ހުސްވި އޮގަސްޓްމަހު ރާއްޖެއަށް 4.9 ބިލިއަން ރުފިޔާގެ މުދާ އެތެރެކޮށްފައިވާކަމަށް މޯލްޑިވްސް ކަސްޓަމްސް ސާވިސްގެ އިމްޕޯޓް އެކްސްޕޯޓް ތަފާސްހިސާބުތަކުން ދައްކައިފިއެވެ.

ކަސްޓަމްސްއިން ނެރެ އާއްމުކޮށްފައިވާ ތަފާސްހިސާބުތަކަށް ބަލާއިރު، ހަކަތައިގެ ގޮތުގައި ބޭނުންކުރާ ތެލުގެ ބާވަތްތައް ނުހިމަނައި ރާއްޖެއަށް އެތެރެކުރި މުދަލުގެ އަގު އުޅެނީ 4 ބިލިއަން ރުފިޔާގައެވެ. ތެލުގެ ބާވަތްތަކަށްފަހު އެންމެގިނައިން ރާއްޖެއަށް އެތެރެކޮށްފައިވަނީ ކާބީތަކެތީގެ ބާަތްތަކެވެ. ކާބޯތަކެތީގެ ބާވަތްތައް އެތެރެކުރުމަށް 993 މިލިއަން ރުފިޔާ ހޭދަޮށްފައިވާއިރު، ދެން އެންމެގިނައިން ހޭދަކޮށްފައިވަނީ، އިލެކްޓްރޯނިކްސްގެ ބާވަތްތައް އެތެރެކުރުމަށެވެ. އެއީ 732 މިލިއަން ރުފިޔާއެވެ.

އޮގަސްޓްމަހު ރާއްޖެއަސް އެންމެގިނައިން މުދާ ގެނެސްފައިވަނީ، އިންޑިއާ، ޔޫއޭއީ، ޗައިނާ، ސިންގަޕޫރު އަދި އޮމާނުންނެވެ.

- އިންޑިއާ: 765 މިލިއަން ރުފިޔާ

- ޔޫއޭއީ: 726 މިލިއަން ރުފިޔާ

- ޗައިނާ؛ 651 މިލިއަން ރުފިޔާ

- ސިންގަޕޫރު: 529 މިލިއަން ރުފިޔާ

- އޮމާން: 451 މިލިއަން ރުފިޔާ

މިދިޔަ މަހު ރާއްޖޭގެ އެކްސްޕޯތްހުރިގޮތަށް ބަލާއިރު، އެންމެގިނައިން ބޭރުކޮށްފައިވަނީ ގަނޑުކުރި ކަޅޫބިލަމަހުގެ ބާވަތްތަކެވެ. ގަނޑުކުރި މަހުގެ ބާވަތްތައް ބޭރުކުރި އަގު 58 މިލިއަން ރުފިޔާގައި އުޅޭއިރު ދެން އެންމެގިނައިން ބޭރުކޮށްފައިވަނީ ދަޅުގައި ބަންދުކުރި މަހުގެ ބާވަތްތަކެވެ. ބޭރުކުރި ދަޅުމަހުގެ ބާވަތްތަކުގެ ޖުމްލަ އަގަށް 49 މިލިއަން ރުފިޔާއަށް އަރައެވެ.

މިދިޔަ މަހު ރާއްޖެއިން އެންމެގިނަ އަދަދަކަށް މުދާ ބޭރުކޮށްފައިވަނީ ތައިލެންޑް، އިނގިރޭސިވިލާތް، ޖަރުމަނުވިލާތް، ވިއެޓްނާމް އަދި ސްރީލަންކާއަށެވެ. މީގެ ތެރެއިން ތައިލެންޑަށް ބޭރުކުރި މުދަލަށް 61 މިލިއަން ރުފިޔާ ޖެހޭއިރު، އިނގިރޭސިވިލާތަށް ބޭރުކުރި މުދަލަސް ޖެހިފައިވަނީ، 39 މިލިއަން ރުފިޔާއެވެ.