ރާއްޖޭގެ މިނިވަންކަމަށް 60 އަހަަރު ފުރުމުގެ މުނާސަބަތުގައި ރާއްޖޭގެ ހުރިހާ ރައްޔިތުންނަށް މިނިވަންދުވަހުގެ ތަހުނިޔާއާއި މުބާރަކުބާދީ އަރިސްކުރެއްވުމާއެކު، ރާއްޖެއަށް ފުރިހަމަ މިނިވަންކަން އިއާދަވުން އެދިވަޑައިގެން ކުރީގެ ރައީސުލްޖުމްހޫރިއްޔާ ރައީސް އަބްދުﷲ ޔާމީނު ވިދާޅުވެއްޖެއެވެ.
މިނިވަންދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ޔާމީނު ވިދާޅުވީ ދިވެހިރާއްޖޭގެ 60 ވަނަ މިނިވަންދުވަހުގެ ތަހުނިޔާއާއި މުބާރަކުބާދީ ހުރިހާ ރައްޔިތުންނަށް އަރިސްކުރައްވާ ކަމަށެވެ. އެއަށްފަހު އެމަނިކުފާނުގެ ޕޯސްޓުގައި ރާއްޖެ ތާއަބަދު މިނިވަންކަންމަތީ ދެމެހެއްޓެވުން އެދިވަޑައިގެން ދުއާކުރެއްވުމާއެކު، ރާއްޖެއަށް ފުރިހަމަ މިނިވަންކަން އިއާދަކޮށްދެއްވުން އެދިވަޑައިގެން ދުއާކުރެއްވިއެވެ.
މީގެ ކުރިން ރައީސް ޔާމީނުގެ ޕީޕަލްސް ނޭޝަނަލް ފްރަންޓުން ބޭއްވި ޖަލްސާއެއްގައި ވާހަކަދައްކަވަމުން ރައީސް ޔާމީނު ވިދާޅުވެފައިވަނީ، ރާއްޖެއަކީ ފުރިހަމަ މިނިވަންކަން ލިބިފައި އޮތް ގައުމެއް ކަމުގައި ގަބޫލުނުކުރައްވާ ކަމަށެވެ. އެގޮތުން ރާއްޖޭގެ ހާރިޖީ އަދި ދާހިލީ ކަންކަމުގެ މައްޗަށް އިންޑިޔާއިން ނުފޫޒު ފޯރުވާކަމަށް ތުހުމަތުކުރައްވައި އެމަނިކުފާނު ވާހަކަފުޅުދެއްކެވިއެވެ.
ރައީސް ޔާމީނުގެ ވެރިކަން ނިމުނު ހިސާބުން ފެށިގެން އެމަނިިކުފާނު ގެންދަވަނީ ރާއްޖޭގެ ދާހިލީ ކަންކަމުގެ ތެރެއަށް އިންޑިޔާއިން ނުފޫޒު ފޯރުވަމުންދާކަމަށް ތުހުމަތުކުރައްވައި، ރާއްޖޭގެ މިނިވަންކަމަށް އިންޑިޔާގެ ސަބަބުން އުނިކަން ލިބޭކަމަށް ވިދާޅުވެ، އިންޑިޔާއާ ދެކޮޅަށް އަޑުއުފުއްލަވަމުންނެވެ.
އަދި ރާއްޖޭގައި ތިބި އިންޑިޔާ ސިފައިން ބޭލުމަށް ގޮވައިލާ އެއިރު އިދިކޮޅު ކޯލިޝަނުން ކުރިއަށްގެންދިޔަ ހަރަކާތްތަކުގެ އެންމެ ކުރީ ސަފުގައި ހުންނެވީ ރައީސް ޔާމީނެވެ. ވެރިކަން ބަދަލުވުމަށްފަހުވެސް އިންޑިޔާައާއެކު އައު ސަރުކާރުން ދަމަހައްޓަމުންދާ ގުޅުމަށް އެމަނިކުފާނު ގެންދަވަނީ ފާޑުވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
