އެންމެބޮޑު ހޭދައެއް ކުރަންޖެހެނީ ކުދިންގެ ބިހޭވިއާ ތެރަޕީއަށްކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ ތަފާސްހިސާބުތަކުން ދައްކައިފިއެވެ.

އެންސްޕާއިން ނެރެފައިވާ އޮަގަސްޓްމަހު އެ އިދާރާގެ ހަރަދު ރިޕޯޓްގައިވާގޮތުން އެ މުއްދަތުގެ ތެރޭގައި ތެރަޕިއުޓިކް ފަރުވާއަށް ދައުލަތުން ޖުމްލަ 7.7 މިލިއަން ރުފިޔާ ވަނީ ހޭދަކޮށްފައެވެ. މީގެ ތެރޭގައި އެންމެ ގިނައިން ހޭދަކޮށްފައިވަނީ، ބިހޭވިއާ ތެރަޕީ، އޮކިއުޕޭޝަނަލް ތެރަޕީ، ސްޕީޗް ތެރަޕީ، އެޑިއުކޭޝަނަލް ތެރަޕީ އަދި ސައިކޯ ތެރަޕީއަށެވެ.

- ބިހޭވިއާ ތެރަޕީ: 1.9 މިލިއަން ރުފިޔާ

- އޮކިއުޕޭޝަނަލް ތެރަޕީ: 1.7 މިލިއަން ރުފިޔާ

- ސްޕީޗް ތެރަޕީ: 1.4 މިލިއަން ރުފިޔާ

- އެޑިއުކޭޝަނަލް ތެރަޕީ: 1.05 މިލިއަން ރުފިޔާ

- އަރލީ އިންޓަރފެންޝަން: 1.2 މިލިއަން ރުފިޔާ

- ސައިކޯ ތެރަޕީ: 140،950

އެންސްޕާގެ ރެކޯޑްތަކުން ދައްކާގޮތުގައި ރާއްޖޭގައި އެންމެގިނައިން ތެރަޕީދެނީ ފިރިހެން ކުދިންނަށެވެ. ތެރަޕީ ފަރުވާއަކީ ރައްޖޭގައި އަގުބޮޑު ހިދުމަތެކެވެ. އެހެންކަމުން ކުދިންނަށް މި ފަރުވާ ދިނުމުގައި ގިނަ ބެލެނިވެރިން މާލީ އެހީ ހޯދަނީ އެންސްޕާ މެދުވެރިކޮށެވެ. އަމިއްލަ ސެންޓަރުތަކަށް ބަލާއިރު، ގިނަ ތަންތަނުން ތެރަޕިއުޓިކް ސެޝަނެއްގެ އަގުއުޅެނީ 500 ރުފިޔާ އާއި 650 ރުފިޔާ އާ ދެމެދުގެ އަގުތަކެއްގައެވެ. 

އަމިއްލަ ސެންޓަރުތަކުން ހޯދާ ތެރަޕިކް ފަރުވާގެ ދެބައިކުޅަ އެއްބައި އެންސްޕާއިން ދޭއިރު، ތެރަޕިއުޓިކް ފަރުވާއަށް އަމިއްލަ ޖީބުން ބޮޑު ހޭދައެއް ކުރަންޖެހުމަކީ ގިނަ ބެލެނިވެރިންގެ ވަރަށްބޮޑު ޝަކުވާއެކެވެ.

ނުކުޅެދުންތެރިކަން ހުންނަ ފަރާތްތަކުގެ ތެރެއިން ތެރަޕިއުޓިކް ފަރުވާއަށް ދައުލަތުގެ ބައިތުލްމާލުންވެސް ބޮޑު ހޭދައެއް ކުރާއިރު، ނުކުޅެދުންތެރިކަން ހުންނަ ކުދިންނަށް ބޭނުންވާ ތެރަޕިއުޓިކް ހިދުމަތްތައް ދެމުން އަންނަ ތަންތަނުގެ ފެންވަރު ބެލޭނެ ގޮތެއް އަދި މިހާތަނަށް ހަމަޖެހިފައި ނުވާކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ވަނީ ބުނެފައެވެ.

މިއަހަރުގެ އޭޕްރިލްމަހު މަޖިލީހުގެ ޕެޓިޝަން ކޮމިޓީގައި ވާހަކަދައްކަވަމުން ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ސްޓޭޓް މިނިސްޓަރު އަހުމަދު އާތިފް ވިދާޅުވެފައިވަނީ، 2019 ވަނަ އަހަރުން ފެށިގެން ތެރަޕީތަކަށް ފައިސާ ދެމުން އަންނައިރު، އަދި މިހާތަނަށް މިކަމަށް ވަކި އުސޫލެއް އަދި ތެރަޕީތަކުގައި ވަކި ފެންވަރެއް ހުންނަންޖެހޭނެ ފަދަ މިންގަނޑުތަކެއް އެކުލަވާލެވިފައި ނުވާކަމަށެވެ.  ނަމަވެސް ހެލްތް މިނިސްޓްރީއާއެކު މިހާރު އެ މަސައްކަތް ކުރެވެމުން އަންނަކަމަށް އޭނާ ވަނީ ވިދާޅުވެފައެވެ.