ތ. މަޑިފުށީގެ މަގުތައް ތަރައްޤީ ކުރުމުގެ ޢަމަލީ މަސައްކަތް ރަސްމީކޮށް ފެށުމުގެ ރަސްމިއްޔާތު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތ. އަތޮޅުގެ ރަށްތަކަށް ކުރައްވާ ރަސްމީ ދަތުރުފުޅުގެ ތެރެއިން އިއްޔެ ވަނީ ޝަރަފްވެރިކޮށްދެއްވައިފައެވެ.

މި މަސައްކަތް ފައްޓަވައިދެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބްއެވެ.

މަޑިފުށީގެ މަގުތައް ތަރައްޤީކުރުމުގެ މި މަސައްކަތަކީ ސަރުކާރުން ރައްޔިތުންނަށް ދިރިއުޅުމަށް ފަސޭހަ، ތަރައްޤީއާއި ކުރިއެރުން ގެނައުމަށް ކުރަމުންދާ މަސައްކަތްތަކުގެ ތެރެއިން މުހިންމު މަޝްރޫޢެކެވެ. މި މަސައްކަތް އެވޯޑްކުރެވިފައިވަނީ 82,938,294.36 ރުފިޔާއަށެވެ.

މި މަޝްރޫޢުގެ މަސައްކަތް ނިންމުމަށްޓަކައި 730 ދުވަހުގެ (ދެ އަހަރު) މުއްދަތެއް ވަނީ ކަނޑައަޅާފައެވެ. މަސައްކަތް ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި ވިލުފުށި ދާއިރާގެ މެންބަރު ޙަސަން ވަޙީދު އާއި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރުޑީސީ) ގެ މެނޭޖިންގ ޑިރެކްޓަރ އިބްރާހީމް ނަޡީމް އަދި މަޑިފުށީ ކައުންސިލްގެ ރައީސް އަޙްމަދު ނަސީތު ބައިވެރިވެވަޑައިގެންނެވިއެވެ.

މަޑިފުށީގެ މަގުތައް ތަރައްޤީ ކުރުމުގެ މަސައްކަތަކީ ރަށުގެ ރައްޔިތުންނަށް ދިގު މުއްދަތަކަށް ފައިދާ ކުރާނެ، އަދި ދަތުރުފަތުރުގެ ފަސޭހަތައް އިތުރުކޮށް ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް ބޮޑު ބާރަކަށް ވާނެ މަސައްކަތެކެވެ.