮތުން ލިބިފައި އޮތް ފުރުސަތެއް ކަމުގައި ދުށުމަށް ފޯރަމްގެ ބައިވެރިންނަށް ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
