ތައިރޮއިޑް ބައްޔަށް ޚާއްސަ "ތައިރޯނޯމް 25 މައިކްރޯގްރާމް" އާސަންދަ ސްކީމްގެ ދަށުން ލިބޭނެ ކަމަށް އާސަންދައިން ބުނެފިއެވެ.

އާސަންދައިން އެފަދައިން ބުނީ، ތައިރޯނޯމް 25 މައިކްރޯގްރާމްގެ ބޭސް އާސަންދަ ދަށުން ނުލިބި، އަގުބޮޑުކޮށް ގަންނަން ޖެހޭތީ އާންމުންގެ ކަންބޮޑުވުން ބޮޑުވުމާ ގުޅިގެން ސޯޝަލް މީޑިޔާގައި ކުރި ޕޯސްޓެއްގައެވެ.

އެގޮތުން އެ ބޭސް އަގުބޮޑުކޮށް ގަންނަން ޖެހޭތީ އެކަމުގެ ކަންބޮޑުވުން ހިއްސާކުރައްވައި ޑރ. އަބްދުލް އަޒީޒް ހަމީދު ސޯޝަލް މީޑީޔާގައި ކުރެއްވި ޕޯސްޓެއްގައި ވިދާޅުވީ، އެސްޓީއޯގެ މައި ފާމަސީއާއި، އޭޑީކޭ ހޮސްޕިޓަލްގެ ފާމަސީ އަދި މާލޭގެ އެހެން ބައެއް ފާމަސީތަކުން މި ބޭސް ނުލިބޭތީ ދަތިތަކާ ކުރިމަތިލާން ޖެހިފައިވާ ކަމަށެވެ.

ޕޯސްޓުގައި ޑރ. އަޒީޒް ވިދާޅުވި ގޮތުގައި އެއް ފާމަސީއަކުން މި ބޭސް ވިއްކާފައިވަނީ 90 ރުފިޔާއަށް ކަމަށާއި، އެ ފާމަސީން ބުނި ގޮތުގައި، އާސަންދައިގެ ދަށުން އެ ބޭސް ނުލިބެއެވެ. ހަމަ އެގޮތަށް އެހެން ފާމަސީއަކުން 120 ރުފިޔާއަށް، އަދި އިތުރު ފާމަސީއަކުން 195 ރުފިޔާއަށް މި ބޭސް ވިއްކި ނަމަވެސް، އެ ފާމަސީތަކުންވެސް ބުނެފައިވަނީ އާސަންދައިގެ ދަށުން މި ބޭސް ނުދެވޭނެ ކަމަށެވެ.

އެ ޕޯސްޓަށް އިޝާރަތްކުރަމުން އާސަންދައިން ފޭސްބުކްގައި ކުރި ޕޯސްޓެއްގައި ބުނެފައިވަނީ ތައިރޯނޯމް 25 މައިކްރޯގްރާމްއަކީ އާސަންދަ ސްކީމްގެ ދަށުން ހިމެނޭ ބޭހެއް ކަމަށެވެ. އަދި ބައެއް ފާމަސީތަކުން އާސަންދައިގެ ދަށުން ނުދީ ވިއްކަމުންދާކަން އެނގިފައިވާ ކަމަށާއި، މިފަދަ ކަމެއް ދިމާވާނަމަ މަޢުލޫމާތާއެކު ޝިކާޔަތު ޕޯޓަލަށް ހުށަހެޅުމަށް އެ ކުންފުނިން އެދިފައިވެއެވެ.

"އާސަންދައިގެ ދަށުން ހިމެނޭ އެއްވެސް ބޭހެއް އާސަންދައިގެ ދަށުން ނުދޭނަމަ، އެކަން މަޢުލޫމާތާއެކު ޝިކާޔަތު ޕޯޓަލަށް ހުށަހެޅުއްވުން އެދެމެވެ،" އާސަންދައިން ބުނެފައިވެއެވެ.