ކޮރަޕްޝަން ކުޑަކުރުމަށް ފައްޔާޒުގެ ހުށަހެޅުން؛ ޕްރޮކިއުމެންޓަށް ހާއްސަ އިދާރާއެއް އުފެއްދުން
ދައުލަތުގެ އިދާރާތަކުގެ ތެރެއިން ހިނގާ ކޮަރަޕްޝަނުގެ އަމަލުތައް މަދުކުރުމަށްޓަކައި ސަރުކާރުގެ ވުޒާރާތަކާއި އިދާރާތަކުގެ ތެރެއިން ޕްރޮކިއުމެންޓު ވަކިކޮށް މަރުކަޒީ ޕްރޮކިއުމެންޓު އިދާރާއެއް އުފެއްދުމަށް އެމްޑީޕީގެ ޗެއާޕާސަން ފައްޔާޒު އިސްމާއީލު ހުށަަހަޅުއްވައިފިއެވެ.
ރާއްޖެއަށް ގެންނަންޖެހޭ ސިޔާސީ އިސްލާހުތަކާމެދު ވާހަކަދެއްކުމަށް ގެނެސްދޭ ޕްރޮގުރާމު "ރިބޫޓް"ގެ ފުރަތަމަ އެޕިސޯޑުގައި ފައްޔާޒުވަނީ ރާއްޖޭގައި ހުރި ބައެއް މައްސަލަތައް ހައްލުކުރުމަށް އޭނާ ގެންގުޅުއްވާ ވިސްނުންފުޅުތަކާމެދު ވަރަށް ތަފުސީލުކޮށް ވާހަކަފުޅުދައްކަވާފައެވެ.
އެގޮތުން ސަރުކާރުގެ ވުޒާރާތަކާއި އިދާރާތަކުން ހިންގާ އެކިއެކި މަޝްރޫއުތަކުގެ ތެރެއިން ކޮރަޕްޝަނާއި ފަސާދައިގެ އަމަލުތައް ހިންގާކަމަށް ތުހުމަތުވާކަން ފާހަގަކުރެއްވިއެވެ. އެ ޕްރޮގުރާމު ހުށަހެޅުއްވި އުނގޫފާރު ދާއިރާގެ ކުރީގެ މަޖިލިސް މެންބަރު މުހައްމަދު ވަހީދު ހިމެނިވަޑައިގަންނަވާހެން އެމްޑީޕީގައި ތިއްބެވި ބައެއް ބޭފުޅުން އޭނާ ވަޒީރުކަމުގައި ހުންނެވިއިރު ވައްކަމުގެ ތުހުމަތުތައް އޭނާއަށް އަމާޒުކުރެއްވިކަން ފައްޔާޒު ފާހަގަކުރެއްވިއެވެ.
ފައްޔާޒު ވިދާޅުވި ގޮތުގައި ނިޒާމު މިހާރު އޮތް ގޮތުން ކޮރަޕްޝަނުަގައި ބައިވެރިނުވާ މީހުންނަށްވެސް ތުހުމަތުތަކުން ސަލާމަތްވެވޭނެ ގޮތްތަކެއް ނެތެވެ. އަދި އޭނާ ވިދާޅުވި ގޮތުގައި މަޝްރޫއުތަކާ ގުޅިގެން ސަރުކާރުތަކަށް ކޮރަޕްޝަނުގެ ތުހުމަތުތައް އަމާޒުވަނީ މަޝްރޫއުތަކުގެ ތެރެއިން ކޮރަޕްޝަން ހިންގާފައިވާތީއެވެ. އެހެންނަމަވެސް ބައެއް ފަހަރު ސިޔާސީ ބޭނުމަށްވެސް ކޮރަޕްޝަނުގެ ތުހުމަތު އަމާޒުވާކަމަށްވެސް ވިދާޅުވިއެވެ.
ކޮރަޕްޝަން މަދުކުރުމަށް ކުރެވިދާނެ ކަމެއްގެ ގޮތުގައި ފައްޔާޒު ފާހަގަކުރެއްވީ، ޓެންޑަރިން އަދި ޕްރޮކިއުމެންޓު ނިޒާމަށް ރަނގަޅު ބަދަލުތަކެއް ގެނައުމެވެ. އޭނާ ހުށަހެޅުއްވީ، މަރުކަޒީ ނިޒާމެއް ގާއިމުކޮށް، މިނިސްޓްރީތަކާއި އިދާރާތަކުން ޓެންޑަރ އިވެލުއޭޓުކުރުމުގެ ބަދަލުގައި އެ އިދާރާއިން އެ މަސައްކަތްކުރުމެވެ.
އޭގެ އިތުުރުަށް ރަށްރަށުގައި ސަރުކާރުން ހިންގުމަށް ކަނޑައަޅާ ތަރައްގީގެ މަޝްރޫއުތަކުގެ ބަޖެޓު ކައުންސިލުތަަކަށް އެއްކޮށް ދޫކޮށްލުމަށްވެސް ފައްޔާޒު ހުށަހަޅުއްވައެވެ.
ފައްޔާޒުގެ ހިޔާލުގައި ރަށްރަށުގައި މަޝްރޫއުތައް ހިންގުމުަގައި ސަރުކާރުގެ ދައުރަކަށް ވާންޖެހެނީ މަޝްރޫއުތައް ހިންގަން ކައުންސިލުތަކުން ހުށަހެޅުމުން ބަޖެޓު ހަމަޖައްސައިދިނުމެވެ. އެއަށްފަހު އެ މަސައްކަަތްތައް ކުރިއަށްގެންދިއުން ކައުންސިލުތަކަށް ދޫކޮށްލުމަކީ އެންމެ ރަނގަޅު ގޮތްކަމަށްވެސް އޭނާ ދެކެވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
