ކޮންޓްރެކްޓްތަކަށް އިތުރަށް ފައިސާނަގައި، ބައެއް ފަރާތްތަކުން ފިލާފައި އެބަހުރި: ރައީސް
ސްކޫލު އަދި ސިއްޚީ މަރުކަޒު ޢިމާރަތްކުރުން ފަދަ ޢިމާރަތްކުރުމުގެ މަޝްރޫއުތަކުގައި، ކުރި މަސައްކަތަށް ވުރެ ގިނައިން މިދިޔަ ސަރުކާރުން ފައިސާދޫކޮށްފައިވާ ބައެއް މަޝްރޫއުތަށް ހުރި ކަމަށާއި، އެފަދަ މަޝްރޫއުތަކުގައި ކޮންޓްރެކްޓަރުގެ ޚަބަރެއް ނުވާ ނުވަތަ "ފިލާ" މައްސަލަ ވެސް ފާހަގަކުރެވިފައިވާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ތ. ކަނޑޫދޫގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ކަނޑޫދޫގެ ސިއްޚީ މަރުކަޒުގެ މަސައްކަތް ހުއްޓިފައިވަނީ ފައިސާގެ ދަތިކަމުގެ ސަބަބުން ނުވަތަ ކޮންޓްރެކްޓަރަށް ދޭންޖެހޭ ފައިސާ ނުދޭތީ ނޫން ކަމަށެވެ.
އެގޮތުން އެފަދަ ޢިމާރަތްކުރުމުގެ ގިނަ މަޝްރޫއުތަކަކީ ފައިސާ ހަމައަށް ނުވަތަ ކުރި މަސައްކަތަށް ވުރެ އިތުރަށް ވެސް މިދިޔަ ސަރުކާރުންދީފައިވާ މަޝްރޫއުތައް ކަމަށާއި، އެހެންކަމުން ފާއިތުވި އަހަރެއްހާ ދުވަހު ސަރުކާރުން މަސައްކަތްކުރީ އެ ކޮންޓްރެކްޓަރު ލައްވައި އެ މަސައްކަތްތައް ކުރުވުމަށް ކަމަށް ރައީސް ވިދާޅުވިއެވެ.
މިކަން ވެސް ފުރަތަމަ ބެލީ ކުރަމުންދިޔަ ފަރާތް ލައްވައި މަސައްކަތްކުރެވޭތޯ. ދެން އެހެން ނަމަވެސް އެކަމެއް ނުވި. ގާތްގަޑަކަށް އަހަރަކަށް ވުރެ ގިނަ ދުވަސް މިބެލީ ކޮންޓްރެކްޓަރު ލައްވައި މަސައްކަތްކުރަން. ޢިމާރަތްކުރުމުގެ މަޝްރޫއުތަކުގައި މިކަހަލަ ޢިމާރަތްކުރުމުގެ މަޝްރޫއުތަކުގައި ހުރީ ފައިސާދިނުމުގެ މައްސަލައެއްނޫން ދިމާވެފައި. މީގެ ގިނަ ރަށްރަށުގައި ހުރީ ފައިސާ ހަަމައަށް ދީފައި. އަދި ބައެއް ރަށްރަށުގައި މަސައްކަތަށްވުރެ އިތުރަށް ވެސް ފައިސާ ދީފައި އެބަހުރި އަޅުގަނޑުމެންނާ ޙަވާލުވިއިރު. މަސައްކަތް ހިނގާފައި އޮތް ޕަސެންޓޭޖަށް ވުރެ އިތުރަށް ފައިސާ ދީފައި. އެހެންކަމުން ވަރަށް ބޮޑަށް އޮޅުންބޮޅުންތަކުގައި މިކަހަލަ މަޝްރޫއުތަށް ހުރީ. ކޮންސްޓްރަކްޝަން، ޢިމާރަތް ބިލްޑިން ކޮންސްޓްރަކްޝަން މަޝްރޫއުތައް.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ ކުރި މަސައްކަތަށް ވުރެ އިތުރަށް ފައިސާދީފައިވުމުން، އެ މަސައްކަތް ނުކޮށް ކޮންޓްރަކްޓަރު ފިލާ ނުވަތަ ޚަބަރެއްނުވާ މައްސަލަ ވަރަށް ގިނަ ކަމަށާއި، ގިނަ ރަށްތަކުގެ ސްކޫލު ނުވަތަ ހެލްތް ސެންޓަރުގެ މަސައްކަތްތަކަށް ވެފައިވަނީ އެހެން ކަމަށް ރައީސް ވިދާޅުވިއެވެ.
އެހެންކަމުން އެ މަސައްކަތް ނުކުރެވި ގިނަ ދުވަސްވާތީވެ، ޤާނޫނުގެ ތެރެއިން މިހާރު އެފަދަ ކޮންޓްރެކްޓުތައް އުވާލައިފައިވާ ކަމަށް ވެސް ރައީސް ވަނީ ވިދާޅުވެފައެވެ.
ދެން އެހެންވީމާ އަދި އަމުދުން ދަތިވެގެން ގޮސްފައިވަނީ އެމީހުން ލައްވައި މަސައްކަތްކުރުވަން ވެސް އެއީ އެމީހުންނަށް ފައިސާ ލިބިފައިހުރީމާ. ކޮންޓްރެކްޓަރު ދެން ފިލަނީ. އާދައިގެ ގޮތަކަށް ދަންނަވާނަމަ. ނޫނިއްޔާ ދެން ޚަބަރެއް ނުވަނީ. އެހެންވީމާ މިކަމުގައި ތާށިވެފައި އަޅުގަނޑުމެން ވަރަށް ގިނަ ރަށްރަށުގެ ސްކޫލު ހެލްތް ސެންޓަރުގެ މަސައްކަތްތައް ހުރީ. ދެން މިހާރު އަޅުގަނޑުމެން މި އޮތީ ޓާމިނޭޓްކޮށްފައި ޤާނޫނުގައި އޮންނަ އުސޫލުގެ ތެރެއިން ގިނަ ދުވަސްވީމާ.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ އެފަދަ މަސައްކަތްތައް ސަރުކާރުގެ ހިއްސާ އޮންނަ އެމްޓީސީސީ ފަދަ ކުންފުންޏަކާ ހަވާލުކުރުމުން އެކަން މާ ފަސޭހައިން ކުރެވޭނެ ކަމަށެވެ. އެހެންކަމުން ކަނޑޫދޫގެ ސިއްޚީ މަރުކަޒުގެ މަސައްކަތް ވެސް އެމްޓީސީސީއާ ހަވާލުކޮށް ވަރަށް އަވަހަށް އެ މަސައްކަތުގެ ޢަމަލީ މަސައްކަތް ފަށާނެ ކަމަށް ރައީސް ވިދާޅުވިއެވެ.
ރައީސް އެފަދައިން ވިދާޅުވިއިރު، މިއަދު ވަނީ ކަނޑޫދޫގެ ބަނދަރުގައި ޖެޓީއެއް ޤާއިމްކުރުމުގެ މަސައްކަތް ވެސް އެމްޓީސީސީއާ ހަވާލުކުރުމުގެ އެއްބަސްވުމުގައި ސޮއިކޮށްފައެވެ. އަދި ކަނޑޫދޫގެ މަގުތައް ޒަމާނީ ފެންވަރަށް ތަރައްގީކުރުމުގެ މަސައްކަތުގައި ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ)އާ އެކު ވެސް ސަރުކާރުން ވަނީ މިއަދު ވަނީ ސޮއިކޮށްފައެވެ.
Advertisement
This content is created and paid for by advertisers and does not involve Voice Journalists
