އެމްޑީޕީގެ ވެރިކަމެއްގައި ގެދޮރުވެރިޔާ ސްކީމްގެ ފްލެތްތަކުގެ އަގުތައް ކުޑަކޮށްދެއްވާނޭކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.

ރާއްޖެ ޓީވީގެ ޕްރޮގްރާމެއްގައި ވާހަކަދައްކަވަމުން ރައީސް ސޯލިހު ވިދާޅުވީ، އެމްޑީޕީން ކަނޑައަޅާފައި އޮތް އަގަށް ފްލެޓްތައް އާއްމުނަށް ދެވޭނޭކަމަށާއި، ޓަވަރުތައް އިމާރާތްކުރުން ލަސްވީވެސް ހެޔޮއަގުގައި އެކަންކޮށްދޭނެ ކޮންޓްރެކްޓަރުން ހޯދުމަ ގިނަ ވަގުތު ނެގުމުން ކަމަށެވެ.

ރައީސް ސޯލިހުގެ ސަރުކާރުން ނިންމާފައިވަނީ ގެދޮރުވެރިޔާ ސްކީމްގައި ހިމެނޭ 2 ކޮޓަރީގެ ފްލެޓެއް 6،000 ރުފިޔާ އަދި 3 ކޮޓަރީގެ ފްލެޓެއް 8،000 ރުފިޔާއަށް ދިނުމަށެވެ. ނަމަވެސް މި ސަރުކާރުން ވަނީ 7،000 ރުފިޔާ އަދި 3 ކޮތަރީގެ ފްލެޓެއް 9،000 ރުފިޔާއަށް ދިނުމަށް ނިންމާފައެވެ. މީގެ އިތުރުން އެޑްވާންސް ޕޭމަންޓްގެ ގޮތުގައި ވަނީ ދެ ކޮޓަރީގެ ފްލެޓުން 15،000 ރުފިޔާ އަދި 3 ކޮޓަރީގެ ފްލެޓަކުން 25،000 ރުފިޔާ ނެގުމަސް ނިންމާފައެވެ.

ރައީސް ސޯލިހު ވިދާޅުވީ އެމްޑީޕީ ސަރުކާރުގައި އެތަނަށް ވަންނަ ރައްޔިތުންގެ އަތުން އެޑްވާންސް ފީވެސް ނެގުމަށް ނިންމާފައި ނުވާނޭކަމަށާއި، މިކަމުގައި އެންމެ ރަނގަޅުގޮތަކަށް ވާނީ އެމްޑީޕީ ސަރުކާރުން އެ ފްލެޓްތައް ދިނުމަށް ނިންމާފައިވާގޮތަށް އެތަންތައް ރައްޔިތުންނަށް ދިނުންކަމަށެވެ. މީގެ އިތުރުން ފްލެޓަށް ވަންނަތާ 3 މަސްދުވަސްފަހުން ކުލި ނަގާގޮތަށް ހަމަޖައްސާފައިވަނީ، ފްލެޓަށް ވަންނަ މީހުން އެތަނަށް ވަނުމަށްޓަކައި ހަރަދުތަކެއް ކުރަންޖެހޭނެތީކަމަށްވެސް ރައީސް ސޯލިހް ފާހަގަކުރެއްވިއެވެ.

ރައީސް ސޯލިހް ވިދާޅުވީ، މިހާރު ކަންކަން ވަމުންދާ ގޮތުން ރައްޔިތުންގެ ހިތުގައި ދައުލަތަށް އޮންނަ އިތުބާރު ނެތިގެން ދިއުމުގެ ފުރުސަތު އެބައޮތްކަމަށެވެ. ރައީސް ސޯލިހު ވިދާޅުވީ އިރާދަކުރެއްވިއްޔާ 2028 ވަނަ އަހަރު އެމްޑީޕީން ވެރިކަމަށް އައިސް ގެދޮރުވެރިޔާގެ ފްލެޓްތައް ކުރިން އިއުލާނުކޮށްފައިވާ އަގަށް ރައްޔިތުންނަށް ހެޔޮކޮށްދެއްވާނޭ ކަމަށެވެ.

ގެދޮރުވެރިޔާ ސްކީމްގެ ފްލެޓްތަކުގެ އެގްރީމަންޓްތަކުގައި ސޮއިކުރަން ފަށާފައިވާއިރު، ސޮއިކުރުމުގެ ކަންކަން ސެޕްޓެމްބަރުމަހަށް ނިންމާލެވޭނޭކަމަށް ހައުސިން މިނިސްޓްރީން ވަނީ ބުނެފައެވެ.

ގެދޮރުވެރިޔާ ސްކީމުގެ ދަށުން ތަރައްޤީކުރަމުންދާ 4000 ސޯޝަލް ހައުސިންގ ޔުނިޓް މަޝްރޫޢުގައި 16 ޓަވަރު ހިމެނޭއިރު، 96 އިންސައްތަ މަސައްކަތް ނިމިފައިވާކަމަށް ފަހިދިރިއުޅުން ކޯޕަރޭޝަނުން ބުނެއެވެ.