ކޮމިޔުނިކޭޝަން އޮތޯރިޓީ އޮފް މޯލްޑިވްސް (ކޭމް) ގެ 2023 އަދި 2024 ވަނަ އަހަރުގެ ހަރަދުތައް ކޮށްފައިވަނީ މާލިއްޔަތު ގަވާއިދާ އެއްގޮތަށްކަމަށް އޮޑިޓަރ ޖެނެރަލްގެ އޮފީހުން ބުނެފިއެވެ.

އޮޑިޓަރ ޖެނެރަލް ނެރުއްވާފައިވާ ކޭމްގެ އެ އަހަރުތަކުގެ އަހަރުގެ ކޮމްޕްލަޔަންސް އޮޑިޓްގައި ބުނެފައިވަނީ، އެއޮތޯރިޓީގެ 2023 އަދި 2024 ވަނަ އަހަރުގެ ނިމުނު މާލީ އަހަރުގެ ފާސްކުރެވުނު ބަޖެޓާއި އެ ބަޖެޓުން ހޭދަކުރެވުނު ގޮތުގެ ބަޔާނުގައި ހިމަނާފައިވާ އަދަދުތަކާއި ޕަބްލިކް އެކައުންޓިން ސިސްޓަމުގައި ހުރި ރެކޯޑްތަކުގައި އުނިއިތުރުކަމެއް ހުރިކަމަށް ފާހަގަކުރެވިފައި ނުވާކަމަށެވެ.

އަދި ކޭމްގެ އެ އަހަރުގެ އަހަރުގެ ބަޖެޓުން ހަރަދުތައް ކޮށްފައިވަނީ އެ އިދާރާއަށް ފާސްކޮށްދެއްވި ބަޖެޓްގައި ކަނޑައަޅާފައިވާ ކަންތައްތައް ބަޖެޓްގައި ކަނޑައަޅާފައިވާ މިންވަރަށް ދައުލަތުގެ މާލިއްޔަތު ޤާނޫނާއި ގަވާއިދުތަކާ އެއްގޮތަށެވެ.

ކޮމިޔުނިކޭޝަން އޮތޯރިޓީ އޮފް މޯލްޑިވްސް (ކޭމް) އަށް 2024 ވަނަ އަހަރު 9.07 މިލިއަން ރުފިޔާގެ ބަޖެޓެއް ފާސްކޮށްދިންއިރު ރިކަރަންޓް ހަރަދަކީ 8.5 މިލިއަން ރުފިޔާއެވެ. ކެޕިޓަލް ހަރަދުގެ ގޮތުގައި 520،400 ރުފިޔާ ހޭދަވިއިރު ބާކީވެފައިވަނީ 1،855 ރުފިޔާއެވެ.