މިރޭ ބޭއްވި ކުލަގަދަ ރަސްމިއްޔާތެއްގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލް ހުޅުވައިފި އެވެ.

ވީއައިއޭގެ އާ ޓާމިނަލް ކުރިމަތީ މިރޭ އޮތް ކުލަގަދަ ރަސްމިއްޔާތުގައި މި ޓާމިނަލް ހުޅުވުމުގެ ގޮތުން ޚާއްސަ ޑްރޯން ޝޯ އަކާއި ހަވާ އެރުވުމުގެ ކުލަގަދަ ހަރަކާތަކުންނެވެ. ވީއައިއޭގެ އާ ޓާމިނަލް ކުލަތަކުން ދިއްލާލުން ވެސް އޮތެވެ.

އާ ޓާމިނަލް ހުޅުއްވައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެވެ. މިރޭ އޮތް ރަސްމިއްޔާތުގައި އެމަނިކުފާނު ވަނީ އެއާޕޯޓްގެ މަސައްކަތް ނިންމާލުމަށް މަސައްކަތް ކޮށްދެއްވި ހުރިހާ ފަރާތްތަކަށް ޝުކުރު އަދާކުރައްވާފަ އެވެ.

ވީއައިއޭގެ އާ ޓާމިނަލް ހުޅުވުން --

ޓާމިނަލް ހުޅުވުމުގެ އުފަލުގައި ކުރިއަށް ގެންދިޔަ ޑްރޯން ޝޯ ގައި މިނިވަން ދުވަހާއި ގުޅުން ހުރި އެކިއެކި މަންޒަރުތައް ޑިސްޕްލޭ ކޮށްފައިވެ އެވެ. އަދި ހަވާ އެރުވުމުގެ ހަރަކާތްތައް އެއާޕޯޓްގެ ތިން ސަރަހައްދަކާއި މާލެ ވަށައިގެން 16 ސަރަހައްދެއްގައި ކުރިއަށް ގެންގޮސްފައިވެ އެވެ.

ވީއައިއޭގެ އާ ޓާމިނަލް ހުޅުވުން -- ފޮޓޯ: ވޮއިސް

އާ ޓާމިނަލް ހުޅުވުމަށް ފަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ މި ރަސްމިއްޔާތުގައި ބައިވެރިވެވަޑައިގެންނެވި އިއްޒަތްތެރީން ވަނީ އާ ޓާމިނަލް ބައްލަވާލައްވާފަ އެވެ.

މީގެ 10 އަހަރު ކުރީން ކުރީގެ ރައީސް ޔާމީންގެ ވެރިކަމުގައި ފެށި މަޝްރޫއު ނިންމުމަށް ފަހުން އޮތީ މީގެ ދޮޅު އަހަރު ފަހަށް 2027 ގަ އެވެ. ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމަށް ވަޑައިގެން އެ މަޝްރޫއުގެ މަސައްކަތް ހަލުވި ކުރެއްވި އެވެ.

އަދި ދޮޅު އަހަރުތެރޭ ބާކީ މަސައްކަތް ވަނީ ނިންމާލާފަ އެވެ.

ވީއައިއޭގެ އާ ޓާމިނަލް ހުޅުވުން -- ފޮޓޯ: ވޮއިސް

މި ޓާމިނަލް ވެގެންދާނީ މިހާރު ބޭނުންކުރަމުން އަންނަ ޓާމިނަލްއަށްވުރެ އެތައްގުންއެއް ބޮޑު، އަހަރެއްގެ މައްޗައް 7.5 މިލިއަން ދަތުރުވެރިންނަށް ހިދުމަތްދެވޭނެ ތަނަވަސް ޓާމިނަލަކަށެވެ.

އެގޮތުން، އެއިރޯ ބްރިޖާއި، ސެލްފް ޗެކިންގ ސިސްޓަމާއި، އޮޓޯމެޓިކް ބެގޭޖް ހޭންޑްލިންގ ސިސްޓަމްގެ އިތުރުން އެޑްވާންސް ވިޝުއަލް ޑޮކިންގ ގައިޑެންސް ސިސްޓަމްތަކުގެ ހިދުމަތް އައު ޓާމިނަލުން ލިބިގެންދާނެ އެވެ.

ރާއްޖޭގެ ތާރީހާއި ސަގާފަތާއި ދީނީ ތަރިކަ ރަމްޒުކޮށްދޭ ހިރިގަލުގެ ފަންނުވެރި ކެނޑުންތަކުން ފަރުމާކޮށްފައިވާ އައު ޓާމިނަލްގައި، ރާއްޖޭގެ ހިތްގައިމު ކަނޑުގެ މަންޒަރުތަކާއި ޤުދުރަތީ ރީތި ރަށްތަކުގެ ނަލަކަމާއި ކުލަތައް ހިމަނާފައިވެއެވެ. މި ޓާމިނަލުގައި 47 ޗެކިން ކައުންޓަރާއި، 6 ސެލްފް ސާވިސް ކައުންޓަރާއި، 20 ޑިޕާޗާ އިމިގްރޭޝަން ކައުންޓަރާއި 6 ޕެސެންޖާ ބޯޑިން ގޭޓާއި 12 އޭރޯ ބްރިޖް ހުރެ އެވެ.

ވީއައިއޭގެ އާ ޓާމިނަލް ހުޅުވުން -- ފޮޓޯ: ވޮއިސް

ވީއައިއޭ އާ ޓާމިނަލަށް 457 މިލިއަން ޑޮލަރު (ހަތް ބިލިއަން ރުފިޔާ) ވަނީ ހަރަދުކޮށްފަ އެވެ. އާ ޓާމިނަލަށް ފަންޑު ދިނީ ސަޢޫދީ ފަންޑް ފޯ ޑިވެލޮޕްމަންޓާއި، އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމަންޓާއި، ކުވައިތު ފަންޑް ފޯ އަރަބް އިކޮނޯމިކް ޑިވެލޮޕްމަންޓާއި، އަބޫދާބީ ފަންޑް ފޯ ޑިވެލޮޕްމަންޓުންނެވެ.

ވެލާނާ އިންޓާނޭޝަނަލް އެއާޕޯޓުގެ ކުރީގެ ޓާމިނަލް ހުޅުވީ 1981 ވަނަ އަހަރުގަ އެވެ.