ގާނޫން އަސާސީގައި ބަޔާންކުރާ އައްޑުއަތޮޅުގައި، ދިވެހި ދައުލަތުން ލޯންނަގައިގެން ދިވެހި ސަރުކާރުން ހަދާފައިވާ ބޮޑު ހޮސްޕިޓަލަށް ދޭނެ ނަމަކަށް އައްޑުއަތޮޅުގައި އުފައްދާފައި އޮންނަ ކައުންސިލަކުން "ސުވާދީވް ހޮސްޕިޓަލް" މިނަން ކިޔަން ރައްޔިތުންގެ ޚިޔާލު ހޯދަން ހުށަހަޅަން ނިންމާފައިވާ ނިންމުމަކީ ކަނޑައެޅިގެން ދިވެހި ގައުމުގެ ސިޔާދަތަށް ފުރައްސާރަކޮށް، ދިވެހި ގައުމުން ވަކިވެގަތުމަށް ބަޣާވާތްކުރި ބަޣާވާތަށް ތާއީދުކޮށް ހޮސްޕިޓަލަކީ ބަޣާވާތުގެ ރަމްޒުކަމުގައި ދެއްކުމަށް ހިންގާ ޖަރީމާއަކަށް ނުވާނެ ގޮތެއް އޮންނާނެތޯއެވެ.

ދިވެހި ދައުލަތުގެ ސިޔާދަތީ ބާރުކަނޑުވާލުމަށް ތާރީޚްގައި މަސައްކަތްކޮށްފައިވަނީ ޕޯޗްގީޒުންނާއި ހޮޅިންނާއި މަލާބާރީންނެވެ. ދެން ދިވެހި ގައުމަށް ހަރާންކޯރުވި ނުވަވަނަ ހަސަންރަސްގެފާނުގެ ދެދަރިންފަދަ ދިވެހި ބަޔަކުއެވެ. ފަހުގެތާރީޚްގައި އެކަންކުރީ ގައުމުތައް ކޮލޮނައިޒްކުރި އިގިރޭސިން އަޑީގައި ތިބެގެން އައްޑުއަތުޅުގެ ބަޔަކު ލައްވައެވެ. ދިވެހި ގައުމުން ބައެއް އިގިރޭސިންގެ ބާރުގެ ދަށަށް ގެންދިއުމަށެވެ. ނަމެއްގައި ސުވާދީވް ސަރުކާރު ކިޔާ ސަރުކާރެއް އުފައްދައިގެންނެވެ. ބޭނުމަކީ ގަމަކީ އިގިރޭސިންގެ އަސްކަރީ މަރުކަޒަކަށް ހެދުމެވެ.

ދިވެހި ދައުލަތާދެކޮޅަށް އިގިރޭސިން އަޑީގައި ތިބެގެން ހިންގި ބަޣާވާތް ނިމުމަށްފަހު މިއަދުވެސް އަޅުގަނޑުމެންނަށް މިފެންނަނީ އައްޑުއަތޮޅުން އެފިކުރާއިގެން ބަޔަކު ތެދުވަން އުޅޭތަނެވެ. ދިވެހި ލޭ ހިނގާބަޔަކު މިދިވެހި ވަތަންދެކެ ލޯބިވާ މީހަކު ދިވެހި ގައުމުގެ ސިޔާދަތަށް ގެއްލުންދޭން އުޅުނު މާޒީ ރަނުން ގިރިޓީކޮށް މިބިންމަތީގައި ބަހައްޓާނެތޯއެވެ. އެކަންކުރަންޏާ އެކަންކުރާނީ ދިވެހި ގައުމަށް ޣައްދާރުވެ ބާޣީންގެ ހެދުން އަޅައިގެން ތިބެއެވެ.

އިހަށްދުވަހު މުޅި އައްޑުއަތޮޅުގައި ހުޅުޖަހައިހެދީއެވެ. މިއަދު ދިވެހި ގައުމުގެ ސިޔާދަތަށް ފުރައްސާރަކުރާކަން ދައްކަން އުޅެނީއެވެ. ސުވައިދީވް ސަރުކާރާއި ދެކޮޅަށް ނުކުތް އައްޑޫގެ ލޮބުވެތި ރައްޔިތުން ކޮބައިތޯއެވެ. އެމީހުންގެ ދަރިންނާއި ކާފަދަރިންވެސް ނެތިވެ މުޅިން ބާޣީ ފިކުރާއި ދިވެހި ގައުމުގެ މިނިވަންކަމަށް ފުރައްސާރަކުރާ ފިކުރުގެ މީހުންނަށް ވެނިމުނީތޯއެވެ. ދިވެހި ލޭ ހިގާ ދަރިޔަކުވެސް އައްޑުއަތޮޅުގައި ނެތިވެދިޔައީތޯއެވެ.

