ރައީސް ޑރ.މުއިއްޒުގެ ވައުދުފުޅާ އެއްގޮތަށް ބ.އަތޮޅުގައި އާރުޓީއެލް ހިދުމަތް ފަށައިފި
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވައުދުފުލާ އެއްގޮތަށް ބ.އަތޮޅަށް އާރުޓީއެލްގެ ހިދުމަތް މިއަދު ފަށައިފިއެވެ.
އެމްޓީސީސީން ވަނީ އާރުޓީއެލްގެ ހިދުމަތް ބ.އަތޮޅުގެ ރަށްތަކަށް ފެށިކަން ރަސްމީކޮށް މިއަދު އާއްމުކޮށް އިއުލާނުކޮށްފައެވެ. މިއީ އެމްޓީސީސީން އާރުޓީއެލްގެ ހިދުމަތްފެށި 11 ވަނަ އަތޮޅެވެ.
މިދިޔަ ޖޫންމަހު ރ އަތޮޅަށް އާރުޓީއެލްގެ ހިދުމަތް ފެށުމާ ގުޅިގެން އެކްސްގައި ކުރެއްވި ޕޯސްޓުގައި ރައީސް ޑރ.މުއިއްޒު ވިދާޅުވެފައިވަނީ ޖުލައިމަސް ނިމުމުގެ ކުރިން ބ.އަތޮޅަށް އާރުޓީއެލްގެ ހިދުމަތް ދޭން ފަށާނޭކަމަށެވެ.
ބ.އަތޮޅުގައި އާރުޓީއެލްގެ ހިދުމަތް ދިނުމުގައި މިވަގުތަށް 2 ލޯންޗް ބޭނުންކުރާނޭކަމަށް އެމްޓީސީސީން ވަނީ ބުނެފައެވެ. އެމްޓީސީސީން ބުނެފައިވަނީ ފުރަތަމަ ކުރާނީ އަހުލުވެރިވުމަށް ކުރާ ދަތުރުތައް ކަމަށާއި، މިދަތުރުތަކަށް ރައްޔިތުން އަތުން ފީ ނުނަގާނޭކަމަށެވެ. އާރުޓީއެލް ފެރީގެ ފީ ނަގާނީ އަންނަ އޮގަސްޓްމަހުގެ 4 ވަނަ ދުވަހުން ފެށިގެންކަމަށްވެސް އެމްޓީސީސީން ވަނީ ބުނެފައެވެ.
އާރުޓީއެލް ފެށުމުގެ ކުރިން އެމްޓީސީސީން ކުރިއަށްގެންދިޔަ ޕްރޮގްރާމެއް..
ބ.އަތޮޅަށް އާރުޓީއެލްގެ ހިދުމަތް ފެށުމާ ގުޅިގެން ދަތުރުފަތުރާ ބެހޭ ވުޒާރާއިން ބުނީ މި ހިދުމަތާއެކު ބ. އަތޮޅުގައި އެއަރޕޯރޓް ގާއިމްކޮށްފައިވާ 1 ރަށް ހިމެނޭހެން މީހުން ދިރިއުޅޭ 13 ރަށް ގުޅާލެވިގެންދާނޭކަމަށެވެ.
އެމްޓިސީސީން ބ.އަތޮޅުގެ ރަށްތަކުގައި އާރުޓީއެލް ފެރީގެ ހިދުމަތް ހަފްތާގެ 6 ދުވަހު ދިނުމަށް ވަނީ ނިންމާފައެވެ. އާރުޓީއެލްގެ ހިދުމަތް ބ.އަތޮޅުގައި ފެށިެގްނދިޔައިރު، އެންމެފަހުން މި ހިދުމަތް ފަށާފައިވަނީ ރ.އަތޮޅުގައެވެ. ބ.އަތޮޅުގައި އާރުޓީއެލްގެ ހިދުމަތް ފެށިގެންދިޔައިރު، މިއަހަރު ނިމުމުގެ ކުރިން ދެންހުރި ހުރިހާ އަތޮޅަކަށް އެ ހިދުމަތް ފެށިގެންދާނޭކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
