ކުރިއަށް އޮތް 10 އަހަރު ދުވަހުގެ ތެރޭގައި ދިފާއީ ދާއިރާއިން ގުޅުން ބަދަހި ކުރުމަށް އިންޑިއާ އާއި އެމެރިކާއާ ދެމެދު ފްރޭމްވޯކް އެއްބަސްވުމެއްގައި ސޮއިކޮށްފިއެވެ.

މި އެއްބަސްވުން ހާމަކޮށްފައި ވަނީ އެމެރިކާގެ ޑިފެންސް ސެކްރެޓަރީ ޕީޓް ހެގްސެތު އާއި އިންޑިއާގެ ޑިފެންސް މިނިސްޓަރ ރާޖްނާތު ސިންހް އާސިއާން ސަމިޓްގެ ހަވާސާގެ ތެރެއިން، މެލޭޝިއާގެ ކުއާލަލަމްޕޫރުގައި ބޭއްވި ބައްދަލުވުމަށްފަހުއެވެ.

ހެގްސެތު ވިދާޅުވީ މި އެއްބަސްވުމުގެ ސަބަބުން ދެޤައުމުގެ މެދުގައ އަސްކަރީ ކޯޑިނޭޝަން އިތުރުކުރެވި، މައުލޫމާތު ހިއްސާ ކުރުމާއި، ޓެކްނޮލޮޖީގެ ގޮތުން ގުޅުން ބަދަހިވެ، ސަރަހައްދީ ހަމަޖެހުން އިތުރުވެގެންދާނެ ކަމަށެވެ.

ރިޕޯޓްތައް ބުނާ ގޮތުން މި އެއްބަސްވުމަކީ މިދިޔަ ޖުލައި-އޮގަސްޓް ހާތަނުގައި ސޮއިކުރެވެން ޖެހޭ އެއްބަސްވުމެކެވެ. އެހެންނަމަވެސް އެއްބަސްވުން އިއުލާންކުރެވުން ލަސްވީ އިންޑިއާ އާއި ޕާކިސްތާނާ ދެމެދު ހިނގި ކުރިމަތިލުންތައް ހުއްޓުވީ ޓްރަމްޕްކަމަށް އެމަނިކުފާނު ވިދާޅުވުމާއި ގުޅިގެން، އިންޑިއާއިން އެކަމާ ހިތްހަމަނުޖެހިގެންނެވެ. އިންޑިއާއިން ބުނާ ގޮތުން ހަމަލާތައް ހުއްޓާލީ އިންޑިއާގެ އަމާޒު ހާސިލްވުމުންނެވެ.

މި އެއްބަސްވުން އެކުލަވާލާފައި މިވަނީ އެމެރިކާގެ ރައީސް ޑޮނަލްޑް ޓްރަމްޕްގެ ޓެރިފް އުސޫލުތަކުގެ ތެރެއިން އިންޑިއާއިން އެމެރިކާއަށް އެތެރެކުރާ މުދަލުން 50 ޕަސެންޓް ޓެރިފް ނަގަން ނިންމާފައިވަނިކޮށެވެ. ޓެރިފް ބޮޑުކުރި އެއް ސަބަބެއްކަމަށް އެމެރިކާއިން ބުނެފައިވަނީ ރަޝިޔާއާ ދެކޮޅަށް އެމެރިކާއިން ދަތިކުރުމުގެ ފިޔަވަޅު އަޅާފައިވަނިކޮށް އެޤައުމުން ވިއްކާ ތެޔޮ އިންޑިއާއިން ގަތުމެވެ. ރަޝިޔާއިން ތެޔޮ ގަތުން ދިފާޢުކޮށް އިންޑިއާއިން ފުރަތަމަ ވާހަކަ ދެއްކިނަމަވެސް، އިންޑިއާއަށް ތެޔޮ އެތެރެކުރާ އެންމެ ބޮޑު އެއް ކުންފުނިކަމަށްވާ ރިލަޔަންސް ކުންފުނިން މިހާރު ވަނީ ރަޝިޔާއިން ތެޔޮ ގަތުން މަދުކުރުމަށް ނިންމާފައެވެ