ބޮޑެތި އަދަބުތަކެއް ދެވޭގޮތަށް އެކުލަވާލާފައިވާ ގޭންގު ކުށްތަކާ ބެހޭ ޤާނޫނުގެ ދަށުން ފުރަތަމަ ފަހަރަށް ބައެއް ވަނަވަރު ފުލުހުން އާއްމުކޮށްފިއެވެ.
ފުލުހުން އާއްމުކޮށްފައިވަނީ، މިދިޔަ ބުދަދުވަހު މާލެތެރޭގައި ހިންގި އޮޕަރޭޝަނެއްގައި އަތުލައިގަތް މީހުންގެ ވަނަވަރެވެ. އެމީހުން އަތުލައިގަނެފައިވަނީ، އިންތިޒާމް ވެގެން ނުރައްކާތެރި ކުށްކުރުމަށް ރާވައި، އެފަދަ ކުށްތައް ކުރުމަށް ބޭނުންކުރާ ތޫނު ހަތިޔާރާއި ނުރައްކާތެރި ހަތިޔާރު އަދި އާލާތްތައް އެފަރާތްތަކުން ސޭފްހައުސްގެ ގޮތުގައި ބޭނުންކުރަމުންދާ ތަނަކުންނެވެ. ފުލުހުން ބުނީ ހެންވޭރުގައި ހުންނަ އެ ގެއަށް ވަދެ ބަލާފާސްކޮށްފައިވަނީ ކޯޓު އަމުރެއްގެ ދަށުން ކަމަށެވެ.
ފުލުހުން ވަނީ އެ ގެއިން ތޫނު ހަތިޔާރު ފެނިފައިވާ ކަމަށް ބުނެފައެވެ. މި މައްސަލައިގައި ހައްޔަރުކޮށްފައިވަނީ މއ. މޯނިންގވިޔު، އަޙްމަދު ނަވާޒު (30އ) އާއި ހަމަ އެގެއަށް ނިސްބަތްވާ އިބްރާހީމް ޒައިދާން (22އ) އަދި ލ. މާބައިދޫ، ބަށިމާގެ، މުޙައްމަދު ޝިދާދު (22އ) އެވެ.
އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، އަޙްމަދު ނަވާޒު 30 ދުވަހަށް، އިބްރާހީމް ޒައިދާން އާއި މުޙައްމަދު ޝިދާދު 15 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ. މި އަމުރު ކޯޓުން ކޮށްފައިވަނީ، ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން ކަމަށާ މި މައްސަލަ ތަހުގީގު ކުރަމުން ގެންދާކަމަށް ފުލުހުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
