ފުލުހުންގެ ބޭނުމަށް ހުޅުމާލެ ފޭސް ދޭއްގައި ސަބްމެރިން ކޭބަލް އަޅަން ބަޔަކާ ހަވާލުކޮށްފި
ހުޅުމާލެ ފޭސް ދޭއްގެ ސަލާމަތީ ކަންކަން ގާއިމްކުރުމަށް ކުރަމުންގެންދާ މަސައްކަތްތަކުގެ ދަށުން ފުލުހުންގެ ބޭނުމަށް ފޭސް ދޭއްގައި ސަބްމެރިން ކޭބަލް އަޅަން ބަޔަކާ ހަވާލުކޮށްފިއެވެ.
ފޭސް ދޭއްގައި ސަބްމެރިން ކޭބަލް އަޅައިދޭނޭ ބަޔަކު ހޯދުމަށް ފުލުހުންގެ އިދާރާއިން ކުރި އިއުލާނަށްފަހު ހުށަހެޅި ޕްރޮޕޯސަލްތައް ދިރާސާކުރުމަށްފަހު އެމަސައްކަތް ހަވާލުކޮށްފައިވަނީ، އޯތްސް ނަމަކަށް ކިޔާ ކުންފުންޏަކާއެވެ. ފުލުހުންގެ އިދާރާއިން ހުޅުމާލެ ފޭސް ދޭއްގައި ސަބްމެރިން ކޭބަލްތައް އެޅުމަށް ތައްޔާރުވަމުންދާއިރު، މިދިޔަ އޭޕްރިލްމަހު ރައްޔިތުން މަޖިލީހުގެ ތަޅުމުގައި ރައްޔިތުން މަޖިލީހުގައި ވާހަކަދައްކަވަމުން ދާހިލީ ވަޒީރު އަލީ އިހްސާން ވަނީ ހުޅުމާލެ ފޭސް ދޭއްގައި ސީސީޓީވީ ކެމެރާ ހަރުކުރުމަށްޓަކައި ކުރަންޖެހޭ މަސައްކަތްތައް ކުރައްވަމުން އަންނަކަމަށް ވިދާޅުވެފައެވެ.
ހުޅުމާލެ ފޭސް ދޭއްގެ އާބާދީ 30،000 ހާހުން މަތީގައި އުޅޭއިރު، ހިޔާ ފްލެޓް ސަރަހައްދުގެ ސަލާމަތީ ކަންކަން މިހާރުހުރީ ކަންބޮޑުވާ ހާލަތެއްގައިކަމަށް އެތަނުގައި ދިރިއުޅެމުން އަންނަ ފަރާތްތަކުން ފާހަގަކުރެއެވެ. މިގޮތުން ބައެއް މަގުތަކުން ފޭރުންފަދަ އަމަލުތައް ހިންގުމާއި ސައިކަލް ފަދަ އުޅަނދުތައް ވަގަށް ނަގަމުން އަންނަކަންވެސް އެ ސަރަހައްދުގައި އުޅެމުން އަންނަ މީހުން ބުނެއެވެ.
ހުޅުމާލެ ފޭސް ދޭއް ހިޔާ ސަރަހައްދުގައި މާރާމާރީ އާއި މަސްތުވާތަކެތި ބޭނުންކުރާމީހުން ގިނަވުމަކީ އެތަނުގައި ދިރިއުޅެމުންދާ މީޙުްނގެ ވަރަށްބޮޑު ޝަކުވާއެވެ. މިކަމާ ގުޅޭގޮތުން އޭރު މަޖިލީހުގައި ވާހަކަދައްކަވަމުން ދާހިލީ ވަޒީރު އިހުސާން ވަނީ ހުޅުމާލެ ފޭސް ދޭއްގައި ދިރިއުޅެމުންދާ ރައްޔިތުންގެ ސަލާމަތީ ކަންކަން ރައްކާތެރިކުރުމަށްޓަކައި އެ ވުޒާރާއިން ކުރަންޖެހޭ ކަންކަން ކުރަމުންގެންދާކަމަށް ވިދާޅުވެފައެވެ. އެގޮތުން ފޭސް ދޭއްގައި ކުށްކުރުމުގައި ހަރަކާތްތެރިވާ ކުދިން ފާހަގަކޮށް އެކުދިންނަށް ހިންގަންޖެހޭ ޕްރޮގްރާމްތައް ހިންގުމުގެ މަސައްކަތްވެސް ކުރަމުން އަންނަކަމަށް މިނިސްޓަރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
