މާޅެންދޫ ބައެއްގެ ގޮތުގައި ތޮޅެންދޫ ހަމަނުޖެހި ދިގުލައިގެން ދަނީ އަތޮޅު ކައުންސިލުގެ ސަބަބުން: ރައީސް
ނ.އަތޮޅު މާޅެންދޫ ބައެއްގެ ގޮތުގައި ތޮޅެންދޫ ހަމަނުޖެހި ދިގުލައިގެން ދަނީ އަތޮޅު ކައުންސިލުގެ ސަބަބުންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިލަންދޫ ރައްޔިތުންނާ ބައްދަލުކުރެއްވުމަށް މިއަދު އެރަށުގައި ބޭއްވި ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މާޅެންދޫގެ ބައެއްގެ ގޮތުގައި ތޮޅެންދޫ ހަމަޖެއްސުމަކީ އެމަނިކުފާނުގެ ވައުދުފުޅެންކަމަށާއި، އެކަން އެގޮތަށް އޮތްނަމަވެސް މިހާތަނަށް އެކަން ނުނިމިއޮތީ އަތޮޅުކައުންސިލުގެ ސަބަބުންކަމަށެވެ.
ފިޝަރީޒް މިނިސްޓްރީން 2022 ވަނަ އަހަރު ދިގު މުއްދަތަކަށް ތޮޅެންދޫ ކުއްޔަށް ދިނުމަށް އިއުލާނުކުރުމުން ނ.އަތޮޅު ކައުންސިލުން ވަނީ އެކަން ހުއްޓުވުމަށް ސިވިލްކޯޓަށް މައްސަލަ ހުށަހަޅާފައެވެ. އަދި އެ ކޯޓުން ވަނީ ކުއްޔަށްދިނުން މަޑުޖައްސާލުމަށް އަމުރު ނެރެފައެވެ. އެހެންކަމުން މިއަދާހަމަޔަށްވެސް ތޮޅެންދޫ މައްސަލަ އޮތީ ޝަރުއީ މަރުހަލާގެ ތެރޭގައެވެ.
މާލެންދޫ ބައެއްގެ ގޮތުގައި ތޮޅެންދޫ ހަމަނުޖެހި ދިގުލައިގެންދާ މައްސަލައާ ގުޅޭގޮތުން ރައީސް ޑރ.މުއިއްޒު މިއަދު ވިދާޅުވީ މާޅެންދޫގެ ބައެއްގެ ގޮތުގައި ތޮޅެންދޫ ހަމަނުޖެހި ދިގުލައިގެންދަނީ އަތޮޅު ކައުންސިލްގެ ސަބަބުންކަމަށެވެ.
އަތޮޅު ކައުންސިލުން ކޯޓަކަށް ހާޒިރެއްނުވޭ. ހާޒިރު ނުވީމައި މައްސަލަ ނުހިނގައިގެން މިއުޅެނީ. އެހެންވީމައި މާޅެންދޫ ރައްޔިތުންގެ އުއްމީދުތަކާ ގުޅިފައިވާ އަދި އަޅުގަނޑު ވައުދުވެފައިވާގޮތަށް ތޮޅެންދޫ މާޅެންދޫގެ ބައެއްގެ ގޮތުގައި ހަމަޖެއްސުމަށް ހުރަސްތައް ކުރިމަތިކުރުވާފައިމިވަނީ އަތޮޅުކައުންސިލުން
ރައީސް ވިދާޅުވިއެވެ
ރައީސް ޑރ.މުއިއްޒު އިތުރަށް ވިދާޅުވީ މި މައްސަލާގައި ޤާނޫނީ އިޖުރާއަތްތަކުގެ ތެރެއިން މަގެއް ފެނޭތޯބެލުމަށް އެޓަރނީ ޖެނެރަލްގެ ކިބައިން މިހާރު އެދިފައިވާނޭކަމަށެވެ. މާލެންދޫގެ ރައްޔިތުންނަށް ޓަކައި މިކަމަށް ގޮތެއް ހޯއްދެވުމަށް ވަރަށްބޮޑަށް މަސައްކަތްކުރައްވަމުން ގެންދަވާކަމަށްވެސް ރައީސް ވަނީ ފާހަގަކުރައްވާފައެވެ.
ފިޝަރީޒް މިނިސްޓްރީން ތޮޅެންދޫ 21 އަހަރަށް ކުއްޔަށްދޭން އުޅުމުން އެ މައްސަލާގައި ނ.އަތޮޅު ކައުންސިލުން ނިކުތީ އެކަމަކީ ރައްޔިތުންނަށް އެންމެ ފައިދާހުރިގޮތް ނޫންކަމަށް ބުނެއެވެ. އެގޮތުން ތޮޅެންދޫ މީހުންނަށް އެރަށަށް ދިއުމުގެ މަގު ބަންދުވެއްޖެނަމަ، އެތައް ގެއްލުންތަކެއް ލިބިގެންދާނެކަމަށްވެސް ނ.އަތޮޅު ކައުންސިލުން ވަނީ މީގެކުރިން ބުނެފައެވެ.
Advertisement
This content is created and paid for by advertisers and does not involve Voice Journalists
