ޣައްޒާއަށް ބޭނުންވާ އިންސާނީ އެހީތައް ހިފައިގެން ޣައްޒާއަށް ދަތުރުކުރަމުންދާ ގްލޯބަލް ސުމުދް ފްލޮޓިލާ، ބައިނަލްއަޤްވާމީ ކަނޑުގެ ސަރަޙައްދުން އިޒްރޭލުން ހިފަހައްޓައި ޙިސާރުކުރުން ރައީސް ޑރ. މުޙައްމަދު މުޢިއްޒު ކުށްވެރިކުރައްވައިފިއެވެ.
"އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، މިފަދަ ބިރުދެއްކުމުގެ އަމަލުތަކަކީ ބަލައިގަނެވޭނެ ކަމެއް ނޫން ކަމަށާއި މިނިވަންކަމާއި އަސާސީ ޒަރޫރީ ބޭނުންތައް ގެއްލިފައިވާ މީހުންނަށް އެހީ ފޯރުކޮށްދޭ އިންސާނީ އެފަދަ ފަރާތްތަކަށް ހަމަލާ ދިނުމަކީ އިންސާނީ ހައްގުތަކާއި ބައިނަލްއަގުވާމީ ގާނޫނުތަކާ ވަރަށް ބޮޑަށް ހިލާފު އަމަލެއް ކަމަށެވެ.
އަދި އިންސާނީ ކަރާމާތަށް އުނިކަން އަންނަ ފަދައިން އިޒްރޭލުން ކުރަމުންދާ ޖަރިމާތަކުގެ ސަބަބުން ބައިނަލްއަގުވާމީ މައިދާނުގައި އިޒްރޭލު ވަރަށް ބޮޑަށް އެކަހެރިވެފައިވާ ކަމަށާއި، އިޒްރޭލުން ބައިނަލްއަޤްވާމީ ގާނޫނުތަކާ ޚިލާފު އަމަލުތައް ހިންގަމުންދާތީ އެކަމަށް ހަރުކަށި ފިޔަވަޅު އެޅުމަށް ބައިނަލްއަޤްވާމީ މުޖްތަމަޢަށް ރައީސް ވަނީ ގޮވާލައްވާފައެވެ.
އެއާއެކު ރައީސް ވަނީ ފަލަސްޠީނުގެ ރައްޔިތުންނަށް އިންސާނީ ޙައްޤުތަކާއި، ޢަދުލުވެރިކަމާއި، މިނިވަންކަން ޤާއިމުކުރުމަށް ކުރަމުންދާ މަސައްކަތްތަކުގައި ފަލަސްޠީނުގެ ރައްޔިތުންނާއެކު ރާއްޖެއިން އަބަދުވެސް ސާބިތުކަންމަތީ ދެމިތިބޭނެ ކަމުގައި ވިދާޅުވެފައިވެއެވެ.
ރައީސް އެދަައިން ވިދާޅުވިއިރު، ގްލޯބަލް ސުމޫދު ފްލޮޓިއްލާގެ 13 ބޯޓެއް ޙިސާރުކޮށް، އެ ބޯޓުތަކުން ދަތުރުކުރި 160 މީހެއް އިޒްރޭލުން ރޭ ވަނީ ހައްޔަރުކޮށްފައެވެ. އެއީ ގާާތްގަޑަކަށް 25 ޤައުމެއްގެ މީހުންނެވެ.
ބައިނަލްއަގުވާމީ ކަނޑުތަކުގައި އިޒްރޭލުން ކުރި އެ ކުށަކީ ބައިނަލްއަގުވާމީ ޤާނޫނާ ޚިލާފު ޖަރީމާއެއްކަން ފާހަގަކުރެވެއެވެ.
އެ ބޯޓުތައް ހައްޔަރުކުރި ނަމަވެސް، 44 ހަތަރު ބޯޓު ހިމެނޭ އެ ފްލީޓުގެ ބާކީ އޮތް 30 ބޯޓު ޣައްޒާއަށް ދަނީ ދަތުރުކުރަމުންނެވެ. އިތުރު ހުރަހެއް ނެތި އެ ބޯޓުތަކަށް ދަތުރުކުރެވިއްޖެ ނަމަ، ކުރިޔަށް އޮތް ފަސް ގަޑިއިރުގެ ތެރޭގައި އެ ބޯޓުތަކަށް ޣައްޒާއަށް ވަދެވޭނެ ކަމަށް އެ ހަރަކާތުގައި ބައިވެރިވާ ޓީމުތަކުން ދަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
