ރައީސް ނަޝީދަކީ ރާއްޖެއާ އިންޑިއާގެ އެކުވެރިކަމަށް އަބަދުވެސް ވަކާލާތު ކުރައްވާ ބޭފުޅެއް: މޯދީ
ކުރީގެ ރައީސް މުހައްމަދު ނަޝީދަކީ ދިވެހިރާއްޖެއާ އިންޑިއާގެ އެކުވެރިކަމަށް އަބަދުވެސް ވަކާލާތު ކުރައްވާ ބޭފުޅެއްކަމަށް އިންޑިއާގެ ބޮޑުވަޒީރު، ނަރެންދްރަ މޯދީ ވިދާޅުވެއްޖެއެވެ.
މޯދީ މިހެން ވިދާޅުވެފައިވަނީ މިއަދު ރައީސް ނަޝީދާ ބައްދަލުކުރެއްވުމަށްފަހު އެކްސްގައި ކުރެއްވި ޕޯސްޓެއްގައެވެ. ދިވެހިބަހުން މޯދީ ކުރެއްވި މި ޕޯސްޓްގައި ވިދާޅުވެފައިވަނީ، ރައީސް ނަޝީދާއެކު ބޭއްވި ބައްދަލުކުރެއްވުމުގައި ނެއިބަރހުޑް ފަސްޓް’ ސިޔާސަތާއި ތަޞައްވުރުގެ އަގުހުރި ތަނބެއްގެ ގޮތުގައި އަބަދުވެސް ދިވެހިރާއްޖެ އޮންނަ އޮތުމާ ބެހޭގޮތުން ވާހަކަ ދެކެވުުނުކަމަށެވެ.
މޯދީ ވިދާޅުވީ އިންޑިއާއިން ދިވެހިރާއްޖެއަށް ކެޕޭސިޓީ ބިލްޑިންގ އާއި ޑިވެލޮޕްމަންޓް ކޯޕަރޭޝަންގެ ދާއިރާ މެދުވެރިކޮށް އެއްބާރުލުން ފޯރުކޮށްދެމުން ގެންދާނޭކަމަށެވެ.
އިންޑިއާގެ ބޮޑުވަޒީރު ރައީސް ނަޝީދާ ބައްދަލުކުރައްވާފައިމިވަނީ ރާއްޖޭގެ މިނިވަންކަމަށް 60 އަހަރު ފުރުން ފާހަގަކުރާ މުނާސަބާ ޝަރަފްވެރިކޮށްދެއްވުމަށް ވަޑައިގެންނެވި ދަތުރުފުޅުގެ ތެރެއިންނެވެ. މޯދީ ވިދާޅުވިފަދައިން ރައީސް ނަޝީދަކީ އިންޑިއާ އާ ވަރަށް ގާތް ގުޅުމެއް ބޭއްވުމަށް ޝައުގުވެރިކަން ހުންނަ ބޭފުޅެކެވެ. އެގޮތުން ރައީސް ނަޝީދުގެ ވެރިކަމުގައި ރާއްޖޭގެ އުމްރާނީ އަދި އިގްތިސާދީ ތަރައްޤީގެ މުހިއްމު ބޮޑެތި މަޝްރޫޢުތަކެއް ހިންގަން ވަނީ އިންޑިއާގެ ކުންފުނިތަކަށް ދީފައެވެ.
އެގޮތުން ދިވެހިންގެ މައި އެއާޕޯޓް އިންޑިއާގެ ޖީއެމްއާރަށް ދިންއިރު، ބޯހިޔާވަހިކަމުގެ މަޝްރޫޢުތައްވެސް އިންޑިއާގެ ކުންފުނިތަކަށް ދިންކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
