ނަސްރު ބޯޓު އަޑިއަށް ދިޔުމުން ރައްޔިތުންނަށް ލިބުނު ގެއްލުން ކުމުންދޫ ކައުންސިލުން ބަލަނީ
ހދ. ނޭކުރެންދޫއަށް ނިސްބަތްވާ ނަސްރު ބޯޓު އަޑިއަށް ދިޔުމާއި ގުޅިގެން އެ އަތޮޅު ކުމުންދޫގެ ވިޔަފާރިވެރިންނާއި ރައްޔިތުންނަށް ލިބުނު މާލީ ގެއްލުން ދެނެގަތުމަށް ކުމުންދޫ ކައުންސިލުން އިއުލާނުކޮށްފިއެވެ.
މިދިޔަ ބުރާސްފަތި ދުވަހު ނަސްރު ބޯޓު އަޑިއަށް ގޮސްފައިވަނީ މޫސުން ގޯސްވެފައިވަނިކޮށް މުދާ ބަރުކޮށްގެން މާލެ އިން ނައިފަރަށް ދަތުރުކުރަނިކޮށެވެ. އެ ބޯޓު ދިޔަވާން ފެށިއިރު 7 މީހަކު އެ ބޯޓުގައި ތިއްބެވެ. އެ އެންމެން ވެސް ސިފައިން ވަނީ ސަލަމާތްކޮށްފައެވެ.
އެ ޙާދިސާއާއި ގުޅިގެން ކުމުންދޫ ކައުންސިލުން މިއަދު ކުރި އިއުލާނެއްގައި ބުނީ، އެ މައުލޫމާތު އެއްކުރަނީ ކައުންސިލުން ތައްޔާރުކުރާ ރިޕޯޓަކަށް ކަަމަށާއި، އެ ރިޕޯޓު ނޭޝަނަލް ޑިޒާސްޓާ މެނޭޖްމެންޓް އޮތޯރިޓީއާ ވެސް ހިއްސާ ކުރާނެ ކަމަށެވެ.
އަދި އެ ޙާދިސާގައި ޢާންމުންނަށް ލިބުނު ގެއްލުމުގެ ބަދަލަކީ އެ އޮތޯރިޓީން ކުރާ ކަމެއް ކަމަށް ވެސް އެ އިއުލާނުގައި ކައުންސިލުން ބުންޏެވެ.
ކައުންސިލުން ވަނީ މި ހިނގާ އޮކްޓޯބަރު މަހުގެ 20ގެ ކުރިން އެ މައުލޫމާތުތައް ފޯމު މެދުވެރިކޮށް ހުށަހެޅުމަށް އެ ރަށުގެ ރައްޔިތުންގެ ކިބައިން އެދިފައެވެ.
Advertisement
This content is created and paid for by advertisers and does not involve Voice Journalists
