އެސްޓީއޯއަށް ފައިސާ ދައްކައި ނިހާންގެ މައްޗަށް އޮތް މައްސަލަ ނިންމައިފި
އެސްޓީއޯއަށް ފައިސާ ދައްކައި ވިލިމާލެ ދާއިރާގެ ކުރީގެ މެންބަރު އަހްމަދު ނިހާން ހުސައިން މަނިކުގެ މައްޗަށް އޮތް ދަރަނީގެ މައްސަލަ ނިންމައިފި އެވެ.
ނިހާންގެ މައްޗަށް އޮތީ އެސްޓީއޯ އިން މާފަންނުކޮޅުގައި ތަރައްގީ ކޮށްފައިވާ ފުޓްކޯޓްތަކުން ތަނެއް ކުއްޔަށް ނަގާ ފައިސާ ނުދައްކާ އޮތް މައްސަލަ އެކެވެ. އެތަނުގެ ކުއްޔާއި މެއިންޓަނަންސް ފީ އަދި ކުލީގެ ޖޫރިމަނާ އާއެކު އެސްޓީއޯއަށް 959،362ރ. ދައްކަން އޮތެވެ.
ކުލީގެ މައްސަލާގައި އެސްޓީއޯ އިން ނިހާން ގޮވައިގެން ކޯޓަށް ދިޔަ އެވެ. އަދި 2019 ވަނަ އަހަރު ސިވިލްކޯޓުން ވަނީ ނިހާންއާ ދެކޮޅަށް މައްސަލަ ނިންމާ އެ ފައިސާ ދެއްކުމަށް އަންގާފަ އެވެ. ނަމަވެސް ސިވިލްކޯޓުން އެ ހުކުމް ކުރީ ނިހާންގެ ޣައިރު ހާޒިރުގައި ކަމަށް ވުމުން އެ ނިންމުން ނިހާންގެ ފަރާތުން އޮތީ ހައިކޯޓަށް ގެންގޮސްފަ އެވެ.
އެ މައްސަލަ ކޯޓްގައި އޮއްވާ މައްސަލަ އަނބުރާ ވަނީ ނަގާފަ އެވެ. ނިހާން ވިދާޅުވި ގޮތުގައި މައްސަލަ އަނބުރާ ގެނައީ ކޯޓުން ބޭރުގައި މައްސަލަ ހައްލު ކޮށްފައިވާތީ އެވެ. އަދި އެސްޓީއޯއާ އެކު ވެފައިވާ އެއްބަސްވުމަކާއި އެއްގޮތަށް އެ ފައިސާ ދައްކާ މިހާރު ޚަލާސް ކޮށްފައިވާ ކަމަށް ވެސް ވިދާޅުވި އެވެ.
ސިޔާސީ މައިދާނުން ފެނުނު އެންމެ ވަރުގަދަ ޒުވާން ލީޑަރުންގެ ތެރޭގައި ވެސް ހިމެނޭ ނިހާން މިހާރު ހުންނެވީ ރައްޔިތުންގެ މަޖިލީހު އިދާރާގެ ބިއުރޯ ޗީފެއްގެ މަގާމުގަ އެވެ.
Advertisement
This content is created and paid for by advertisers and does not involve Voice Journalists
