ނެޝަނަލް ޕޭ ކޮމިޝަނުގެ ހުއްދަނެތި އިންފޮމޭޝަން ކޮމިޝަނަރު (އައިކޮމް) އޮފީހުގެ މުއައްޒަފުންނަށް ލިވިން އެލަވަންސްދިން މައްސަލައެއް ފެންމަތިވެއްޖެއެވެ.

އައިކޮމްގެ މި މައްސަލަ ފެންމަތި ވެފައިވަނީ، އޮޑިޓަރ ޖެނެރަލް ނެރުއްވާފައިވާ އެ އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓްގައެވެ. އިންފޮމޭޝަން ކޮމިޝަނަރުގެ އޮފީހުގެ އެ އޮޑިޓް ރިޕޯޓްގައި ބުނެފައިވަނީ، އެ އޮފީހުން 2024 ވަނަ އަހަރުގެ ޖެނުއަރީމަހުން ފެށިގެން މިއަހަރުގެ ޖުލައިމަހުގެ 31 ވަނަ ދުވަހާ ހަމަޔަށް ލިވިން އެލަވަންސްގެ ގޮތުގައި ކޮންމެ މުއައްޒަފަކަށް މަހަކަށް 3000 ރުފިޔާ ދީފައިވަނީ، ދައުލަތުގެ މުސާރައިގެ ސިޔާސަތުގެ ޤާނޫނާ ހިލާފަށް ކަމަށެވެ. އޮޑިޓް ރިޕޯޓްގައި އެލަވަންސް ދިން މުއްދަތު ބަޔާންކޮށްފައިވަނީ އޮޑިޓްކުރި މުއްދަތަށެވެ. 

އޮޑިޓް ރިޕޯޓްގައި ވަނީ އުސޫލާ ހިލާފަށް ދިން އެލަވަންސް މުއައްޒަފުންގެ އަތުން ހޯދުމަށް އަންގާފައެވެ. އެގޮތުން އެ ފައިސާ ހޯދާނެގޮތަކާއި ގުޅޭގޮތުން ފިނޭންސް މިނިސްޓްރީއާ ވާހަކަދައްކައިގެން ކުރިއަށްދިއުމަށް ވަނީ އިލްތިމާސްކޮށްފައެވެ.

އިންފޮމޭޝަން ކޮމިޝަނަރުގެ އޮފީހުން ކުރި ހަރަދުތަކާ ގުޅޭގޮތުން އޮޑިޓަރ ޖެނެރަލް ވިދާޅުވެފައިވަނީ، އެލަވަންސް މައްސަލަ ފިޔަވައި ނިމިގެންދިޔަ މާލީ އަހަރު އެ އޮފީހުގެ މާލީ މުއާމަލާތްތައް ހުރީ ބަޖެޓްގައި ކަނޑައަޅާފައިވާ މިންވަރަށް ދައުލަތުގެ މާލިއްޔަތު ޤާނޫނާ އެއްގޮތަށް ކަމަށެވެ.