ލޯނުގެ ގޮތުގައި ސަރުކާރުން ދޫކުރި ފައިސާގެ އިތުރުންވެސް މިދިޔަ އަހަރު އަހަރުދުވަހުގެ ތެރޭގައި 4 ބިލިއަނަށްވުރެ ގިނަ ރުފިޔާގެ އެހީ ސަރުކާރުން ފެނަކައަށް ދީފައިވާކަމަށް އޮޑިޓް ރިޕޯޓްގައި ބުނެފިއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ފެނަކަ ކޯޕަރޭޝަނުގެ ހާއްސަ އޮޑިޓް ރިޕޯޓްގައި ބުނެފައިވަނީ، 2021 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް ސަރުކާރުން ފެނަކައަށް 4.03 ބިލިއަން ރުފިޔާގެ އެހީދީފައިވާކަމަށެވެ. މީގެ ތެރޭގައި މައިގަނޑު ގޮތެއްގައި ހިމެނެނީ 2019 ވަނަ އަހަރުން ފެށިގެން މުޅި ރާއްޖޭގައި ކަރަންޓްގެ އަގު ހެޔޮކުރުމުެގ ގޮތުން ޓެރިފް ރޭޓްތަކަށް ގެނައި ބަދަލުގެ ސަބަބުން ލިބޭ ގެއްލުންތައް ފޫބެއްދުމަށް ފިނޭންސުން ފެނަކައަށް ދެމުންދިޔަ ސަބްސިޑީއެވެ. މީގެ އިތުރުން ފެނާއި ނަރުދަމާ ސަބްސިޑީގެ ގޮތުގައި ދީފައިވާ ފައިސާ އާއި ކެޕިޓަލް ކޮންޓްރިބިއުޝަނުގެ ގޮތުގައި ދީފައިވާ ފައިސާވެސް ހިމެނެއެވެ.

މީގެ ތެރެއިން 2021 އިން ފެށިގެން 2023 ވަނަ އަހަރުގެ ނިޔަލަށް ސަރުކާރުން ވަނީ ފެނަކައަށް 2.8 ބިލިއަނަށްވުރެ ގިނަ ރުފިޔާގެ އެހީ ދީފައެވެ. 

ފެނަކަ އޮޑިޓް ރިޕޯޓްގައި ބުނެފައިވަނީ، 2023 ވަނަ އަހަރު ސަބްސިޑީގެ ގޮތުގައި ދީފައިވާ ފައިސާގެ ތެރެއިން 669.7 މިލިއަން ރުފިޔާގެ ތެރެއިން 92 އިންސައްތައަށްވާ ފައިސާ ހޭދަކޮށްފައިވަނީ، މުއައްޒަފުންގެ މުސާރައާއި އިނާޔަތްތައް ދިނުމަށްކަމަށެވެ. މީގެ އިތުރުން އޭގެ ކުރިން 2021 ވަނަ އަހަރާއި 2022 ވަނަ އަހަރު ފިނޭންސުން ސަބްސިޑީގެ ގޮތުގައި ފެނަކައަށް ދޫކުރި ފައިސާގެ ބޮޑު އިންސައްތައެއް ހޭދަކޮށްފައިވަނީ މުއައްޒަފުންގެ ހަރަދުތަކަށްކަމަށް އޮޑިޓް ރިޕޮޓްގައި ވަނީ ފާހަގަކޮށްފައވެެ.

އޮޑިޓަރ ޖެނެރަލް ނެރުއްވާފައިވާ ފެނަކައިގެ މި އޮޑިޓް ރިޕޯޓަށް ބަލާއިރު، އެންމެ ފާހަގަކުރެވިގެން ގޮސްފައިވަނީ ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ އެއްބަސްވުން ފެނަކަ ކޯޕަރޭޝަނުން ހަދާފައިވާ ކަމެވެ.