ރައީސުލްޖުމްހޫރިއްޔާގެ ދައުވަތަކަށް އަވައްޓެރި ސްރީލަންކާގެ ރައީސް އަނުރަ ކުމާރަ ދިސާނަޔަކަ ރާއްޖެ ވަޑައިގަންނަވައިފިއެވެ.
ވެލާނާ އިންޓަރނޭޝަނަލް އެއާޕޯޓުން ލަންކާގެ ރައީސްއަށް މަރުހަބާ ދެންނެވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުއެވެ. ލަންކާ ރައީސްގެ މި ދަތުރުފުޅަކީ އެމަނިކުފާނު މަގާމާ ހަވާލުވެ ވަޑައިގެންނެވުމަށްފަހު ރާއްޖެއަށް ކުރެއްވި ފުރަތަމަ ދަތުރުފުޅެވެ. މި ދަތުރުފުޅުގައި ރައީސް އަނުރަ ކުމާރަ ރާއްޖޭގައި ދެ ދުވަހު މަޑުކުރައްވާނައެވެ.
މި ދަތުރުފުޅުގެ ތެރެއިން ކުރުމަށް ހަމަޖެހިފައިވާ ރަސްމީ މަޝްވަރާތައް ރައީސުލްޖުމްހޫރިއްޔާގެ އޮފީހުގައި މިއަދު ބޭއްވުމަށް ވަނީ ހަމަޖެހިފައެވެ.
އެގޮތުން އެކި ދާއިރާތަކުން ދެޤައުމުގެ މެދުގައި އެއްބަސްވުންތައް އެކުލަވާލުމަށްވެސް ވަނީ ހަމަޖެހިފައެވެ. މީގެ ތެރޭގައި ވިސާގެ ކަންކަމުގައި ދިވެހިންނަށް ފަސޭހަވާނޭ އެއްބަސްވުމެއް ހިމެނޭޭކަމަށް ލަންކާގެ ނޫސްތަކުން ވަނީ ބުނެފައެވެ.
ސްރީލަންކާއަކީ ދިވެހިރާއްޖެއާ އެންމެ ކައިރީގައި އޮންނަ އަދި އެންމެ އަވައްޓެރި ޤައުމެވެ. ދިވެހިރާއްޖެއާ ސްރީލަންކާއާ ދެމެދު ސިޔާސީގުޅުން ގާއިމްކުރިތާ 60 އަހަރު ފުރިގެން ގޮސްފައިވާއިރު، ރާއްޖެއަށް މިނިވަންކަން ލިބުމަށްފަހު އެންމެ ފުރަތަމަ ސިޔާސީގުޅުން ގާއިމްކުރި އެއް ޤައުމަކީ ލަންކާއެވެ.
Advertisement
This content is created and paid for by advertisers and does not involve Voice Journalists
