ހަޑިހުތުރު ބަހުން ޒުވާބުކޮށް މާރާމާރީ ހިންގައިގެން ހައްޔަރުކުރި އަންހެން މީހާ ބަންދުން ދޫކޮށްލައިފި އެވެ.
ފުލުހުން ބުނީ މި މަހުގެ 24 ވަނަ ދުވަހުގެ ރޭ 10:38 ހާއިރު ގދ، ތިނަދޫ ގައި މީހަކު ހުއްދަ ނެތި ގެއަކަށް ވަދެ އެގޭގައި ކުޑަކުދީންތަކެއް ތިއްބާ ހަޑި ހުތުރު ބަހުން ޒުވާބުކޮށް މާރާަމާރީ ހިންގައި އިންޒާރު ދީފައިވާ މައްސަލައެއް ހުށައަޅާފައިވާ ކަމަށެވެ.
މި މައްސަލައިގެ ތުހުމަތުގައި ތިނަދޫ ފޫޓްލައިޓް އާގެ އައިމިނަތު ފޭޒްލީން (49އ) ހައްޔަރުކޮށްފައިވާ ކަމަށެވެ. އިއްޔެ މެންދުރު އޭނާ ހައްޔަރުކުރީ ކޯޓް އަމުރެއްގެ ދަށުންނެވެ.
އަދި އޭނާގެ ބަންދާއިމެދު ގޮތް ނިންމަން ކޯޓަށް ހާޒިރުކޮށް ދިނުމުން އެދުނީ ކަފާލާތުގެ ދަށުން ދޫކޮށްލަ ދިނުމެވެ. ކޯޓުން ނިންމީ 10 ގަޑިއިރުގެ ތެރޭގައި 10,000 ރުފިޔާ ކޯޓަށް ދެއްކުމަށެވެ. އެ ފައިސާ މިހާރު ދައްކާފައިވާ ކަމަށާ އޭނާ މިރޭ ދޫކޮށްލާފައިވާ ކަމަށް ފުލުހުން ދެންމެ ޔަގީން ކޮށްދިނެވެ.
މި މީހާ އަކީ ޓިކްޓޮކްގައި ވަރަށް އެކްޓިވް މީހެކެވެ. އޭނާގެ ލައިވްތަކުގައި ހަޑިހުތުރު ބަހުން ވާހަކަ ދެއްކުމާއި ފާހިޝް ވާހަކަތައް ދައްކާ ކަމުގެ ޝަކުވާ ވަރަށް ބޮޑެވެ.
Advertisement
This content is created and paid for by advertisers and does not involve Voice Journalists
