މިދިޔަ ބުރާސްފަތި ދުވަހު އޮޑިޓާ ޖެނެރަލްގެ އޮފީހުން ނެރުނު އޮޑިޓު ރިޕޯޓުގައި ހުރީ ހަޤީގަތާ ހިލާފު މައުލޫމާތު ކަމަށާއި، ފެނަކައިގައި ހުންނެވި ދުވަސްވަރު ނުހައްޤު އެއްވެސް މަންފާއެއް ހޯދައިފައިނުވާނެ ކަމަށް ފެނަކައިގެ ކުރީގެ މެނޭޖިން ޑިރެކްޓަރު އަޙްމަދު ސަޢީދު ވިދާޅުވެއްޖެއެވެ.

މިދިޔަ ބުރާސްފަތި ދުވަހު އޮޑިޓާ ޖެނެރަލްގެ އޮފީހުން ނެރުނު 2021 ވަނަ އަހަރުން 2023 ވަނަ އަހަރުގެ އޮޑިޓް ރިޕޯޓުން ދައްކާ ގޮތުން، މާލިއްޔަތު ޤާނޫނާއި، ފެނަކަ އަދި ޕީސީބީގެ ގައިޑްލައިންތަކާއި ޕްރޮކިއުމަންޓް އުސޫލުތަކާ ޚިލާފު ގިނަ ކަންކަމެއް އޭރުގެ ފެނަކައިގެ ވެރިން ވަނީ ކޮށްފައެވެ.

އެގޮތުން އެ މުއްދަތުގެ ވާދަވެރި ބީލަމުގެ އުސޫލުން ބޭރުން 1.3 ބިލިއަންގެ އެއްބަސްވުން ހެދުމާއި، ސައީދުގެ އާއިލީ ތިން ކުންފުންޏަކަށް 90 އެއްބަސްވުމެއްގެ ދަށުން 31.1 މިލިއަން ރުފިޔާ ދޫކުރުމާއި އަދި އިއުލާނެއް އަދި އެއްބަސްވުމެއް ނެތި، ކުރީގެ މެންބަރު އަނދުން ހުސައިން ޝަހީމުގެ ކުންފުނިން 111 މިލިއަން ރުފިޔާގެ އަޑީ ތެޔޮ ގަތުން ފަދަ ކިތަންމެ ވާހަކަތަކެއް އެ ރިޕޯޓުގައި ހުއްޓެވެ. 

އެކަމާއި ގުޅިގެން މިއަދު ސައީދު ނެރުނު ބަޔާނުގައި ބުނީ، އެކުންފުނީގެ އެމްޑީގެ މަގާމާ ހަވާލުވި ހިސާބުން ފެށިގެން 17 ނޮވެމްބަރު 2023ގެ ނިޔަލަށް ވެސް، އެ ކުންފުނިން ކުރި ހުރިހާ ޕްރޮކިއުމަންޓްގެ މުއާމަލާތްތައް ހިންގައިފައިވަނީ އެ ކުންފުނީގެ އިންޓާނަލް އުސޫލުތަކާއި ޤަވާއިދުތަކާއި އަދި އެކުންފުނީގެ ބޯޑުން އެކަށައަޅާފައިވާ އިދާރީ އޮނިގަނޑުގެ ތެރެއިން ކަމަށެވެ. 

އަދި އެ އުސޫލުތަކާއި ޚިލާފަށް އެއްވެސް މުދަލެއް، ޚިދުމަތެއް، ކޮންޓްރެކްޓެއް އަދި ޕްރޮޖެކްޓެއް ވެސް އެއްވެސް ބަޔަކަށް ދީފައިނުވާނެ ކަމަށް ސަޢީދު ވިދާޅުވިއެވެ.

ސައީދު ވިދާޅުވީ، އެކުންފުނީގައި މަސައްކަތްކުރެއްވިއިރު ދައުލަތުގެ އެއްވެސް ފައިސާއެއް އަމިއްލަ ބޭނުމަށް ބޭނުންކޮށްފައިނުވާނެ ކަމަށާއި، ނުޙައްޤު އެއްވެސް މަންފާއެއް ވެސް ހޯދައިފައިނުވާނެ ކަމަށެވެ.

އެ ބަޔާނުގައި ސައީދު ވަނީ ޒަމާނުއްސުރެ ދިވެހި ރައްޔިތުންނަށް ތަކުލީފުތަކަށްވެފައި އޮތް ކަރަންޓުގެ މައްސަލައަށް ޙައްލެއް ހޯދައްވައިދެއްވިކަމަށްޓަކައި އުފާކުރައްވާ ކަމަށް ވިދާޅުވެފައެވެ. އަދި އެފަދަ ރިޕޯޓުތަކުގެ ސަބަބުން އޮޑިޓާ ޖެނެރަލްގެ އޮފީހަށް ރައްޔިތުން ކުރާ އިތުބާރު ގެއްލޭނެ ކަމަށް ވެސް ސަޢީދު ވަނީ ވިދާޅުވެފައެވެ.