މީޑިއާ ބިލު ފާސްކުރާ ޖަލްސާ މިއަދު ހަވީރު
މިހާރު ރައްޔިތުންގެ މަޖިލީހަށް ހުށަހަޅާފައިވާ މޯލްޑިވްސް މީޑިޔާ އެންޑް ރެގިއުލޭޝަން ބިލަށް ވޯޓަށް އަހާ ޖަލްސާ މިއަދު ހަވީރު ބޭއްވުމަށް މަޖިލީހުގެ އިދާރާއިން ނިންމައިފިއެވެ.
ދައުރުން ބޭރުން މިއަދު ޖަލްސާއެއް ބައްވާކަން އިއްޔެ މަޖިލީހުގެ އިދާރާއިން އިއުލާންކޮށްފައިވާއިރު، މިހާތަނަށް ވެސް މަޖިލީހުގެ ޖަލްސާގެ އެޖެންޑާ އިއުލާންކޮށްފައެއް ނުވެއެވެ. އަދި މަޖިލީހުގެ ވެބްސައިޓު މިއަދު ހެނދުނުން ފެށިގެން ޑައުން ވެފައިވާތީވެ، އޭގެ ތަފްސީލު އެ ވެބްސައިޓުން ވެސް ލިބޭނެ ގޮތެއް ވަނީ ނުވެފައެވެ.
އިއްޔެ ޖަލްސާއެއް އޮންނާނެކަން މަޖިލީހުގެ އިދާރާއިން އިއުލާންކުރި ނަމަވެސް، މިއަދުގެ އެކެއް ޖެހުމާއި ހަމައަށް ވެސް އެ ޖަލްސާގެ އެއްވެސް ތަފްސީލެއް މަޖިލީހުގެ އިދާރާއިން ހާމަކޮށްފައެއް ނުވެއެވެ. އެހެން ނަމަވެސް މިއަދު އެކެއް ޖެހިއިރު މަޖިލީހުގެ އިދާރާއިން މީޑީޔާތަކަށް ފޮނުވި މެސެޖެއްގައި ވަނީ ހަވީރު ދައުރުން ބޭރުން ބާއްވާ ޖަލްސާ އޮންނާނެކަން އަންގާފައެވެ.
މިއަދު ދައުރުން ބޭރުން ޖަލްސާއެއް ބޭއްވުމަށް މަޖިލީހުން ނިންމާފައިވާއިރު، މީޑިޔާ ބިލަށް ބައެއް އިސްލާހްތައް ގެނައުމަށްފަހު ކޮމިޓީން އިއްޔެ ވަނީ ފާސްކޮށްފައެވެ. އެހެންކަމުން މިއަދު އެ ބިލު ފާސްކުރާނެ ކަމަށް ބެލެވޭިއރު، އިއްޔެ ބޭއްވި ކޮމެޓީގައި ވޯޓަށް އެހިތަނުން މަޖިލީހުގެ ކޮމިޓީ ވަނީ ހޫނުވެފައެވެ. އެހެން ނަމަވެސް ކޮމެޓީން ވަނީ އެ ބިލު ފާސްކޮށްފައެވެ.
އެ ބިލު ކޮމެޓީން ކުރަން ވޯޓަށް އެހިއިރު އިދިކޮޅު އެމްޑީޕީގެ މެންބަރުން ވަނީ 150 އަށް ވުރެ ގިނަ ނޫސްވެރިންގެ ސޮޔާއެކު މަޖިލީހަށް ހުށަހަޅާފައިވާ ޕެޓިޝަނަށް ކޮމެޓީން ރިއާޔަތްނުކުރާ ކަމުގެ ކަންބޮޑުވުން ފާޅުކޮށްފައެވެ. އަދި އެ ވަގުތު އެތަނުގައި ތިބި ނޫސްވެރިންނާއި ޢާންމުން ވެސް ކަންބޮޑުވުން ފާޅުކޮށްފައެވެ.
ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު ހުށަހަޅުއްވާފައިވާ މީޑީޔާގެ ރެގިއުލޭޓަރީ ބިލާ ދެކޮޅަށް ވަރަށް ގިނަ ނޫސްވެރިން ވަނީ ޚިޔާލު ފާޅުކޮށްފައެވެ. އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މި މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.
އަދި އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައެވެ.
އެ ޕެޓިޝަނާ ގުޅިގެން މިއަދު އެކެއް ޖެހިއިރު މަޖިލީހުގެ ޕެޓިޝަން ކޮމެޓީން ވަނީ ބައްދަލުވުމެއް ވެސް ބާއްވާފައެވެ.
Advertisement
This content is created and paid for by advertisers and does not involve Voice Journalists
