'ލޫޓުވާލައިފި" ނަމުގައި އިދިކޮޅު އެމްޑީޕީން މިރޭ ބޭއްވި މުޒާހަރާ ނިންމާލައިފި އެވެ.

މިރޭގެ މުޒާހަރާ ފުރަތަމަ ފެށީ އާޓިފިޝަލް ބީޗު ސަރަހައްދުގަ އެވެ. މިރޭގެ މުޒާހަރާއަށް އެތައް ހާސް ބަޔަކު އެއްވި އެވެ. އާޓިފިޝަލް ބީޗް ސަރަހައްދުގައި މުޒާހަރާގެ ބައިވެރީންނާއި އެމްޑީޕީގެ އިސް ބޭފުޅުން ވާހަކަ ދެއްކެވި އެވެ.

އަދި އޭގެ ފަހުން ގޮވާލީ މަގުމައްޗަށް ނިކުތުމަށެވެ. އެހެން ކަމުން މުޒާހަރާގެ ބައިވެރީން ވަނީ މަޖީދީމަގަށް ނިކުމެފަ އެވެ. އޭރު ފުލުހުން ވަނީ ބައެއް ސަރަހައްދުތައް ބަަންދުކޮށްފަ އެވެ. ވަރަށް ގިނަ އަދަދެއްގެ ފުލުހުން ޝީލްޑާއެކު ހަރަކާތްތެރިވަމުން ދިޔަ އެވެ.

އެމްޑީޕީން މިރޭ ބޭއްވި މުޒާހަރާ -- ފޮޓޯ: ވޮއިސް

މުޒާހަރާގެ ބައިވެރީން ކުރިއަށްދާން ފުުރުސަތު ނުދިނުމުން ހަމަނުޖެހުން އުފެދުނެވެ. ބައެއް މީހުން ވަނީ ބެރިކޭޑްތައް އުކާލާފަ އެވެ.

އަދި ފުލުހުން ގެންގުޅޭ ޝީލްޑްތަކުގައި ތަޅާ ހަދާފައިވެ އެވެ. 

އެމްޑީޕީން މިރޭ ބޭއްވި މުޒާހަރާ -- ފޮޓޯ: ވޮއިސް

އެއްވުމުގެ ބައިވެރިން ހުއްޓުވަން ފުލުހުން ވަނީ ކަރުނަ ގޭސްވެސް ޖަހާފަ އެވެ. މުޒާހަރާގެ ބައިވެރިން ވަނީ ފުލުހުންނާއި ދިމާއަށް އެކި އެއްޗެހި އުކާފަ އެވެ.

މުޒާހަރާގެ ބައިވެރީން ވަނީ ދެތީން ގަޑިއިރު މަޖީދީމަގުގައި ހަރަކާތްތެރިވެފަ އެވެ. އަދި ޕާޓީގެ ލީޑާޝިޕްގެ ބޭފުޅުން ވަނީ މަގުމަތީ އިށީންދެ ތިބެ އަޑުއުފުލާފަ އެވެ.

އެމްޑީޕީން މިރޭ ބޭއްވި މުޒާހަރާ -- ފޮޓޯ: ވޮއިސް

އޭގެ ފަހުން އެމްޑީޕީން ވަނީ މުޒާހަރާ ރަސްމީކޮށް ނިންމާލިކަން އިއުލާނުކޮށްފަ އެވެ. އޭގެ ކުރީން ހާއްސަ ދުއާއެއް ކުރުން އޮތެވެ.

އެ ޕާޓީގެ ލީޑާޝިިޕުން ބުނީ މިރޭގެ މުޒާހަރާ އަކީ "ވޯމްއަޕް" އެއް ކަމަށެވެ. 

ފުލުހުން ބުނީ އެމްޑީޕީން މިރޭ މާލޭގައި ކުރިއަށް ގެންދިޔަ އެއްވުމުގައި ކުރީން ހުއްދަ ދީފައިވާ ރޫޓާއި ހިލާފަށް މަޖީދީމަގުން ކުރިއަށްދާން ފެށުމުން އެ ގޮތަށް އަމަލު ނުކުރުމަށް ތަކުރާރުކޮށް ނަސޭހަތްތެރިވެ އިންޒާރު ދީފައިވާ ކަމަށެވެ.

އެމްޑީޕީން މިރޭ ބޭއްވި މުޒާހަރާ -- ފޮޓޯ: ވޮއިސް

ނަމަވެސް އެކަމަށް އިޖާބު ނުދީ މުޒާހަރާގެ ބައިވެރީން ފުލުހުންނާއި ދިމާއަށް ގަލާއި ފެންފުޅި އުކައި, ފުލުހުންގެ އާލަތްތައް އަތުލަން މަސައްކަތް ފުލުހުންގެ ވާޖިބު އަދާކުރުމަށް ހުރަސްއަޅާފައިވާ ކަމަށެވެ.

އެހެން ކަމުން އެ އަމަލުތައް ހިންގި މީހުންނާއެކު ގާނޫނީ ފިޔަވަޅު އަޅާނެ ކަމަށް ބުންޏެވެ.

އެމްޑީޕީން މިރޭ ބޭއްވި މުޒާހަރާ -- ފޮޓޯ: ވޮއިސް

މިރޭގެ އިހްތިޖާޖުގައި ކުރީގެ ރައީސް ސޯލިހާއި ނާއިބު ރައީސް ފައިސަލް ނަސީމާއި އެމްޑީޕީގެ ވެރީންނާއި މަޖިލީސް މެންބަރުންނާއި އެ ޕާޓީގެ ކައުންސިލަރުންނާއި މޭޔަރުންނާއި ވަރަށް ގިނަ އަދަދެއްގެ އާންމުން ބައިވެރިވި އެވެ. މުޒާހަރާގެ ތެރެއިން ބައެއް މެންބަރުންނާއި އާންމުން ހައްޔަރު ކޮށްފައިވެ އެވެ.