ފްލޮޓިއްލާގެ ބަހުސްގައި ފަލާޙް ވިދާޅުވީ އެމްޑީޕީން އިޒްރޭލުގެ ޕާސްޕޯޓު ހުއްދަކުރާނެ ކަމަށް
ފްލޮޓިއްލާގައި ހުރި ދިވެއްސަށް ރައްކާތެރިކަން ދޭން އެދި ކުއްލި މައްސަލައެއްގެ ގޮތުގައި އެމްޑީޕީގެ މެންބަރަކު ހުށަހެޅުއްވީ ސިޔާސީ ނިޔަތެއް އޮވެގެން ކަމަށާއި، އެމްޑީޕީގެ ވެރިކަމެއްގައި އިޒްރޭލުގެ ޕާސްޕޯޓު ރާއްޖޭގައި ހުއްދަކުރާނެ ކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް ވިދާޅުވެއްޖެއެވެ.
ފަލާޙް އެފަދައިން ވިދާޅުވީ މިހާރު ޣައްޒާއަށް ކާބޯތަކެއްޗާއި ފެނާއި ބޭސް ހިފައިގެން ދަތުރުކުރާ ގްލޯބަލް ފްލޮޓިއްލާގައި ދިވެއްސަކު ހުރުމުން އޭނާއަށް ދޭންޖެހޭ ރައްކާތެރިކަން ކަށަވަރުކުރުމަށް އެދި މަޖިލީހަށް ހުށަހެޅި ކުއްލި ބަހުސްގައި ވާހަކަފުޅު ދައްކަވަމުންނެވެ.
އެ ކުއްލި މައްސަލަ ބަލައިގަތުމަށްފަހު އެންމެ ފުރަތަމަ ވެސް ވާހަކަފުޅު ދައްކަވަމުން ފަލާޙް ވިދާޅުވީ، އެމްޑީޕީގެ މެންބަރަކު އެ މައްސަލަ ހުށަހެޅުއްވީ ހެޔޮ ނިޔަތުގައި ކަމަށް ހީފުޅުކުރެއްވި ނަމަވެސް މެންބަރު މައުރޫފް "ވާހަކަފުޅު ދެއްކެވި ގޮތުން" އެއީ ކުށްހީއެއްކަން ކަށަވަރުވެފައިވާ ކަމަށެވެ.
އެގޮތުން ފަލާޙް ވިދާޅުވީ، އެމްޑީޕީގެ ފުރަތަމަ ވެރިކަމުގައި އިޒްރޭލާއި އެކު ސިޔާސީ ގުޅުން ޤާއިމްކުރުމަށް ވަރަށް ބޮޑަށް މަސައްކަތްކުރި ކަމަށާއި، އެކަމުގެ ތެރެއިން ރާއްޖެއާއި އިޒްރޭލާއި ދެމެދު ސީދާ ދަތުރުތައް ބޭއްވުމަށް ވެސް އެ ސަރުކާރުން ވަރަށް މަސައްކަތްކުރި ކަމަށެވެ. ފަލާހް ވިދާޅުވީ އެއަށް ފަހު އެކި ވެރިކަންތައް އައި ނަމަވެސް، މިއަދާއި ހަމައަށް ވެސް އިޒްރޭލާއި ދެކޮޅަށް އެންމެ ބޮޑު އެއް ފިޔަވަޅު އެޅި ސަރުކާރަށް މި ސަރުކާރު ވާނެ ކަމަށެވެ.
މިހާ ހިސާބަށް އެކި ސަރުކާރުތައް އެކި ގޮތަށް ބަދަލުވަމުން އައިސް މިއަދާއި ހަމައަށް އައިއިރުގައި އަޅުގަނޑު ދަންނަވާލާނީ މުޅި ދުނިޔޭގައި ވެސް ފާހަގަކުރެވޭ އެންމެ މުހިންމު އެއް ފިޔަވަޅޭ އިޒްރޭލާ ދެކޮޅަށް އެޅި އެއް ޤައުމަކަށް ވާނީ ދިވެހި ޤައުމު، މިއަދުގެ މި ސަރުކާރުން. އަޅުގަނޑުމެންގެ ލޮބުވެތި ރައީސުލްޖުމްހޫރިއްޔާ. އިޒްރޭލުގެ އެއްވެސް ރައްޔިތަކަށް އިޒްރޭލުގެ ޕާސްޕޯޓުގައި މިހާރު އެތެރެއެއް ނުވެވޭނެ
އިނގުރައިދޫ ދާއިރާގެ މެންބަރު އިބްރާހިމް ފަލާޙް
އެކަމަށްޓަކައި ރައީސްއަށް ޝުކުރު އަދާކުރައްވަމުން ފަލާޙް ވިދާޅުވީ ކުރިޔަށް އެމްޑީޕީގެ ވެރިކަމެއް އައިސްފިނަމަ، މި ސަރުކާރުން ބޭންކޮށްފައިވާ އިޒްރޭލުގެ ޕާސްޕޯޓު އެމްޑީޕީގެ ސަރުކާރެއްގައި ހުއްދަ ކުރާނެ ކަމަށެވެ.
