އިންދިރާ ގާނދީ މެމޯރިއަލް ހޮސްޕިޓަލް، އައިޖީއެމްއެޗްގައި އައިނު ފިހާރަ ހުޅުވާ ހިލޭ އައިނު ހެއްދޭނެ އިންތިޒާމު މިއަދު ހަމަޖައްސައިފި އެވެ.

އައިޖީއެމްއެޗްގައި ބޭއްވި ރަސްމިއްޔާތެއްގައި އައިނު ފިހާރަ ހުޅުވައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. އެމަނިކުފާނު ވަނީ އައިޖީއެމްއެޗްގެ އައިނު ފިހާރަ -- އެމްސީޖީއެޗް އޮޕްޓިކަލް ހުޅުވައި ދެއްވުމަށް ފަހު ފުރަތަމަ ތިން ކަސްޓަމަރުންނަށް އައިނު ވެސް ހަވާލުކޮށް ދެއްވާފަ އެވެ.

އައިނު ހެއްދުމަށް އާސަންދައިން ދޭ އަދަދު ބޮޑުކޮށް، ކުރިއަށްއޮތް ތަނުގައި އޭގެ ނާޖާއިޒްފައިދާ އަމިއްލަ ކުންފުނިތަކުން ނެގިޔަ ނުދިނުމަށް، އައިނު ހެއްދުމުގެ ހިދުމަތް ސަރުކާރު ހޮސްޕިޓަލްތަކުން ލިބޭނޭ އިންތިޒާމް ހަމަޖައްސަވާނޭކަމަށް ރައީސް ޑރ މުޙައްމަދު މުޢިއްޒު ވަނީ މެއި މަހު އިއުލާން ކުރައްވާފައެވެ.

އެމްސީޖީއެޗް އޮޕްޓިކަލް ހުޅުވައި ދެއްވުމަށް ފަހު ފުރަތަމަ ތިން ކަސްޓަމަރުންނަށް އައިނު ހަވާލުކުރުން -- ވޮއިސް 

އެ އިއުލާނަށް ދެ މަސްދުވަސްތެރޭ އައިޖީއެމްއެޗްގައި އައިނު ފިހާރަ ގާއިމުކޮށް މިއަދު މި ވަނީ ހިދުމަތް ދޭން ފަށާފަ އެވެ. އެ ހޮސްޕިޓަލުން ބުނި ގޮތުގައި އެމްސީޖީއެޗް އޮޕްޓިކަލް ގައި ހުންނާނީ ވަރަށް އެެޑްވާންސް މެޝިނަރީޒް އެވެ. އަދި އައިނު ހެއްދުމާއި ލެންސް ލައްވައި ދިނުމާއި ލޮލުގެ ޕްރެޝަރު ބެލުމާއި ގްލޮކޮމާ ފަދަ ބަލިތައް ދެނެގަނެވޭނެ އިންތިޒާމު ވަނީ ހަމަޖެހިފަ އެވެ.

މާލޭ ސިޓީ ގްރޫޕް އޮފް ހޮސްޕިޓަލްސްގެ މެނޭޖިން ޑިރެކްޓަރު އަބްދުއްރައްޒާގް ހަލީމް ވިދާޅުވި ގޮތުގައި މިއަދުން ފެށިގެން އާސަންދައިން ކަވަރު ކުރާ 2000 ރުފިޔާގެ ތެރެއިން ކޮންމެ ރައްޔިތަކަށް ވެސް ހިލޭ އައިނު ހެއްދޭނެ އިންތިޒާމު ވަނީ ހަމަޖެހިފަ އެވެ.

އަދި ވިދާޅުވީ އަންނަ މަހު ހުޅުމާލޭގައި އައިނު ފިހާރަ ހުޅުވާ ހިދުމަތްދޭން ފަށާނެ ކަމަށެވެ. މީގެ އިތުރުން ހުރިހާ ރީޖަނަލް ހޮސްޕިޓަލްގައި ވެސް އައިނުގެ ހިދުމަތް ފޯރުކޮށްދޭނެ ކަމަށް ވިދާޅުވި އެވެ.

ރައްޔިތުން ބޮޑުއަގުގައި ނަމްބަރުއައިނު ހައްދަމުންގެންދާ މައްސަލަ ހައްލު ކުރުމަށް އާސަންދައިގެ ފަރާތުން ކަވާ ކޮށްދެމުން އަންނަ 1،000 ރުފިޔާގެ އަދަދު 2،000 ރުފިޔާއަށް ބޮޑުކުރަން ސަރުކާރުން ވަނީ ނިންމާފައެވެ. 

އާސަންދައިގެ ތަފާސްހިސާބުތަކަށް ބަލާއިރު ނިމިދިޔަ 2024 ވަނަ އަހަރުގެ ތެރޭގައި އައިނު ހެއްދުމަށް 36000 އަށްވުރެ ގިނަ މީހުންނަށް އާސަންދައިގެ ތެރެއިން 36 މިލިއަނަށްވުރެ ގިނަ ރުފިޔާވަނީ ދޫކޮށްފައެވެ. އައިނުގެ ހިދުމަތްދޭ އަމިއްލަ ތަންތަނުން ވަރަށް ބޮޑު މާލީ މަންފާއެއް ހޯދަމުންދާ ކަމުގެ ތުހުމަތު އަބަދުވެސް އޮވެ އެވެ.