ރައްޔިތުންގެ މަޖިލީހުގެ ޖަލްސާތަކެއް މާދަމާވެސް ބޭއްވުމަށް ނިންމަައިފިއެވެ.
މިއީ 20 ވަނަ ރައްޔިތުންގެ މަޖިލީހުން ދައުރުން ބޭރުން ބާއްވާ ހަތް ވަނަ ޖަލްސާއެވެ. އަދި މި ދައުރުގެ މަޖިލީހުން ދައުރުން ބޭރުގައި ނުވަތަ މަޖިލިސް ޗުއްޓީގައި އޮއްވައި ބާއްވާ ހަތަރު ވަނަ ޖަލްސާއެވެ.
މިއަދު ވެސް ރައްޔިތުންގެ މަޖިލީހުން ދައުރުން ބޭރުން ދެ ޖަލްސާއެއް ބޭއްވިއެވެ. އެގޮތުން ހެނދުނު ބޭއްވި މި ފަސްވަނަ ޖަލްސާގައި ވަނީ ރައްޔިތުންގެ ޚިޔާލު ހޯދުމުގެ އާންމު ވޯޓު، ވަކި ސަރަޙައްދުތަކެއްގެ ރައްޔިތުންގެ މެދުގައި އެކަނި ވެސް ނެގޭ ގޮތަށް މަޖިލީހަށް ހުށަހެޅި "ރައްޔިތުންގެ ހިޔާލު ހޯދުމުގެ އާންމު ވޯޓް ނެގުމުގެ ބިލު" ފާސްކޮށްފައެވެ.
އަދި އެޗްއާރްސީއެމްގެ ނައިބު ރައީސާއި، ސިވިލް ސާވިސް ކޮމިޝަނުގެ ރައީސްގެ އިތުރުން ނައިބު ރައީސްގެ މަގާމަށް ބޭފުޅުން އައްޔަނުކޮށްފައިވަނީ މިއަދު މެންދުރު ބޭއްވި ހަވަނަ ޖަލްސާގައެވެ.
ބެލެވޭ ގޮތުގައި މާދަމާގެ ޖަލްސާގައި އެޖެންޑާކުރަން ހަމަޖެހިފައިވަނީ މިހާރު ރައްޔިތުންގެ މަޖިލީހަށް ހުށަހެޅިފައިވާ މިހާރު ރައްޔިތުންގެ މަޖިލީހަށް ހުށަހަޅާފައިވާ މޯލްޑިވްސް މީޑިޔާ އެންޑް ރެގިއުލޭޝަން ބިލުގެ ވޯޓަށް އެހުމެވެ. މިއަދު އެ ބިލުގެ ކޮމެޓީގެ މަސައްކަތްތައް ނިންމާނެ ކަމަށް ބެލެވެއެވެ.
ފާހަގަކުރެވޭ ގޮތުގައި މަޖިލީހަށް ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު ހުށަހަޅުއްވާފައިވާ މީޑީޔާގެ ރެގިއުލޭޓަރީ ބިލާ ދެކޮޅަށް ވަރަށް ގިނަ ނޫސްވެރިން ވަނީ ޚިޔާލު ފާޅުކޮށްފައެވެ. އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މި މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.
އަދި އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައެވެ.
Advertisement
This content is created and paid for by advertisers and does not involve Voice Journalists
