ރައީސްގެ ކުރިފުޅުމަތީ ހުތުރު ވައްތަރު ޖައްސަން ފުރުސަތު ދީގެން ނުވާނެ: މުޢިއްޒު
ދިވެހި ގައުމުގެ ރައީސުލްޖުމްހޫރިއްޔާއާ މުހާތަބުކޮށް އެމަނިކުފާނުގެ ކުރިފުޅުމަތީ ހުތުރު ބަހުން މުއާމަލާތްކޮށް ވައްތަރު ޖައްސަން ފުރުސަތު ދީގެން ނުވާނެ ކަމަށް ކުރީގެ ޖަސްޓިން މިނިސްޓަރު މުހައްމަދު މުއިއްޒު އަދުނާން ވިދާޅުވެއްޖެ އެވެ.
އަދުނާން މިހެން ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު, ނ. ކުޑަފަރީއަށް އިއްޔެ ވަޑައިގެންނެވި ވަގުތު އެ ރަށުގެ އަންހެނަކު އެމަނިކުފާނުގެ ކުރިފުޅުމަތީ ހުތުރު ބަހުން ވާހަކަ ދައްކާފައި ވަނިކޮށެވެ. އެ އަންހެން މީހާ ވަނީ ވަރަށް ގަދަ އަޑުން ހުތުރު ބަސްތަކެއް ރައީސަށް އަމާޒު ކުރައްވާފަ އެވެ.
އެ މަންޒަރު ފެންނަ ވީޑިއޯ ވެސް ވަނީ އާންމުވެފަ އެވެ. މުއިއްޒު ވިދާޅުވި ގޮތުގައި ކުޑަފަރީން ފެނުނު މަންޒަރަކީ ވަރަށް ނާތަހުޒީބު، ގޮތްނެތް މަންޒަރެކެވެ. އަދި ވިދާޅުވީ ދިވެހި ގައުމުގެ ރައީސުލްޖުމްހޫރިއްޔާއާ މުހާތަބުކޮށް އެމަނިކުފާނުގެ ކުރިފުޅުމަތީ އެފަދަ ކަމެއް އެއްގޮތަކަށް ވެސް ހިންގިޔަދީގެން ނުވާނެ ކަމަށެވެ.
ކޮންމެ ބޭފުޅަކު ރައީސުލްޖުމްހޫރިއްޔާގެ މަގާމުގައި ހުންނެވިޔަސް އެ މަގާމު ރަމްޒުކޮށްދެނީ ދިވެހި ދައުލަތް ކަމަށް ވިދާޅުވި އެވެ. އަދި ވިދާޅުވީ ރައީސުލްޖުމްހޫރިއްޔާ ތަމްސީލު ކޮށްދެއްވަނީ މުޅި ދިވެހި ރައްޔިތުންނާއި ގައުމު ކަމަށެވެ.
"މިނިވަންކަމަކީ ގޮތްނެތް ކަމެއް ނޫނެވެ. ޑިމޮކްރަސީ އަކީ ހިތުހުރިހާ ގޮތަކަށް އުޅުއްމެއް ވެސް ނޫނެވެ,"
މުޢިއްޒު ވިދާޅުވީ ރައީސްގެ ނުވަތަ ސަރުކާރުގެ ސިޔާސަތުތަކަށް ނުވަތަ ސަރުކާރުން ކުރާ ކަންތައްތަކަށް ފާޑުކިޔާ ދެބަސް ވެސް ވެވިދާނެ ކަމަށެވެ. ނަމަވެސް ވަކި ހަމަތަކަކާ ހުދޫދެއްގެ ތެރޭގައި ކަމަށް ވިދާޅުވި އެވެ.
ވިދާޅުވީ ކޮންމެ ކަމަކަށް ވެސް، ތަނަކާއި ވަގުތަކާއި ގޮތެއްވާ ކަމަށެވެ. އެފަދަ ބޭއަދަބީ، ގޮތެއް ފޮތެއްނެތް އަމަލުތައް ކުރާ މީހުނާމެދު ފިޔަވަޅެއްް ނޭޅުމަކީ އޭގެ ނުރަނގަޅު އަސަރު މުޅި މުޖުތަމައަށްކޮށް އިޖުތިމާއީ ފޭރާން އިތުރަށް ވީދޭނޭ ކަމެއް ކަމަށް ވެސް ވިދާޅުވި އެވެ.
"އަނެއްކާވެސް ދަންނަވާނީ މިފަދަ ކަމެއް ހިންގިޔަދީގެން ނުވާނެ ވާހަކައެވެ," މުއިއްޒުގެ ޕޯސްޓްގައި ވެ އެވެ.
Advertisement
This content is created and paid for by advertisers and does not involve Voice Journalists
