ޗައިނާގެ ރައީސް ޝީ ޖިންޕިންގެ ފަރާތުން މިނިވަންދުވަހުގެ ތަހުނިޔާ، ރައީސް ޑރ.މުއިއްޒުއަށް ފޮނުއްވައިފި
ޗައިނާގެ ރައީސް ޝީ ޖިންޕިންގެ ފަރާތުން ދިވެހިރާއްޖޭގެ މިނިވަންދުވަހުގެ ތަހުނިޔާ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ފޮނުއްވައިފިއެވެ.
ރައީސް ޝީ ޖިންޕިންގެ މެސެޖްގައި ވަނީ ދިވެހިރާއްޖޭގެ މިނިވަންކަމަށް 60 އަހަރު ފުރޭ މި މުނާސަބާގެ ތަހުނިޔާ ރައީސުލްޖުމްހޫރިއްޔާގެ އިތުރުން ރާއްޖޭގެ ރައްޔިތުންނަށް ފޮނުވާފައެވެ. ރާއްޖެއާ ޗައިނާގެ ޒަމާންވީ ބަދަހި ގުޅުމަށް އިޝާރާތްކުރައްވައި ރައީސް ޝީ ވިދާޅުވީ، 1972 ވަނަ އަހަރުން ފެށިގެން ދެޤައުމުގެ ދެމެދުގައި ސިޔާސީގުޅުން ގާއިމްކުރެވުނުފަހުން މިވީ ދުވަސްތަކުގައި ދެޤައުމުގެ ގުޅުން ކުރިއަރައިގެން ގޮސްފައިވާކަމަށެވެ.
އެގޮތުން ރާއްޖެއާ ޗައިނާ އާ ދެޤައުމަކީ ސައިޒުގެ ގޮތުން ވަރަށް ތަފާތު ދެޤައުމަށްވީނަމަވެސް އެއްބަޔަކު އަނެއްބަޔަކަށް އިހުތިރާމުކުރާ ހާލު ދެޤައުމުގެ ގުޅުން ފާހަގަކުރެވިގެން ގޮސްފައިވަނީ ނަމޫނާ ދެޤައުމުގެ ގޮތުގައިކަމަށްވެސް ރައީސް ޝީ ވިދާޅުވިއެވެ. އަދި ރައީސް ޑޜ. މުއިއްޒު 2024 ވަނަ އެަހަރުެގ ޖެނުއަރީމަހުގެ ތެރޭގައި ޗައިނާއަށް ކުރެއްވި ޒިޔާރަާ ގުޅިގެން ދެޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެން ގޮސްފައިވާކަން ރައީސް ޝީ ވަނީ ފާހަގަކުރައްވާފައެވެ.
ޗައިނާގެ ރައީސް ވިދާޅުވީ އެޤައުމުން އަބަދުވެސް ދިވެހިންގެ ލާބައާ ކުރިއެރުމަށްހުރި ކަންކަމުގައި އަބަދުވެސް މަދަދުވެރިވާ ޤައުމެއްގެ ގޮތުގައި ދެމިއޮންނާނޭކަމަށެވެ.
ޗައިނާއަކީ ދިވެހިރާއްޖޭގެ އިގްތިސާދީ އަދި އުމްރާނީ ތަރައްޤީގެ މުހިއްމު ބައިވެރިއެކެވެ. ޗައިނާ ސަރުކާރުގެ އެހީގައި ރާއްޖޭގައި އިގްތިސާދީ އަދި އުމްރާނީ ތަރައްޤީގެ ބިޔަ މަޝްރޫޢުތަކެއް ވަނީ ކުރިއަށްގެންގޮސްފައެވެ. މިގޮތުން ޗައިނާ މޯލްޑިވްސް ފްރެންޑްޝިޕް ބްރިޖާއި، ބޯހިޔާވަހިކަމަށް ހުޅުމާލޭގައި ތަރައްޤީކޮށްފައިވާ ފްލެޓްތަކުގެ އިތުރުން ހައްދުންމަތީ ލިންކްރޯޑްގެ މަސައްކަތަކީ ޗައިނާ ސަރުކާރުގެ އެހީގައި ކުރިއަށްގެންގޮސްފައިވާ ފާހަގަކޮށްލެވޭ މަޝްރޫޢުތަކެވެ.
Advertisement
This content is created and paid for by advertisers and does not involve Voice Journalists
