އިންޑިއާއަކީ އިޚްލާސްތެރި ހަގީގީ ރަހުމަތްތެރިއެއްކަން އަދުގެ ސަރުކާރުން ޤަބޫލުކޮށްފައިވާ ކަމުގެ ނިޝާންތައް ފެންނަން ފަށާފައިވާ ކަމަށް މޯލްޑިވިއަން ޑިމޮކްރެޓިކް ޕާޓީ (އެމް.ޑީ.ޕީ)ގެ ރައީސް އަދި ކުރީގެ ފޮރިން މިނިސްޓަރ ޢަބްދުالله ޝާހިދު ވިދާޅުވެއްޖެއެވެ.
އިންޑިއާގެ އޭ.އެން.އައި އަށާއި ވިއޯންއަށް އިއްޔެ ދެއްވި އިންޓަވިއުތަކެއްގައި ޝާހިދު ވިދާޅުވީ އިންޑިއާއަކީ އަވަށްޓެރި ޤައުމުތަކަށް ރަނގަޅަކަށް މަސައްކަތްކުރާ ޤައުމެއްކަމަށާއި، އެކަމުގައި ނުބައި ނިޔަތެއް ނެތްކަމަށް ދިވެހި ސަރުކާރުން ޤަބޫލުކުރާކަން، އިންޑިއާގެ ބޮޑުވަޒީރު ނަރެންދްރަ މޯދީ، ރާއްޖޭގެ މިނިވަންދުވަހުގެ މުނާސަބަތަށް ރާއްޖެއަށް ވަޑައިގަތުމަށް ދައުވަތު އެރުވުމުން ހާމަވާކަމަށެވެ.
ޝާހިދު ވިދާޅުވީ، މޯދީގެ ދަތުރުފުޅުގެ ސަބަބުން ދެޤައުމުގެ ގުޅުން އިތުރަށް ބަދަހިވެ، ހަރުދަނާވެގެން ދާނެކަމަށް އުއްމީދުކުރައްވާކަމަށާއި، މިއީ އާ ފެށުމަކަށް ވާނެކަމަށް އުއްމީދުކުރައްވާކަމަށެވެ.
އިންޑިއާގެ އިޤްތިޞާދީ ކުރިއެރުމުގެ ބޭނުން ހިފުމަކީ ރާއްޖެއަށް މުހިންމު ކަމެއް. ދެގައުމުގެ ދެމެދުގައި އޮތް ޑިޕްލޮމެޓިކް ގުޅުން ހީނަރުވުމުގެ ސަބަބުން ދިވެހިރާއްޖެއަށް އަންނަ އިންޑިއާ ފަތުރުވެރިންގެ އަދަދު ދަށްވެފައިވުމީ ހިތާމަ ކުރާ ކަމެއް. އެހެންނަމަވެސް، ބޮޑުވަަޒީރު މޯދީގެ ޒިޔާރަތުން ހުރިހާ ކަމެއް ރަނގަޅުވާނެ ކަމަށް އަޅުގަނޑު ޤަބޫލުކުރަން. އަޅުގަނޑުމެންނަށް ލިބެމުންދާ މެސެޖުތަކުން ދައްކާގޮތުގައި، މިހާރުގެ ދިވެހި ސަރުކާރުވަނީ ޙަޤީޤަތް ޤަބޫލުކުރުމަށް ތައްޔާރުވެފައި. އެއީ އިންޑިއާއަކީ ތެދުވެރި ރަޙްމަތްތެރިއެއްކަމާއި، އިންޑިއާއިން އަބަދުވެސް މަސައްކަތް ކުރާނީ އަވައްޓެރި ޤައުމުތަކުގެ މަޞްލަޙަތަށްކަމާއި، އެއްވެސް ބަޔަކާމެދު ނުބައި ނިޔަތެއް އެގައުމުން ނުބާއްވާނެކަން. އަޅުގަނޑު އުންމީދުކުރަނީ ބޮޑުވަޒީރުގެ މި ޒިޔާރަތަކީ އައު ފެށުމަކަށްވެ، އަޅުގަނޑުމެންގެ ދެ ޤައުމުގެ ގުޅުން އިތުރަށް ބަދަހިކުރުމަށް މަގުފަހިވެގެން ދިޔުން
އެމްޑީޕީގެ ރައީސް އަބްދުالله ޝާހިދު
އަދި ޤައުމުތަކާއެކު ރަހުމަތްތެރިކަން ބޭއްވޭނީ، ވަގުތީ ސިޔާސީ ބޭނުމަށް އަވަށްޓެރި ގައުމުތަކާ ޖެހިގަތުން ހުއްޓާލައިގެންކަން ސިޔާސީ ޕާޓީތަކާއި ސިޔާސީ ބޭފުޅުން ގަބޫލުކުރަންވެއްޖެކަމަށާއި، ޤައުމުތަކާއެކު މަސައްކަތްކުރެވޭނީ އިޚްލާސްތެރިކަމާއެކު ގުޅުން ބާއްވައިގެންކަމަށްވެސް ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވީ، އިންޑިއާއިން ރާއްޖޭގެ ތަރައްޤީއަށް އެހީވަނީ ރާއްޖޭގެ ސަރުކާރުގައި އޮންނަ ޕާޓީގެ ކުލައަށް ބަލައިގެން ނޫންކަމަށާއި، ހުއްޓުމެއް ނެތި ތަރައްޤީއަށް އެހީވަނީ ދިވެހިންނާ އިންޑިއާއާ ދެމެދު އޮންނަ ގުޅުމުގެ ސަބަބުން ކަމަށެވެ.
ދިވެހިރާއްޖޭގެ އަވަށްޓެރިންގެ ގޮތުގައި އޮތް އިންޑިޔާއަކީ ދުނިޔޭގެ 5 ވަނައަށް އެންމެ ބޮޑު އިޤްތިޞާދުކަމަށާއި އެގައުމުގެ އިޤްތިޞާދަށް އަންނަ ކުރިއެރުމުގެ ފައިދާ ރާއްޖެއަށް ހޯދެން ޖެހޭނެކަމަށްވެސް ޝާހިދު ވިދާޅުވިއެވެ.
އެހެންނަމަވެސް، ސިޔާސީ ބޭނުމަކަށްޓަކައި މިއަދުގެ ސަރުކާރުގައި ތިބި ބަޔަކު ކުރި ކަމެއްގެ ސަބަބުން ދެގައުމުގެ ގުޅުން ބޮޑުތަނުން ހީނަރުވެގެން ދިޔަކަން އެއީ ހިތާމަކުރައްވާ ކަމެއްކަމަށް ކުރީގެ ޚާރިޖީ ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