ސުވައިދީވްގެ ނަންދޭން ތިއުޅޭ މީހުންނަށް ތަންދޮރު ނޭގޭކަމަކީވެސް ކުޑަކަމެއްތޯއެވެ. ސުވައިދީވްކީ އައްޑުއަތޮޅަށް ކިޔާނަމެއް ނޫނެވެ. އެއީ ދިވެހިޒަމާންވީ ތާރީޚުންފެށިގެން ހުވަދުއަތޮޅަށް ކިޔަމުން އައި ނެމެކެވެ. އެއީ އައްޑޫ މީހުން ފަޚްރުވެރިވާންޖެހޭ އައްޑުއަތޮޅުގެ ނަމެއްނޫނެވެ.

ދިވެހި ގައުމާދެކޮޅަށް އައްޑޫއަތޮޅުގައި އިގިރޭސިން އަޑީގައި ތިބެގެން ހިންގި ބަޣާވާތުގައި ސުވައިދީވްގެ ނަން ގެނެސްފައިވަނީ ހުވަދުއަތޮޅުގެ މީހުން ބައިވެރިކުރަންވެގެންނެވެ. ދިވެހި ދައުލަތުން ވަކިވެގަންނަން އުޅުނުއިރު އައްޑުއަތޮޅުގެ އާބާދީއަކީ އެންމެ 8000 މީހުންނެވެ. އެވަރުގެ އާބާދީއަކީ އެއްވެސް ބަޔަކަށް ނުވާނެތީ އިނގިރޭސި އިސްތިއުމާރީންގެ ސިކުނޑިން ރާވައި އެމީހުންގެ އަވާގައިޖެހިގެން ހުވަދުއަތޮޅު ރުއްސުމަށްޓަކައި ސުވާދީވް ނަންދިނީއެވެ. އައްޑުއަތޮޅު ކައުންސިލްގައި ތިބި މީހުންނަށް ނޭގޭކަމަށްވަންޏާ އެގޭމީހުންކުރެން އަހައި އޮޅުން ފިލުވަންވީ ނޫންތޯއެވެ. ސުވާދީވަކީ އައްޑުއަތޮޅެއް ނޫނެވެ. ހުވަދުއަތޮޅުގެ ނަން ތިޔަހޮސްޕިޓަލަށްދީގެން އައްޑުއަތޮޅުގެ އަގުވެށްޓުންފިޔަވައި ލިބެނީ ކޯއްޗެއްތޯއެވެ.

އަނެއްކާ ރަންރީދޫ ޓައިއަޅައިގެން ބޮޑާކަންމަތީގައި ބޯހަރުކަންކުރިއަށް ނެރޭއިރު ނާކާމިޔާބުވި ސުވާދީވުގެ ސަރުކާރު ދިވެހި ދައުލަތުން ވަކިވިނަމަ ތިޔަގޮނޑީގައި ތިހެން އިނދެވޭނެކަމަށް ހީވަނީތޯއެވެ. އިގިރޭސިން ފޯޅަވަހީގެ ރައްޔިތުންނަށް ޖެއްސި ހާލު ނުފެނޭތޯއެވެ. ސުވާދީވްގެ ތިޔަ ހުވަފެން ހަގީގަތަކަށްވީނަމަ ތިޔަކައުންސިލް މީހުން މިއަދު ތިބީހީ ކޮންމެވެސް ގައުމެއްގެ ރެފިއުޖީންނަށްވެ ނުވަތަ ޖަންގަލިތެރޭގައި ވިއްސިވިހާލިވެފައެވެ. ބަޣާވާތް ނާކާމިޔާބުވެ ﷲ ދެއްވި ނިއުމަތަށް ޝުކުރުވެރިވުމުގެ ހިތެއްވެސް ހަމަ ނެތްބަޔެކެވެ.