ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު މަޖިލީހަށް ހުށަހެޅުއްވި މޯލްޑިވްސް މީޑިޔާ އެންޑް ރެގިއުލޭޝަން ބިލު، ރައްޔިތުންގެ މަޖިލީހުން ދެންމެ ފާސްކޮށްފިއެވެ. 

އެ ބިލު މަޖިލީހުން ފާސްކުރިއިރު، އެ ވޯޓުގައި ބައިވެރިވެފައިވަނީ މަޖިލީހުގެ ޖަލްސާއަށް ހާޟިރުވި 63 މެންބަރުންގެ ތެރެއިން 60 މެންބަރުންގެ ޣައުލަބިއްޔަތުންނެވެ. އެގޮތުން އެ ބިލާ އެއްކޮޅަށް 60 މެންބަރުން ވޯޓު ދެއްވިއިރު، ބިލާ ދެކޮޅަށް ވޯޓު ދެއްވާފައިވަނީ ވެލިދޫ ދާއިރާގެ މެންބަރު މުޙައްމަދު އައްބާސް އެކަންޏެވެ.

މަޖިލީހުގެ ކައުންސިލާ ޖެނެރަލް ފާތިމަތު ފިލްޒާގެ ފަރާތުން ހުށަހެޅުއްވި ހުށަހެޅުއްވުންތަކާއެކު އެ ބިލު ދެވަނަ ފަހަރަށް ކޮމެޓީން ފާސްކޮށް ތަޅުމަށް ފޮނުވީ މިއަދުގެ ވަގުތެއްގައެވެ. އޭގެ ކުރިން ހަމަ އެ ކޮމެޓީން އިއްޔެ ވަނީ ކައުންސިލާ ޖެނެރަލްގެ ލަފަޔާ ނުލައި އެ ބިލު ފާސްކޮށްފައެވެ.

އެ ބިލު މިއަދު މަޖިލީހުގެ ތަޅުމުން ފާސްކުރިއިރު، އެ ބިލަށް ވަނީ ކޮމެޓީ މަރުޙަލާގައި މައިގަނޑު ހަ އިސްލާޙެއް ހުށަހަޅާފައެވެ. އެގޮތުން އެ ބިލުގައި ގާނޫނު އަސާސީއާ ތައާރަޒުވާ އެއްވެސް ކަމެއް ނެތް ކަމަށް މަޖިލީހުގެ ކައުންސިލާ ޖެނެރަލް ލަފާދީފައިވަނީ ވެސް މިއަދުގެ ވަގުތެއްގައެވެ.

އެ ބިލު މަޖިލީހުން ފާސްކުރިއިރު، އެ ބިލާ ދެކޮޅަށް ވަރަށް ގިނަ ނޫސްވެރިންނާއި ބޭރުގެ ނޫސްވެރިންގެ ޖަމުއިއްޔާތަކުން ވަނީ ޚިޔާލު ފާޅުކޮށްފައެވެ. އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މި މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.

އެގޮތުން އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައެވެ.

ހަމަ އެއާއެކު، އެ ބިލު ފާސްކުރުމަށް ގޮވާލައި ވެސް ވަރަށް ގިނަ ފަރާތްތަކުން ޚިޔާލުފާޅުކޮށްފައިވެއެވެ. އެގޮތުން މިއަދު މަޖިލިސް ދޮށަށް، ދެ ޚިޔާލުގެ ފަރާތްތަކުން އެއްވެ ވަނީ ޚިޔާލު ފާޅުކޮށްފައެވެ.