އެގޮތުން އެމްޑީޕީގެ ކޮންޓްރޯލް އޮތް 19ވަނަ މަޖިލީހުގައި ވެސް އިޒްރޭލުގެ ޕާސްޕޯޓު ބޭންކުރުމުގެ ނަމުގައި އެ މައްސަލަ ދައުރު ނިމެންދެން މަޖިލީހުގައި ކުރިޔަށް ގެންދިޔަ ކަމަށް ވެސް މެންބަރު ވިދާޅުވިއެވެ.
އެހެންނަމަވެސް ދިވެހި ރައްޔިތުން އެމްޑީޕީން ދައްކާ ވާހަކަ ޤަބޫލުނުކުރާނެކަން ވަރަށް ސާފުކަމަާށާއި، ރޭ ޕީއެންސީން ބޭއްވި ޖަލްސާއިން އެކަން ސާފުވާކަމަށް ވެސް މެންބަރު ވިދާޅުވިއެވ.
ދިވެހި ރައްޔިތުން މިތިބީ އެމްޑީޕީން މިޖަހާ ސަކަރާތުގައި މި ބޭފުޅުން މިދައްކާ މޮޔަ ވާހަކަތަކުގައި ޖެހިގެން އެ އަވާގައެއް ނޫން. ދިވެހި ރައްޔިތުން ތިބި ގޮތް ވަރަށް ސާފުވާނެ. ފިއްޓޭ އެ ވަޑައިގަންނަވަނީ ބޭރަށް، ބަހުސެއް ނުކުރައްވާނެ މިކަމަކާ. މިހާރު ވެސް އަޅުގަނޑަށް އޮތް އެންމެ ބިރަކީ އިއްޒަތްތެރި ރައީސް އެމްޑީޕީއަށް ޒަމާނެއްގެ ކޮޅުން ވެސް ވެރިކަން ލިބިއްޖެކަމަށްވަންޏާމުން އަޅުގަނޑުމެން މި މަނާކުރި ޕާސްޕޯޓު އިޒްރޭލުގެ ރައްޔިތުންނަށް ހުއްދަދީ އަލުން ދިވެހިރާއްޖޭގެ ބީޗުތަކުގައި މޫދުގައި ފީނުމުގެ ހުއްދަ އިޒްރޭލުގެ ރައްޔިތުންނަށް ދޭނެ. ހުއްދަކުރާނެ އިނގޭތޯ. ހުއްދަ ކުރާނެ. މިކަމާ ދެކޮޅެއް ނަހަދާނެ އެއްވެސް މެންބަރަކު.
އިނގުރައިދޫ ދާއިރާގެ މެންބަރު އިބްރާހިމް ފަލާޙް
އެހެން ނަމަވެސް ފަލާޙް ވިދާޅުވީ ދިވެހީންނަކީ އަބަދުވެސް ފަލަސްތީނާއެކު ތިބި ބައެއް ކަމަށާއި، އެންމެ ކުޑައިރުއްސުރެ ވެސް އެކަން އޮންނަނީ އެހެން ކަމަށެވެ. އެގޮތުން އަބަދުވެސް ދިވެހީންނަށް ލިބެން އޮންނަ އެހީއެއް އަބަދުވެސް ދިވެހި ރައްޔިތުން ދަނީ ފޯރުކޮށްދެމުން ކަމަށް މެންބަރު ވިދާޅުވިއެެވެ.
މިއަދު ކެޔޮދޫ ދާއިރާގެ އެމްޑީޕީ މެންބަރު މައުރޫފް ޒާކިރު މަޖިލީހަށް ހުށަހެޅުއްވި ކުއްލި މައްސަލައިގައި ވިދާޅުވީ އިޒްރޭލާއި އަދި އިޒްރޭލަށް ވާގިވެރިވާ ގައުމުތަކުން ސުމުދު ފްލޮޓިލާތަކަށް ހުރަސްއަޅަން މަސައްކަތްކުރަމުން އަންނަ ކަމަށާއި، އެހެންކަމުން އެ އަމަލުތައް ކުށްވެރިކުރުމަށާއި އެ އުޅަނދުތަކުގައި ތިބި ދިވެހީންގެ ރައްކާތެރިކަން ކަށަވަރުކުރަން ޖެހޭ ކަމަށެވެ.
އެގޮތުން ފަލަސްތީނުގެ ރައްޔިތުންނަށް އިންސާނީ އެހީ ފޯރުކޮށްދިނުމަށް ދަތުރުކުރާ ސުމުދު ފްލޮޓިލާގައި ދިވެހިންވެސް ބައިވެރިވެފައިވާއިރު، މި ދަތުރަށް ހުރަސްއެޅުމަކީ އިންސާނިއްޔަތާ ޚިލާފު ކަމެއް ކަމަށް މެންބަރުން ފާހަގަކުރައްވައެވެ. އަދި މި ކަމުގައި ސަރުކާރުން އަޅަންޖެހޭ ފިޔަވަޅުތައް އެޅުމަށްވެސް ގޮވާލައްވާފައިވެއެވެ.
Advertisement
This content is created and paid for by advertisers and does not involve Voice Journalists
