މާލޭގައި ރޭ ކުރިއަށްދިޔަ މުޒާހަރާގެ ބައިވެރިން ހުއްޓުވުމަށް ފުލުހުންގެ އޮފިސަރުން އަމަލުކުރީ ކެތްތެރިކަމާއި ޕްރޮފެޝަނަލްކޮށްކަމަށް ފުލުހުންގެ އިދާރާއިން ބުނެފިއެވެ.

އެމްޑީޕީން ރޭ މާލޭ އާޓިފިޝަލް ބީޗް ކުރިމަތިން އޮންނަ މަޖީދީމަގުގައި ކުރިއަށްދިޔަ މުޒާހަރާގައި ފުލުހުންގެ އަމަލުތައް ހުރީ އުސޫލުން ބޭރުންކަމަށްބުނެ އެޕާޓީން ވަނީ ފުލުހުންނަށް ވަރަށްބޮޑަށް ފާޑުކިޔާފައެވެ. މިކަމާ ގުޅިގެން ފުލުހުންގެ އިދާރާއިން ނެރުނު ބަޔާނުގައި ބުނެފައިވަނީ، މުޒާހަރާގައި ކަންކަން ހިނގާދިޔަގޮތަށް ބަލާއިރު، ފުލުހުންގެ ފަރާތުން އަމަލުކޮށްފައިވާނީ ނަސޭހަތާއި އިންޒާރު ދިނުމަށްފަހު، އެ އެއްވުން ހުއްޓުވުމުގައި ޤާނޫނު ހުއްދަކުރާ ބާރުގެ ބޭނުން ކެތްތެރިކަމާއި ޕްރޮފެޝަނަލް ކަމާއެކުގައިކަމަށެވެ.

ފުލުހުން ބުނީ އެމްޑީޕީން ރޭ ކުރިއަށްގެްނދިޔަ މުޒާހަރާގައި ފުލުހުންނާ އެއްބަސްވެފައިވާގޮތާ ހިލާފަށް މުޒާހަރާގެ ބައެއް ބައިވެރިން ފުލުހުންނާ ކުރިމަތިލައި މަޖީދީމަގުން ދިއުމަށް މަސައްކަތްކޮށްފައިވާކަމަށެވެ. ފުލުހުން ބުނީ މުޒާހަރާގެ ބައިވެރިންނަށް ތަކުރާރުކޮށް ނަސޭހަތްދެމުން ދަނިކޮށް، ފުލުހުން ބޭނުންކުރާ ޝީލްޑްތައް އަތުލުމަށް މަސައްކަތްކޮށް، ބެރިކޭޑްތައް އުކާލައި، ޤާނޫނާ ހިލާފް ހަރަކާތްތަކެއް ހިންގާފައިވާކަމަށެވެ. 

ރޭ ކުރިއަށްދިޔަ މުޒާހަރާގެ ތެރެއިން... ފޮޓޯ: ވޮއިސް

ފުލުހުންގެ ބަޔާނުގައި ބުނީ އެއްވުން ހުއްޓުވުމުގައި ފުލުހުން ބާރުގެ ބޭނުންކޮށްފައިވާނީ ފުލުހުންގެ ގާނޫނުން މަތިކޮށްފައިވާ އަދި ފުލުހުންނަށް ލިބިދޭ ޤާނޫނީ ބާރާއި އިހްތިޔާރުގެ ތެރެއިންކަމަށެވެ. އަދި ބާރުގެ ބޭނުންކުރުމުގައި ނަގަހައްޓަންޖެހޭ އަސާސްތައް ނަގަހައްޓާފައިވާނޭކަމަށްވެސް ފުލުހުން ވަނީ ބުނެފައެވެ.

ރޭގެ މުޒާހަރާގައި ފުލުހުންގެ އަމުރަށް ނުކިޔަމަންތެރިވި 7 މީހަކު ވަނީ ހައްޔަރުކޮށްފައެވެ. އޭގެ ތެރެއިން އެކަކު ދޫކޮށްލާފައިވާއިރު، އަނެއް 6 މީހުންނަށް ވަނީ ކްރިމިނަލް ކޯޓުން 15 ދުވަހުގެ ބަންދުގެ މުއްދަތު ޖަހާފައެވެ.