ރާއްޖެ އާއި ސްރީލަންކާ އާއި ދެމެދު ކޮމާޝަލް ޑިއުޓީ ފްރީ ޒޯނެއް ގާއިމު ކުރަން ހިޔާލުވެސް ކުރެވިފައެއް ނެތް ކަމަށް އިކޮނޮމިކް މިނިސްޓަރު މުހައްމަދު ސައީދު މިރޭ ވިދާޅުވެއްޖެ އެވެ.

ސައީދު މިހެން ވިދާޅުވީ އެކްސް ގައި ކުރެއްވި ޕޯސްޓެއްގަ އެވެ. ސައީދު މިފަދަ ޕޯސްޓެއް ކުރެއްވީ ރާއްޖެ އާއި ސްރީލަންކާ އާއި ދެމެދު ކޮމާޝަލް ޑިއުޓީ ފްރީ ޒޯނެއް ގާއިމު ކުރަން ނިންމާފައިވާ ކަމަށް ބުނެ ބައެއް ނޫސްތަކުން ރިޕޯޓް ކުރުމާއި ގުޅިގެންނެވެ. މިއީ ސައުތު އޭޝިޔާގައި ހަދާ އެފަދަ ފުރަތަމަ އެގްރިމަންޓް ކަމަށާ މި ކަމުން ދެ ގައުމުން މުހިންމު ކަންތައްތަކަކަށް އެއްބަސްވާނެ ކަމަށް ރިޕޯޓްތައް ބުނެފައިވެ އެވެ.

ނަމަވެސް ސައީދު ވަނީ އެކަން ދޮގު ކުރައްވާފަ އެވެ. މިނިސްޓަރު ސައީދު ވިދާޅުވީ ރާއްޖެ އާއި ސްރީލަންކާ އާއި ދެމެދު ކޮމާޝަލް ޑިއުޓީ ފްރީ ޒޯނެއް ގާއިމު ކުރަން ދިވެހިސަރުކާރުން މަސައްކަތް ކުރާ ވާހަކަ އަކީ ރަނގަޅު ވާހަކަ އެއް ނޫން ކަމަށެވެ.

އަދި ވިދާޅުވީ އެއީ މިހާތަނަށް ޚިޔާލުކު ރެވި ނުވަތަ މަޝްވަރާ ކުރެވިފައިވާ ކަމެއް ވެސް ނޫން ކަމަށެވެ.

ރިޕޯޓްތައް ބުނާ ގޮތުން ރާއްޖެ އާއި ސްރީލަންކާ އާއި ދެމެދު ކޮމާޝަލް ޑިއުޓީ ފްރީ ޒޯނެއް ގާއިމު ކުރަން ނިންމާފައިވާއިރު ވަރަށް އަވަހަށް ސްރީލަންކާގެ ރައީސް އަނޫރާ ކުމާރަ ޑިސަނަޔަކަ އަންނަ މަހު ރާއްޖެ ވަޑައިގަންނަވާނެ އެވެ. ނަމަވެސް އެކަމާ ގުޅޭގޮތުން ވެސް ސަރުކާރުން އަދި އެއްވެސް ވާހަކައެއް ނުދައްކަ އެވެ.