އަވައްޓެރި ސްރީލަންކާއިން ދިވެހިންނަށް ދޭ ވިސާގެ މުއްދަތު އަހަރުދުވަހަށް އިތުރުކުރުމަށް ނިންމާފައިވާކަމަށް އެޤައުމުގެ ހާރިޖީ ވަޒީރު ވިޖިތް ހެރަތް ވިދާޅުވެއްޖެއެވެ.

ލަންކާގެ ނޫހެއްކަމަށްވާ އިކޮނޮމީ ނެކްސްޓްގައި ހާރިޖީ ވަޒީރު ވިދާޅުވެފައިވަނީ، ދިވެހިންނަށް ވިސާދެނީ ވަރަށް ކުރު މުއްދަތަކަށް ކަމަށާއި ބައެއް ކަންކަމަށް ބެލުމަށްފަހު ވިސާގެ މުއްދަތު އިތުރުކޮށްދިނުމަށް ނިންމާފައިވާކަމަށެވެ. އޭނާ ވިދާޅުވީ އަންނަ އޮގަސްޓްމަހުގެ އެއްވަނަ ދުވަހުން ފެށިގެން ދިވެހިންނަށް ލަންކާއިން އެއް އަހަރުދުވަހުގެ ވިސާ ހަމަޖައްސައިދޭނޭ ކަމަށެވެ.

އެއްދުވަސްވަރެއްގައިނަމަ، ލަނަްކާއަކީ ދިވެހިން އެންމެގިނައިން އެޤައުމަކަށް ޒިޔާރަތްކުރާ ގައުމެވެ. ނަމަވެސް ލަންކާގެ ހާލަތަށް ތަފާތު އެކިފަހަރުމަތިން ކުރިމަތިވި ކަންތައްތަކާ ގުޅިގެން ދިވެހިްނ އެޤައުމަށް ޒިޔާަރތްކުރަމުން އަންނަ އަދަދަދު ވަރަށްބޮޑަށް ދަށްވެފައިވާކަން ހެރަތް ފާހަގަކުރެއްވިއެވެ.

ދިވެހިންނަށް އޮންއެރައިވަލް ވިސާގައި ލަންކާއަށް ދެވޭއިރު، 30 ދުވަސް އެޤައުމުގައި މަޑުކުރުމަށް ލިބެއެވެ. 

ސްރީލަންކާގެ ރައީސް އަނޫރާ ކުމާރަ ޑިސަނަޔަކަ ރަސްމީ ދަތުރުފުޅެއްގައި އަންނަ ހޯމަދުވަހު ރާއްޖެ ވަޑައިގަތުމަށް ވަނީ ހަމަޖެހިފައެވެ. މި ދަތުރުފުޅުގައި މިކަމާ ބެހޭ އިތުރު މައުލޫމާތުތައް ހާމަކުރަނޭކަމަށް ލަންކާގެ މީޑިއާއިން ބުނެއެވެ. 

ތަފާސްހިސާބަށް ބަލާއިރު، ޖޫންމަހުގެ ނިޔަލަށް ފަތުރުވެރިންގެ ގޮތުގައި ލަންކާއަށް ޒިޔާރަތްކުރި ދިވެހިންގެ އަދަދު އުޅެނީ 16,453 ގައެވެ. 2019 ވަނަ އަހަރު އީސްޓާ ބޮމުގެ ހާދިސާ އާއި އަދި އެޤައުމަށް މިފަހުން ކުރިމަތިވި އިގްތިސާދީ ހީނަރުކަމާއެކު ސްރީލަންކާގައި ދިރިއުޅެމުން އަންނަ ދިވެހިންގެ އަދަދު ވަނީ ވަރަށްބޮޑަށް ދަށަށްގޮސްފައެވެ. އަދި ވިޔަފާރިއާއި ސިއްހީކަންކަމުގެ އިތުރުންވެސް އެނޫންވެސް ބޭނުންތަކުގައި އެޤައުމަށް ޒިޔާރަތްކުރާ ދިވެހިްނގެ އަދަދުވެސް ވަނީ ދަށްވެފައެވެ.

މީގެ ކުރިން ސްރީލަންކާ ފާހަގަކުރެވިފައިވަނީ ބޭރު ގައުމެއްގައި އެންމެގިނަ ދިވެހިން އުޅޭ ޤައުމުގެ ގޮތުގައެވެ.