ދިވެހިރާއްޖޭގެ މިނިވަންދުވަހުގެ މުނާސަބަތުގައި މިއަދު ބޭއްވި ދިދަ ނެގުމުގެ ނެގުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެ ވަޑައިގެންފިއެވެ.
މިނިވަންދުވަހުގެ މުނާސަބަތުގައި ދިދަނެގުމުގެ ރަސްމިއްޔާތު ކުރިއަށްގެންގޮސްފައިވަނީ މިއަދު ހެނދުނު 06:00 ގައި ޖުމްހޫރީ މައިދާނުގައެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ ދެކަނބަލުންގެ އަރިހުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދާއި، ރައްޔިތުން މަޖިލީހުގެ ރައީސް ޢަބްދުއްރަހީމް އަބްދުﷲ، ދައުލަތުގެ ވަޒީރުންގެ އިތުރުން ކުރިގެ ރައީސުލްޖުމްހޫރިއްޔާގެ މަގާމް އަދާކުރެއްވި ބޭފުޅުން ބައިވެރިވެ ވަޑައިގެންނެވިއެވެ.
ދިދަނެގުމުގެ ރަސްމިއްޔާތުގެ ތެރެއިން
މީގެ އިތުރުން މި ރަސްމިއްޔަތުގައި އެކިއެކި މުއައްސަސާތަކުގެ ބޭފުޅުންނާއި، ސްކޫލްތަކުގެ ދަރިވަރުންގެ އިތުރުން އާއްމު ރައްޔިތުންވެސް ބައިވެރިވިއެވެ. ދިދަ ނެގުމަށްފަހު ހާއްސަ ދުޢާއެއްވެސް ވަނީ ކޮށްފައެވެ. ދިދަ ނެގުމަށްފަހު ރައީސުލްޖުމްހޫރިއްޔާ ވަނީ ވަޑައިގެން ތިއްބެވި ބޭފުޅުންނާއި ސަލާމްކުރައްވާފައެވެ.
ދިދަނެގުމުގެ ރަސްމިއްޔާތުގެ ތެރެއިން
ފާހަގަކުރަމުން މިދަނީ ދިވެހިރާއްޖޭގެ ފަހުރުވެރި 60 ވަނަ މިނިވަންދުވަހެވެ. ކޮންމެ އަހަރެއްގެވެސް މިނިވަންދުވަހުގެ ހަރަކާތްތައް ރަސްމީގޮތުން ފެށެނީ ދިދަ ނެގުމުގެ ރަސްމިއްޔާތަށްފަހުއެވެ. މިނިވަންދުވަހުގެ ދިދަ ނެގުން މާލޭގެ އިތުރުން އަތޮޅުތެރޭގެ ރަށްތަކުގެ އިތުރުން ބޭރުގައުމުތަކުގައި ހުންނަ ދިވެހި އެމްބަސީތަކުގައިވެސް އޮންނާނެއެވެ.
ދިދަނެގުމުގެ ރަސްމިއްޔާތުގެ ތެރެއިން
ކޮންމެ އަހަރެއްގެވެސް ޖުލައިމަހުގެ 26 ވަނަ ދުވަސް ފާހަގަކުރަނީ ރާއްޖޭގެ މިނިވަންދުވަހުގެ ގޮތުގައެވެ. އެއީ އިނގިރޭސިންގެ ބާރުގެ ދަށުން ދިވެހިންނަށް ފުރިހަމަ މިނިވަންކަން ލިބުނު ދުވަހެވެ.
Advertisement
This content is created and paid for by advertisers and does not involve Voice Journalists
