ޣައްޒާ ހިސާރުކޮށްފައި އޮންނައޮތުން ނިމުމަކަށް ގެނައުމަށް މަސައްކަތްކުރަމުން އަންނަ ފްލޮޓީނާ މޫވްމަންޓްގެ ޔޮޓްތައް ޔަހޫދީންގެ އިންޒާރަށް ބެލުމެއްނެތި ޔެލޯ ލައިން ހުރަސްކޮށްފިއެވެ.
ފްލޮޓީލާ މޫވްމަންޓުގެ ޔޮޓްތައް ޣައްޒާއާ ދިމާލަށް މިސްރާބުޖެހުމާއެކު މީގެ ދުވަސްތަކެއްކުރިން އިސްރާއީލްގެ އަސްކަރިއްޔާއިން ވަނީ އެ ހަރަކާތުގެ ބައިވެރިންނަށް އިންޒާރުދީ ބިރުދައްކަން ފަށާފައެވެ. އެގޮތުން ރޭގަނޑުގެ ގަޑިތަކުގައި ޑްރޯން ފޮނުވައި ބައެއް ޔޮޓްތަކަށް ހަމަލާދިނުންފަދަ ކަންކަން ކޮށްފައިވާއިރު، ޔޮޓްތަކުގެ މުއާސަލާތީ ހިދުމަތްތައް ކަނޑާލުމަށް ވަނީ މަސައްކަތްކޮށްފައެވެ.
ފްލޮޓީލާ މޫވްމަންޓްގެ ފަރާތުން ބުނެފައިވަނީ އަންނަ ބްރާސްފަތި ހިސާބުގައި ރެޑް ލައިން ހުރަސްކުރެވޭވަރު ވާނޭކަމަށެވެ. ފްލޮޓީލާ މޫވްމަންޓްގައި ހިމެނޭ ޔޮޓްތައް ޔެލޯލައިން ހުރަސްކޮށްފައިވާކަމަށް މި ހަރަކާތުގައި ރާއްޖޭގެ ފަރާތުން ބައިވެރިވާ އިންޓަރނޭޝަނަލް އެއިޑް ކެމްޕެއިންގެ ފަރާތުންވެސް ވަނީ ޔަގީންކޮށްދީފައެވެ.
އިސްރާއީލުން ވަނީ ޢައްޒާގެ ކަނޑުގެ ސަރަހައްދަށް ޔޮޓްތައް ނުވަނުމަށް މީގެކުރިން އިންޒާރުދީފައެވެ. ނަމަވެސް ފްލޮޓީލާ މޫވްމަންޓްގެ ބައިވެރިން ވަނީ އިސްރާއީލްގެ އަސްކަރިއްޔާއިން ދެމުންދާ އިންޒާރުތަކަށްވުރެ، ޣައްޒާގެ ރައްޔިތުންގެ ހިސާރު ނައްތާލުން މުހިންމުކަމަށް ބުނެ، ދަތުރު ކުރިއަށްގެންދާނޭކަމަށް ބުނެފައެވެ.
ޖީއެސްއެފުން ވަނީ އިސްރާއީލް ސިފައިން ދްރޯން މެދުވެރިކޮށް ޔޮޓްތަކަށް ހަމަލާދޭތީވެ، މީގެ ކުރިން އެކަން ބައިނަލްއަޤްވާމީ ފަރާތްތަކުގެ ސަމާލުކަމަށްވެސް ގެނެސްފައެވެ. މީގެ އިތުރުން ސްޕެއިން އަދި އިޓަލީ ފަދަ ޤައުމުތަކަށް ނިސްބަތްވާ ޔޮޓްތަކުގެ ބައިވެރިން ވަނީ އެ ޤައުމުތަކުގެ އަސްކަރިއްޔާގެ ސަމާލުަކަމަށް އެކަން ގެނެސްފައެވެ.
ފްލޮޓީނާ މޫވްމަންޓަކީ ޣައްޒާ މިނިވަންކުރުމުގެ ގޮތުން ބައިނަލްއަޤްވާމީ އެކްޓިވްސްޓުންތަކެއް ހިމެނޭ ގޮތަށް ކުރިއަށްގެންދާ މޫވްމަންޓެކެވެ. މި ހަރަކާތުގައި ދުނިޔޭގެ އެކި ކަންކޮޅުތަކުން އެތައް ސަތޭކަ އުޅަނދު ބައިވެރިވެއެވެ. މި އުޅަނދުތަކުގެ އެންމެބޮޑު އެއް ބޭނުމަކީ ޣައްޒާ ހިސާރު ނިމުމަކަށް ގެނެސް، ޣައްޒާއަށް އެހީގެ ސާމާނު ވެއްދުމެވެ.
Advertisement
This content is created and paid for by advertisers and does not involve Voice Journalists
