އިންޑިއާއާއި އެމެރިކާއާ ދެމެދު އެކުލަވާލެވޭ ވިޔަފާރީގެ އެއްބަސްވުން ވަރަށް އަވަހަށް ނިމި، އެއަށް އަމަލުކުރަން ފަށާނެކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް ކުރައްވަފިއެވެ.
ކޮންގްރެސްއިން ފާސްކުރި ޚަރަދުގެ ބިލުގައި ސޮއިކުރެއްވުމުގެ ރަސްމިއްޔާތުގައި ވާހަކަ ދައްކަވަމުން ޓްރަމްޕް ވިދާޅުވީ އޭނާގެ ވިޔަފާރީގެ ސިޔާސަތުތަކަށް ފާޑުކިޔާ މީހުން، އެމެރިކާއާއެކު ވިޔަފާރީގެ އެއްބަސްވުން ހަދާނެ ބަޔަކު ނުވާނެކަމަށް ކުރިން ބުނި ކަމަށާއި، އެހެންނަމަވެސް ގައުމުތަކުން އެއްބަސްވުންތައް ހަދަމުންދާކަމަށެވެ. ޗައިނާއާއެކުވެސް ނިމުނު ހަފްތާގައި އެއްބަސްވުމެއް އެކުލަވާލާފައިވާކަމަށާއި، ދެން އޮތީ ފަހަރުގައި އިންޑިއާއާއެކު ހަދާ އެއްބަސްވުން ކަމަށް ވެދާނެ ކަމަށާއި، އަދި އެ އެއްބަސްވުމަކީ ބޮޑު އެއްބަސްވުމެއް ކަމަށް ޓްރަމްޕް ވިދާޅުވިއެވެ.
ޤައުމުތަކުން އެމެރިކާއަށް އެތެރެ ކުރާ މުދަލުން ބޮޑު ޓެރިފެއް ނެގުމަށް ޓްރަމްޕް ވެރިކަމަށް ވަޑައިގެން ނިންމެވުމާއެކު، އެކި ގައުމުތަކުން އަންނަނީ އެމެރިކާއާއެކު ވިޔަފާރީގެ އެއްބަސްވުންތަކަށް އާދެވެތޯ މަސައްކަތްކުރަމުންނެވެ. އެހެންނަމަވެސް ޓްރަމްޕް ވިދާޅުވީ ކޮންމެ ކޮންމެ ޤައުމަކާއެކު އެއްބަސްވުން ނަހަދާނެކަމަށާއި، ބައެއް ގައުމުތަކުން ޖެހޭނީ ބޮޑެތި އަދަދުތަކުން ޓެރިފް ދައްކަން ކަމަށެވެ.
އިންޑިއާއާއި އެމެރިކާއާ ދެމެދު ގާއިމްކުރެވޭ ވިޔަފާރީގެ އެއްބަސްވުން މިއަހަރުތެރޭ ނިންމާލެވޭނެކަމަށް އެމެރިކާގެ ވިޔަފާރިއާއި ބެހޭ ވަޒީރު ހޮވަރޑް ލަޓްނިކް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
