މި ސަރުކާރުން ވެރިކަމާ ހަވާލުވިއިރު، ރާއްޖޭގެ ގިނަ ރަށްތަކުގައި ހުރި ހޮސްޕިޓަލުތަކާއި ހެލްތު ސެންޓަރުތަކުގައި ހުރި ލެބޯރަޓަރީ ތަކުން އާދައިގެ ޓެސްޓްތައްވެސް ނުހެދޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު  ވިދާޅުވެއްޖެއެވެ.

ރައީސް މުޢިއްޒު ނ އަތޮޅަށް ކުރައްވަމުންދާ ދަތުރުފުޅުގެ ތެރެއިން، ފޮއްދޫ އަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ވާހަކަދައްކަވަމުން ވިދާޅުވީ، އެމަނިކުފާނު އެންމެ މުހިންމު ސަމާލުކަމެއް ދެއްވަނީ ސިއްހީދާއިރާ ވަރުގަދަ ކުރައްވަން ކަމަށެވެ. 

ކަންމިހެން ހުރުމުން، މިއަހަރާއި އަންނަ އަހަރުގެ ބަޖެޓުގައި ހިމެނިގެން، ސިއްހީ ދާއިރާގެ ކުރިއެރުމަށް ގިނަ ކަންކަން ކުރެވޭނެ ކަމަށާ، އެގޮތުން، ރަށްރަށުގެ ލެބޯޓެރީގެ ޚިދުމަތް ރަނގަޅު ކުރުމާއި، ވަސީލަތްތައް ފުރިހަމަކޮށް، އުމްރާނީގޮތުން ޖާގަ އިތުރުކޮށް، މުވައްޒަފުން އިތުރުކޮށް ވަށާޖެހޭ ގޮތަށް ޚިދުމަތް ރަނގަޅު ކުރެވިގެންދާނެ ކަމަށް އެމަނިކުފާނު ވިދާޅުވިއެވެ. 

އެ މަސައްކަތުގެ ތެރެއިން، މިއަދު ފޮއްދޫގައި ބިންގާ އެޅިގެންދިޔަ ހެލްތު ސެންޓަރުގެ އައު އިމާރާތަކީ، ލެބޯޓެރީގެ ޚިދުމަތުގެ ފެންވަރުވެސް ރަނގަޅު ތަނަކަށް ވެގެންދާނެކަން ރައީސް ފާހަގަކުރެއްވިއެވެ.

މީގެ އިތުރުން ރައީސް ވިދާޅުވީ، މި ސަރުކާރުގެ ސިޔާސަތަކީ ހުރުހާ ރައްޔިތުންނަށް ހަމަހަމަ ފުރުސަތެއް ހޯދައިދެއްވުން ކަމަށެވެ. އަދި ރައްޔިތުންނަށް ވެވަޑައިގެންފައިވާ ވައުދުތައް ފުއްދަވައިދެއްވުމަކީ އަމާޒު ކަމަށާ، އެކަމުގައި ކުޑަރަށެއް ބޮޑުރަށެއް ތަފާތު ނުކުރައްވާނެ ކަމަށް ވިދާޅުވިއެވެ.

އެގޮތުން، ފޮއްދޫގެ ބަނދަރުގެ މަސައްކަތާއި، ޕޮލިސް ސްޓޭޝަންގެ ބިންގާވެސް މިއަދު އެޅިގެންގޮސްފައިވާއިރު، އެ މަސައްކަތް ބާރަށް ކުރިއަށް ގެންގޮސް ނިންމާލެވި ޚިދުމަތްތަކުގެ ފަސޭހަކަން ރައްޔިތުންނަށް ލިބިގެންދާނެ ކަމަށް ރައީސް ވިދާޅުވިއެވެ.