އެސްޓީއޯ މެދުވެރިކޮށް ބާޒާރުގައި ވިއްކުމަށް ނިންމި ކާބޯތަކެތީގެ ތެރޭގައި މިރުސް ހިމެނުނު ނަމަވެސް އެކަން ސަރުކާރުން ކުރާނީ ކަނޑޫދޫގެ ވިޔަފާރިވެރިންނަށް އެއްވެސް ގެއްލުމެއް ނުވާގޮތަށް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ތ. ކަނޑޫދޫގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ކަނޑޫދޫ ވިޔަފާރިވެރިން މިރުސްވިއްކާ އަގުގައި ގަނެގެން، އެފައިދާ ރައްޔިތުންނަށް ލިބޭގޮތަށް ގޮތަށް އެކަން ކުރިޔަށްގެންދަވާނެ ކަމަށާއި، ކަނޑޫދޫއަކީ ރާއްޖޭގެ ދަނދުވެރިކަމުގައި މިރުސް ހެއްދުމަށް މުހިއްމު ރަށެއް ކަމަށެވެ.

އަދި ކަނޑޫދޫގެ ދަނޑުވެރިންނަށް ލިބޭފައިދާ އިތުރުކޮށްދިނުމަށް ބޭނުންފުޅުވާކަން ފާހަގަކުރައްވައި ރައީސް ވިދާޅުވީ ޚަރަދުކުޑަ ގޮތެއްގައި ކަނޑޫދޫގައި މިރުސްހެއްދުމަށް މިހާރު ހުރި ދަތިތައް ކުޑަކޮށްދެއްވުމަށް ދަނޑުވެރިކަމާބެހޭ ވުޒާރާގެ ޓީމެއް ކަނޑޫދޫއަށް ފޮނުވުމަށް ނިންމަވާފައިވާކަމަށެވެ.

ރައީސް އެފަދައިން ވިދާޅުވިއިރު، މި އަންނަ މަހުގެ 15ވަނަ ދުވަހުން ފެށިގެން މޭވާ އަދި ތަރުކާރީގެ 23 ބާވަތެއް އެސްޓީއޯ މެދުވެރިކޮށް ގަނޑުކޮށް ގެނައުމަށް ނިންމަވާފައިވާކަން ރައީސް ވަނީ މި މަހުގެ 10 ވަނަ ދުވަހު އިއުލާނުކުރައްވާފައެވެ.

އެކަމުގެ ތެރެއިން ސަރުކާރުން ނިންމާފައިވަނީ ރާއްޖެއަށް އެންމެ ގިނައިން އެތެރެކުރާ 10 ބާވަތުގެ މޭވާ އާއި 10 ބާވަތުގެ ތަރުކާރީ އަދި މުގު، ބިސް، އަލުވިި، އެސްޓީއޯއިން ގަނޑުކޮށް އެތެރެކޮށް ރާއްޖޭގެ ބާޒާރުގައި ވިއްކަން ފެށުމަށެވެ.

އަދި އެ ބާވަތުގެ އުފެއްދުންތައް ރާއްޖޭގެ މާކެޓަށް މި އަންނަ މަހުގެ 15 ވަނަ ދުވަހުން ލިބެން ހުންނާނެކަމުގެ ޔަގީންކަން އެސްޓީއޯއިން ވަނީ ހާމަކޮށްފައެވެ. އޭގެ ތެރޭގައި މިރުސްވެސް ހިމެނެއެވެ.