މިނިވަންދުވަހުގެ ހަރަކާތްތަކަށް ޖުމްހޫރީ މައިދާނުގެ ސަލާމަތީ ކަންކަން ވަރުގަދަ ކުރިނަމަވެސް، އިސްލާމީ މަރުކަޒަށް ނަމާދަށް އެރުމަށް އެއްވެސް ހުރަހެއް ހޯންނާނޭކަމަށް ދިވެހި ޤައުމީ ދިފާއީ ބާރުން ބުނެފިއެވެ.
އިސްލާމީ މަރުކަޒަށް މިސްކިތައް އެރުމަށް ސަލާމަތީ ބާރުތަކުން ފުރުސަތު ނުދޭކަމަށް ބައެއް ފަރާތްތަކުން ދައްކަމުްނގެންދާ ވާހަކަތަކާ ގުޅިގެން އެމްއެންޑީއެފުން ނެރުނު ބަޔާނުގައި ބުނެފައިވަނީ، މިނިވަންދުވަހުގެ މުނާސަބަތުގައި ބާއްވާ ހެވިކަމާއި ކުޅިވަރު ހަރަކާތްތަކާ ގުޅިގެން ޖުލައި 26 ހުން ފެށިގެން ހަރަކާތްތައް ނިމެންދެން ޖުމްހޫރީ މައިދާން ސަރަހައްދުގައި ސަލާމަތީ ފިޔަވަޅުތައް އަޅާފައިވާކަމަށެވެ.
އެމްއެންޑީއެފުން ބުނީ އެ ސަރަހައްދުގައި ސަލާމަތީ ފިޔަވަޅުތައް އެޅިނަމަވެސް އިސްލާމީ މަރުކަޒަށް ނަމާދަށް އަރައި ފޭބުމަށް އެ ސަރަހައްދަށް ފައިމަގުގައި ދަތުރުކުރުމަށް އެއްވެސް ފަރާތަކަށް ހުރަޖެއް ނޯންނާނެކަމަށެވެ.
ނަމަވެސް އެ ސަރަހައްދުެގ ޓްރެފިކް ފްލޯއަށް ގެނައި ބަދަލާ ގުޅިގެން އާއްމު އުޅަނދުފަަރަށް އެ ސަރަހައްދަށް ވަދެނިކުމުގައި ދަތިތަކެއް ދިމާވެދާނެތީވެ އެމްއެންޑީއެފުން ވަނީ މައާފަށް އެދިފައެވެ. އެމްއެންޑީއެފުން ވަނީ އިސްލާމީ މަރުކަޒަށް ނަމާދަށް އަންނަ ފަރާތްތަކުން އެސަރަހައްދުން ބޭރުގައި އުލަނދު ޕާކްކުރުމަށްފަހު ހިނގާފައި މިސްކިތަށް އައުމަށް ސަމާލުކަން ދިނުމަށް އެދިފައެވެ.
މިނިވަންދުވަހާ ގުޅިގެން ޖުމްހޫރީ މައިދާން ސަރަހައްދުގެ ސަލާމަތީ ކަންކަން އިންތިޒާމުކުރިގޮތުން ބައެއް ފަރާތްތަކުގެ ކަންބޮޑުވުން ފާޅުކޮށްފައިވާއިރު، މީގެ ކުރިންވެސް ޤައުމުތަކުގެ ވެރިން ރާއްޖެ ވަޑައިގަންނަވާ ދުވަސްދުވަހާއި، އެނޫންވެސް ޤައުމީ ފެންވަރުގެ ހަރަކާތްތައް ކުރިއަށްދާ ދުވަހެއްނަމަ، އެ ސަރަހައްދުގެ ސަލާމަތީ ކަންކަން ވަރުގަދަކޮށް އާއްމު އުޅަނދުތަކަށް ވަގުތީގޮތުން ބަންދުކުރެއެވެ.
Advertisement
This content is created and paid for by advertisers and does not involve Voice Journalists
