ތ. ވަންދޫ ކައުންސިލަށް އެ އަތޮޅު ކަކޮޅަސް ހަވާލުކޮށްފި އެވެ.
މިއީ ކައުންސިލްތަކުގެ މާލީ ގާބިލުކަން އިތުރުކުރުމުގެ މަގްސަދުގައި، ރަށާއި ކައިރީގާ ހުންނަ ފަޅުރަށް ކައުންސިލާ ހަވާލުކުރުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ ސިޔާސަތުގެ ދަށުން ހަވާލުކުރި ރަށެކެވެ.
ތ އަތޮޅުގެ ރަށްތަކަށް ކުރައްވާ ދަތުރުފުޅުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ވަނީ ވަންދޫއަށް ވަޑައިގެންފަ އެވެ. އެ ރަށުގެ ރައްޔިތުންނާއި ބައްދަލުކުރުމަށް ބޭއްވި ޖަލްސާގައި ވަނީ ތ. ވަންދޫ ކައުންސިލާ އެ އަތޮޅު ކަކޮޅަސް ރަސްމީކޮށް ހަވާލުކުރައްވާފައެވެ.
ސަރުކާރުން ބުނީ މި ފަޅުރަށް ހަވާލުކުރެއްވީ ވަންދޫ ކައުންސިލުން ހުށަހަޅުއްވާފައިވާ ޕްރޮޕޯސަލަށް ބިނާކޮށް، އެއްބަސްވުމަކާއި އެކުގަ އެވެ. އެރަށް ކައުންސިލާއި ހަވާލުކުރީ 20 އަހަރު ދުވަަހަށެވެ.
މިއަދުގެ ޖަލްސާގައި ރައީސް ވަނީ ވަންދޫއަށް އިގްތިސާދީގޮތުން ފައިދާ ހޯދައިދިނުމަށްޓަކައި، ކުރިއަށް އޮތްތަނުގައި އެއްބަސްވުމަށް އިތުރު ހެޔޮ ބަދަލުތައް ގެނެވެންއޮތްތޯ ބަލައި، އެބަދަލު ގެންނަވާނެ ކަމަށް ވިދާޅުވެފަ އެވެ. އެގޮތުން އެކި ފަރާތްތަކަށް ކުއްޔަށް ދެވޭނެ ޖާގަ އިތުރުކުރުން ފަދަކަންކަން ވީ އެންމެ ރަނގަޅަކަށް ކުރައްވާނެ ކަމަށް އެމަނިކުފާނު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
