ގދ.އަތޮޅު ކައުންސިލް މެމްބަރުން 2023 ވަނަ އަހަރު ތައިލެންޑަށް ތަޖުރިބާހޯދަން ކުރި ދަތުރަކީ ފިނޭންސް މިނިސްޓްރީން ދައުލަތުގެ ހަރަދުތައް އުފެއްދުންތެރިކުރުމަށް ގެންގުޅޭ މިންގަނޑާ އެއްގޮތަށް ކުރި ދަތުރެއްކަމަށް ބެލެވެން ނެތްކަމަށް އޮޑިޓަރ ޖެނެރަލްގެ އޮފީހުން ބުނެފިއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ހުވަދު އަތޮޅު ދެކުނުބުރީ އަތޮޅު ކައުންސިލް އިދާރާގެ 2023 ވަނަ އަހަރުގެ އޮޑިޓް ރިޕޯޓްގައި ބުނެފައިވަނީ، ކައުންސިލް މެމްބަރުން ތައިލެންޑަށް ކުރި ދަތުރަށް ޖުމްލަ 559،168 ރުފިޔާ ހޭދަކޮށްފައިވާކަމަށެވެ. މި ހަރަދަކީ ދައުލަތުގެ ހަރަދުތައް ކޮންޓްރޯލްކޮށް އެސިޝަންސީ އިތުރުކުރުމަށް މާލީ ވުޒާރާއިން ދައުލަތުގެ އެންމެހާ އިދާރާތަކަށް މާލިއްޔަތާ ބެހޭ ސަރކިއުލާ އިން އަންގާފައިވާ އެންގުމާ އެއްގޮތަށް ކޮށްފައިވާ ހަރަދެއްކަމަށް ނުބެލެވޭކަމަށް އޮޑިޓް ރިޕޯޓުގައި ބުންޏެވެ. އެ ސާކިއުލާގެ 4 ވަނަ ނަމްބަރުގައި ބުނެފައިވަނީ ރާއްޖެއިން ބޭރުން ހުރިހާ ހަރަދެއް ލިބޭ ކުރުމުއްދަތުގެ ކޯސްތަކާއި ޓްރެއިނިންތައް ފިޔަވައި އިތުރު އެއްވެސް ޓްރެއިނިން ޕްރޮގްރާމެއް ކުރިއަށް ނުގެންދިއުމަށެވެ. 

ހުވަދުއަތޮޅު ދެކުނުބުރީ އަތޮޅު ކައުންސިލުން ތައިލެންޑަށް ކުރި 10 ދުވަހުގެ އެ ދަތުރުގައި އެ އިދާރާގެ 9 ކައުންސިލް މެމްބަރުންނާއި ސެކްރެޓަރީ ޖެނެރަލް ހިމެނޭހެން 10 މެމްބަރުން ބައިވެރިވިއެވެ. އޮޑިޓް އޮފީހުން ބުނެފަިއވަނީ މި ދަތުރުކޮށްފައިވަނީ ދަތުރަށް ހަރަދުވާ ފައިސާ ލިބޭނޭ ގޮތެއް ނުހޯދައިކަމަށެވެ. 

ކައުންސިލުން ތައިެލްނޑް ދަތުރަސް ކުރި ހޭދައިގެ ތަފްސީލް

ކައުންސިލް މެމްބަރުން މި ދަތުރުގައި ތައިލެންޑްގައި ހުންނަ ރާއްޖޭގެ އެމްބަސީ އާ ބައްދަލުކުރުމާއި، ގދ އަތޮޅުގެ ލޯކަލް ޓޫރިޒަމް  ކުރިއެރުވުމަށް ތައިލެންޑްގެ ފުކެޓް ގެ ޓޫރިޒަމް ޕްރޮމޯޝަނާއެކު މަޝްވަރާކޮށް ޕަތާޔާގެ ލޯކަލް ޓޫރިޒަކް ކަލްޗަރ ކުރިއެރުވުމަށް އެފަރާތްތަކުގެ  ކަލްޗަރ އާއި ހޮސްޕިޓާލިޓީ ބޭނުންކުރާގޮތާއި މެދު މަޝްވަރާކުރިކަމަށް ބަޔާންކޮށްފައިވެއެވެ.

އޮޑިޓަރ ޖެނެރަލްގެ ރިޕޯޓްގައި ބުނެފައިވަނީ، ރާއްޖޭގެ ފަތުރުވެރިކަން ޕްރޮމޯޓްކުރުމަށް އެމްއެމްޕީއާރުސީ އޮންނައިރު، ލޯކަލް ކައުންސިލުން މިބާވަތުގެ ކަންކަން ކުރުމުގެ ބަދަލުގއި އެކުންފުނިން މިބާވަުގެ ކަންކަން ކުރުމުން ހަގީގީ މަގްސަދު ފުރިހަމަވުމަށް މަގުފަހިވެގެންދާނޭކަމަށެވެ. އެގޮތުން ކައުންސިލުން އެމްއެމްޕީއާރުސީއާ މިކަމުގައި މަޝްވަރާކޮށްފައި ނުވާކަން ވަނީ ފާހަގަކޮށްފައެވެ. 

އޮޑިޓަރ ޖެނެރަލްގެ ރިޕޯޓްގަިއ ވަނީ ކައުންސިލްތަކުން މިފަދަ ކަންކަމަށް ހަރަދުކުރުމުގައި ފިނޭންސް މިނިސްޓްރީން ނެރެފަިއވާ ސާކިއުލާއަށް ތަބާވެ، ސްޕޮންސަރުންގެ އެހީ ހޯދައިގެން ނޫނީ އެފަދަ ދަތުރުތައް ކުރިއަށް ނުގެންދިއުމަށް ލަފާދީފައެވެ.